ESRA 9 - BALA LUK DO'

Esra Kali' Ratnan Lun Yahudi Ngaweh Pupu Baken

¹ Muci ratnan ineh idi sebuang lun rayeh Israil iné' matun negku, kebaladeh, “Pupu Israil dengan imam idi lun Liwi pana' na ngado bururdeh ratnan pupu luk pekelibut, ieh ineh lun Kanaani, lun Hiti, lun Prisi, lun Yebusi, lun Amon, lun Moab, lun Masir, idi lun Amori. Idi lun Israil nenganau' kekamen pupu ineh luk inan Tuhan megateh.

² Lun Yahudi pangeh nengalap decur pupu ineh ku awandeh, pad pupu Allah na meligan. Idi lun rayeh-rayeh pana' meluun sala'.”

³ Kareb ui neninger bala ini, idi ui nenarak ayungku, idi ui nemubput abpukku idi buluh adaku, idi ui netudo dengan dat niat.

⁴ Idi amung lun luk matot ku bala Allah lun Israil, ngaceku sala' lun luk tiban luk pangeh nuli' ineh, nepamung negku, iano' ui netudo dengan dat niat pad macing ideh maré baré kareb malem aco.

⁵ Idi kareb ideh nemaré baré malem, ui netumui ratnan mawa', dengan ayungku lun nedarak. Idi ui netekeradung. Idi ui nengegenang ticu'ku idi nesembayang inan Tuhan Allahku,

⁶ kesembayangku, “O Allahku, ui pelaba igu', na ui mekuu' sium Namu, O Allahku. Ngaceku amung dat kai pangeh medita' ratnan uluh kai, idi amung sala' kai pangeh pebuun-pebuun macing i langit.

⁷ Idi rat kareb tepun kai macing aco sini kai bang sala' rayeh. Ngaceku dat kai, kai idi raca'-raca' idi imam-imam kai pangeh biré bang palad raca'-raca' bawang baken, pad kai pinaté, tiban, inaro, idi inigu' macing nekini.

⁸ Iamo' nekini mo' éi' Tuhan Allah kai pangeh megala', idi Ieh pian muit tuda'-tuda' lun kai luk ketecan, idi pian maré nekai aceh babpat bang su luk meligan ini, pad Allah kai ngeperuan nekai, idi ngulun nekai ratnan dereh kai.

⁹ Ngaceku kai ini demulun atun. Iamo' bang dereh ineh na Allah kai necan nekai. Iamo' Ieh nengegala' awaNeh luk lutep kuan kai pa kiung raca'-raca' Parsi, idi Ieh nengulun nekai, pad kai miak mudut Ruma' Allah kai idi ngedo' amung luk netabpa, pad kai do' udeng bang libung luk mereben déi' Yahuda idi déi' Yerusalim.

¹⁰ “Idi nekini, anunké luk miak belén kai, O Allah kai? Ngaceku kai pangeh nenecan amung balaMu,

¹¹ luk pangeh bida'Mu dengan tang lun dukenMu, ieh ineh amung nabi, kebaladeh, ‘Idi bawang luk ulek muyuh ineh, idi luk lapen muyuh ku babpat muyuh, ieh ineh tana' luk melutak ngaceku lutak amung pupu bang bawang ineh ngaceku ratnan amung kekamendeh luk inan Tuhan megateh idi lutakdeh maput bawang.

¹² Idi ngaceku ineh aleg muyuh ngaweh decur ineh. Aleg muyuh ngacing do' kuandeh macing ruked-ruked, pelé muyuh mangun metueh idi kuman uli' tana' ineh, idi miak maré ineh ku babpat anak-anak muyuh macing ruked-ruked.’

¹³ Idi ngaceku ratnan amung-amung luk pangeh nangun nekai ngaceku amung sala' idi kekamen kai luk dat, idi kai kali' O Allah, ukum luk biréMu nekai na petap nan kekamen kai luk dat, idi Iko pangeh nenima' nekai mulun teh.

¹⁴ Miakké kai lemubed ngelaba ukumMu, idi ngaweh pupu luk melutak ineh? Naké Iko museh nekai macing kai pitayen, pad seburur pana' nateh ketecan?

¹⁵ O Tuhan Allah lun Israil, Iko meluun mesiri. Iamo' Iko pangeh nemuit nekai. Kai ngamo sala' kai pa kiungMu. Kai na mayu amé' pa kiungMu.”