ESRA 8 - BALA LUK DO'

Lun Tiban Luk Nuli'

¹ Idi ini ngadan amung lun rayeh inul luk tiban iné' bawang Babil, idi luk nuli' maya' ni Esra kareb imet Raca' Artasasta:

^2-14 Gersom, ratnan inul Pinihas Daniel, ratnan inul Itamar Hatus Sekania, ratnan inul Daud Sekaria ratnan inul Paros, dengan 150 burur deléi (luk inan ngadan inayud bang surat inul) Eliunai Serahia, ratnan inul Pahat Moab, dengan 200 burur deléi Sekaria Yahasiel, ratnan inul Satu, dengan 300 burur deléi Ebed Yonatan, ratnan inul Adin, dengan 50 burur deléi Yesaya Atalia, ratnan inul Elam, dengan 70 burur deléi Sebadia Mikail, ratnan inul Sepatia, dengan 80 burur deléi Obadia Yehil, ratnan inul Yoab, dengan 218 burur deléi Selomit Yosipia, ratnan inul Bani, dengan 160 burur deléi Sekaria Babai, ratnan inul Babai, dengan 28 burur deléi Yohanan Hakatan, ratnan inul Asgad, dengan 110 burur deléi Elipelet, Yuel, idi Semaya, ratnan inul Adonikam dengan 60 burur deléi (iamo' ideh nuli' muci) Utai idi Sakur, ratnan inul Bigbai, dengan 70 burur deléi

Esra Nakap Nelun Liwi Ngakem Bang Ruma' Allah

¹⁵ Ui nengamung nedeh i tangeb abang luk manud macing déi' Ahawa. Idi kai nelupo déi' teluh aco. Idi kareb ui nenier nelun mula, seburur pana' lun Liwi nateh nekali'ku arangdeh.

¹⁶ Idi ui nengecuk nawar iwa' burur lun rayehdeh: Elieser, Ariel, Semaya, Elnatan, Yarib, Elnatan, Natan, Sekaria, idi Mesulam, idi teh dueh burur guru: Yoyarib idi Elnatan.

¹⁷ Idi ui nengecuk nedeh amé' ni Ido lun rayeh déi' Kasipia, pad ngecuk neneh idi lun denganneh luk ngakem bang Ruma' Allah maré nekai tuda'-tuda' lun ngakem kuan Ruma' Allah kai.

¹⁸ Idi ngaceku katu Allah, ideh nemaré kuan kai Serebia, seburur lun mileh, ieh ineh lun Liwi ratnan inul Mali, idi pulu' ualuh burur pupudeh nemaya' nedeh.

¹⁹ Idi teh ideh nemaré Hasabia, idi Yesaya ratnan inul Merari, dengan dueh ngepulu' burur pupudeh.

²⁰ Idi teh inan 220 burur lun duken bang Ruma' Allah. Tepundeh pangeh litep Daud idi tarehneh, pad ideh miak ngedengan nelun Liwi. Ngadan amung-amungdeh inayud.

Esra Nguyut Nelun Mula' Mawa' Idi Sembayang

²¹ Idi ui nengeletep aco luk inan mawa' i tangeb Abang Ahaba, pad kai ngebeneh burur kai pa kiung Allah kai, idi pad mutuh Neneh nguyut nekai maya' dalan idi matar nekai, dengan anak-anak, aya', idi binaweh kai.

²² Ngaceku ui migu' mutuh inan raca' aceh baweh idi lun luk maya' kuda, pad ideh miak matar nekai ratnan amung bunu' arang dalan, ngaceku kebala kai inan raca', “Idi Allah kai, ngeperuan amung lemulun luk merapet Neneh, iamo' Ieh pelaba useh nelun luk teketed rat Neneh.”

²³ Idi ngaceku ineh kai mawa' idi nemutuh ratnan Allah kai. Idi Allah pana' nengua' putuh kai.

Baré-Baré Kuan Ruma' Allah

²⁴ Idi ui nemili' pulu' dueh burur rat arang lun rayeh imam, ieh ineh Serebia, Hasabia, idi pulu' burur lun baken.

²⁵ Idi ui nenimang kuandeh amung amas, pirak, idi repapeh, idi baré luk inuit kuan Ruma' Allah kai luk pangeh biré raca', tarehneh, lun rayehneh, idi amung lun Israil luk idi déi'.

^26-27 Ini luk biréku kuandeh: pirak – 43, 400 kati 100 repapeh pirak –114 kati amas – 7,500 kati 20 bigan amas – 13 kati 2 bigan tekaling luk do' luk mepad raga ku bigan amas

²⁸ Idi kebalaku nedeh, “Muyuh ini meligan kuan Tuhan Allah tepuh muyuh. Kudeng ineh teh amung repapeh amas idi pirak luk inuit muyuh ku aceh baré dengan ran niat kuanNeh.

²⁹ Matar idi nganug ineh pad macing kareb muyuh nimang neneh bang takep-takep imam, idi maré amung ineh kuan amung lun Liwi, idi lun rayeh pupu Israil déi' Yerusalim.”

³⁰ Idi amung imam idi lun Liwi ineh nengalap amung amas, pirak, idi repapeh ineh itendeh amé' Yerusalim, bang Ruma' Allah kai.

Ideh lemubed Amé' Yerusalim

³¹ Idi kai nenalan rat Abang Ahaba, pulu' dueh aco bulan aceh iné' Yerusalim. Idi Tuhan nengedengan nekai. Idi Ieh nematar nekai ratnan bunu', idi lun luk ngabang arang dalan.

³² Idi kai nacing déi' Yerusalim idi nengaco teluh aco.

³³ Idi kareb aco luk keapat idi kai iné' déi' Ruma' Allah, idi kai nemaré amung amas, pirak, idi repapeh ineh bang palad Meremot Uria, imam ineh. Idi denganneh Eliasar Pinihas, idi dueh lun Liwi, ieh ineh Yosabad Yesua, idi Noadia Binui.

³⁴ Idi amung binaweh ineh iniap idi tinimangdeh. Idi berat amung ineh pangeh inayud.

³⁵ Idi lun luk tiban luk pangeh nuli' nemaré baré luk sabpen kuan Allah lun Israil, ieh ineh 12 sapi' deléi kuan amung lun Israil, 96 dumba deléi, 77 anak dumba, idi 12 amék ku ngeligan nedeh ratnan sala'. Amung ineh barén sabpen kuan Tuhan.

³⁶ Idi ideh nenguit surat luk biré raca', idi nemaré ineh nelun tareh raca' idi kuan lun rayeh-rayeh rat pa acep aco Abpa' Pirat, pad ideh pana' nengedengan nelun Israil idi Ruma' Allah ineh.