ESRA 7 - BALA LUK DO'

Esra Nacing Déi' Yerusalim

¹ Idi muci ratnan ineh kareb imet Artasasta, raca' Parsi, inan seburur lemulun, ngadanneh Esra. Idi Esra ineh inul Arun, Imam Rayeh ineh, ngaceku Esra, ieh ineh anak Seraya, luk anak Asaria, luk anak Hilkia,

² luk anak Salum, luk anak Saduk, luk anak Ahitub,

³ luk anak Amaria, luk anak Asaria, luk anak Merayot,

⁴ luk anak Serahia, luk anak Usi, luk anak Buki,

⁵ luk anak Abisua, luk anak Pinihas, luk anak Eliasar, luk anak Arun Imam Rayeh ineh.

⁶ Idi Esra ineh seburur luk mileh ngelio ukum Musa luk pangeh biré Tuhan Allah lun Israil. Idi raca' nemaré kuanneh amung luk pianneh, ngaceku Tuhan Allahneh nengeperuan neneh. Idi Esra nenalan rat bawang Babil iné' Yerusalim,

⁷ dengan tuda'-tuda' burur lun Israil, ieh ineh lun imam, lun Liwi, lun luk menani, idi lun luk nginita tanga' Ruma' Allah, idi lun duken bang Ruma' Allah. Ieh ineh bang lak luk ketudu' kareb imet Raca' Artasasta.

^8-9 Idi ideh nenalan rat Babil aceh aco bulan aceh. Idi ideh dinengan Allah, pad ideh nacing déi' Yerusalim, aceh aco bulan limeh.

¹⁰ Ruked ulun Esra ieh mepicet nakap bala Tuhan idi nemaya' ukumNeh idi nemada' nelun Israil amung bada' idi ukumNeh.

Surat Luk Biré Raca' Artasasta Kuan Esra

¹¹ Idi ini bala surat luk biré Raca' Artasasta kuan Imam Esra, lun luk mileh ngelio ukum Musa, luk kali' amung lawé bala Tuhan idi amung dalan kuan lun Israil:

¹² “Idi surat ini rat Artasasta raca' amung raca' kuan Imam Esra, lun luk mileh ngelio ukum Allah Surga.

¹³ “Ui maré bala ini: Idi bang imetku idé rat pupu Israil idi rat amung imam idi lun Liwi luk pian amé' déi' Yerusalim miak ieh amé' maya' namu.

¹⁴ Ngaceku iko pangeh icuk raca' dengan tudu' lun ratehneh, miak amé' nier amung-amung luk déi' bawang Yahuda idi déi' Yerusalim, maya' ukum Allahmu luk idi bang paladmu ineh.

¹⁵ Idi iko miak nguit amé' déi' amung amas idi pirak luk pangeh biré raca' idi amung lun tarehneh dengan ran niat kuan Allah lun Israil luk kuan Ruma' idi déi' Yerusalim.

¹⁶ Idi teh iko miak nguit amung amas idi pirak luk lapenmu aput bawang Babil, dengan amung baré lun mula' idi baré imam luk birédeh kuan Ruma' Allahdeh déi' Yerusalim.

¹⁷ “Idi dengan matar do'-do', do' iko melih sapi', dumba deléi, idi anak dumba ku usin ineh, idi maré akan, idi baré luk rupen, idi amung ineh barén luun bubpun luk bang Ruma' Allahmu déi' Yerusalim.

¹⁸ Idi anun luk petulu kali'mu idi kinanak-kinanakmu luk ruen dengan amas idi pirak luk ela ineh, do' iko nganau' maya' pian Allahmu.

¹⁹ Iamo' amung repapeh luk pangeh biré namu kuan Ruma' Allahmu ineh, do' iko maré pa kiung Allah déi' Yerusalim.

²⁰ Idi anun luk petulu bang terawému barén kuan Ruma' Allahmu meluun ratnan ini, do' iko melih ineh ku usin luk dinug raca'.

²¹ “Idi ui ngecuk amung lun rayeh luk ngimet usin bang bawang luk pa acep aco Abpa' Pirat, maré dengan mesaget amung-amung luk pinutuh Imam Esra, lun luk mileh ngelio ukum Allah Surga.

²² Iamo' aleg maré meluun ratnan 5,700 kati pirak, 5,200 gatang padé, 600 gilin abpa' anggur, 600 gilin umau saitun, iamo' tucu' pad pian maré mo'.

²³ Idi anun-anun luk icuk Allah Surga ineh, do' nganau' ineh do'-do' kuan Ruma'Neh, pelé Tuhan na museh nan raca', anakneh, idi anak itinneh pana'.

²⁴ Idi aleg muyuh ngalap pupuk idi acam ratnan imam, lun Liwi, lun luk menani, lun luk nginita tanga', lun duken luk ngakem bang Ruma' Allah, idi lun duken lun baken bang Ruma' Allah ineh.

²⁵ “Idi iko, O Esra, maya' ileh Allahmu luk namu ineh, do' ngikit lun luk mutut ukum idi lun rayeh luk ngimet nedeh ineh luk mutut ukum kuan amung lun luk pa acep aco Abpa' Pirat, ieh ineh amung lun luk kali' Ukum Allahmu. Idi idé luk na kali' Ukum ineh do' mada' nedeh.

²⁶ Idi idé luk na maya' bala Allahmu idi bala raca' ineh, do' ieh kumin dengan mesaget, kian pitayen, talan rat bang bawang, binawehneh lapen, kian uen nutup lek.”

Esra Ngubur Allah

²⁷ Kebala Esra, “Amung ubur kuan Tuhan Allah tepun tau luk pangeh nengegio niat raca', pad ieh miak ngerayeh Ruma' Allah luk déi' Yerusalim ineh.

²⁸ Ngaceku katu Allah, raca', amung tarehneh, idi lun rayeh-rayeh luk ngedengan neneh pangeh méi' negku. Idi teh Allah nemaré kuu' negku pad ui miak ngubuk tuda'-tuda' lun rayeh pupu Israil pelé ideh miak maya' negku amé' Yerusalim.”