ESRA 6 - BALA LUK DO'

Ecuk Raca' Kores Nekali'deh

¹ Idi Raca' Darius nengecuk nelun nakap bang su luk inan nganug Surat Raca' déi' Babil.

² Iamo' déi' Ekbatana luk bang bawang Midi idi ideh nengalap aceh lulun surat. Idi inan luk inayud bang ineh. Kudeng ini balaneh:

³ “Idi kareb lak luk pun-pun bang imet Raca' Kores, ieh nemaré bala ini. Do' Ruma' Allah luk déi' Yerusalim piduten baruh luun su luk inan maré baré luk kereten idi baré luk sabpen. Idi kidita'neh pulu' limeh depeh, idi pipangneh pana' pulu' limeh depeh.

⁴ Idi aladneh piduten ratnan teluh buun batu luk libping idi aceh buun kayuh. Idi amung raganeh pana' uen ngua' ku usin luk dinug raca'.

⁵ Idi teh do' ngelubed amung repapeh Ruma' Allah luk ratnan amas idi pirak luk pangeh inuit Nebukadnesar rat bang Ruma' Allah luk déi' Yerusalim iné' Babil ineh amé' su luk inanneh.”

Raca' Darius Ngecuk Nutum Kekamen Ineh

⁶ Idi Raca' Darius nengua' surat ineh kudeng ini: “Tabi' kuan Tatenai, pengulu pa acep aco Abpa' Pirat, idi Setar Bosenai, idi lun rayeh luk ngedengan nemedueh. “Ngado burur muyuh ratnan Ruma' Allah ineh.

⁷ Aleg muyuh ngesabeng kekamen Ruma' Allah ineh. Nima' lun rayeh bawang lun Yahudi idi amung lun rayeh-rayeh lun Yahudi mudut Ruma' Allah ineh su luk litep ineh.

⁸ Ui ngecuk nemuyuh ngedengan nedeh pelé ideh mudut Ruma' Allah ineh. Do' maré amung raganeh kuandeh dengan mesaget ratnan usin raca', ieh ineh pupuk idi acam ratnan bawang luk pa acep aco Abpa' Pirat pad kekamendeh na uen ngesabeng.

⁹ Idi anun luk piandeh, ieh ineh sapi' deléi luk pegawa', dumba deléi, idi anak dumba, ku baré luk sabpen kuan Allah Surga, idi teh padé, tucu', abpa' anggur, umau, maya' putuh amung imam luk déi' Yerusalim ineh, na miak na ineh barén kuandeh anid-anid aco,

¹⁰ pad ideh miak maré baré luk sabpen luk do' buen kuan Allah Surga, idi sembayang mutuh do' ulun kuanku idi kuan anak-anakku.

¹¹ Idi teh kebalaku, idé luk ngisu' bala ini kali' rungen sepekatu atang ruma'neh miak uen ngaro idi uen ngabpen. Idi ieh pana' uen nebpek ku ineh. Idi ruma'neh ineh mangun ku su luk inan nala' arap.

¹² Idi do' Allah luk nemili' Yerusalim ku su luk inan lemulun sembayang Neneh nala' amung raca' idi pupu luk ngisu' ukum ini idi luk nutun ngedat Ruma' Allah luk déi'. Idi ui ini Darius pangeh nemaré bala ini. Do' ieh bén dengan meriput.”

Ideh Ngukab Ruma' Allah

¹³ Pengulu Tatenai, Setar Bosenai, idi amung lun rayeh luk nengedengan nedidueh nemaya' kudeng luk icuk raca'.

¹⁴ Idi amung lun rayeh-rayeh lun Yahudi pana' nemudut idi nemangeh pudut ineh dengan do' ngaceku ubuk Nabi Hagai idi Sakaria Ido. Ideh nemangeh pudut ineh maya' bala Allah lun Israil, idi maya' bala Kores, Darius, idi Artasasata raca'-raca' Parsi ineh.

¹⁵ Idi ruma' ineh nepangeh teluh aco bulan Adar, bang lak luk keanem kareb imet Raca' Darius.

¹⁶ Idi luk Israil, amung imam, idi lun Liwi, idi amung lun tiban luk pangeh nuli' ineh, nenganau' aco rayeh dengan mawang niat ngaceku Ruma' Allah ineh.

¹⁷ Idi kareb aco rayeh Ruma' Allah ineh ideh nemaré 100 sapi' deléi, 200 dumba, 400 anak dumba, idi 12 amék barén ngaceku sala' amung lun Israil, maya' kinula' pupu Israil.

¹⁸ Idi ideh nengeletep amung imam idi lun Liwi ngakem bang su luk litep kuandeh bang Ruma' Allah déi' Yerusalim, maya' kudeng luk inayud bang Surat Musa.

Irau Paska

¹⁹ Idi lun luk tiban ineh luk pangeh nuli' nenganau' Irau paska pulu' apat aco bulan aceh.

²⁰ Ngaceku amung imam idi lun Liwi pangeh nengeligan bururdeh maya' kudeng bala Tuhan. Idi ideh nengeret anak dumba Paska kuan amung lun luk tiban luk pangeh nuli' ineh, idi kuan kinanakdeh lun imam, idi kuan bururdeh sebuleng teh.

²¹ Idi amung baré ineh kuan lun Israil luk tiban luk pangeh nuli', idi lun luk pangeh nenecan kekamen lun pupu baken luk bang bawang ineh, pad nakap Tuhan Allah lun Israil.

²² Idi ideh nenganau' Aco Rayeh Ruti luk Na Lamud tudu' aco kinioneh dengan mawang niat ngaceku Tuhan pangeh nengawang niatdeh ineh, idi Ieh nengegio niat raca' Asur pad ieh nengedengan nedeh nganau' Ruma' Allah lun Israil.