ESRA 5 - BALA LUK DO'

¹ Idi dueh nabi, ieh ineh Hagai idi Sekaria Ido, nengimun mada' nelun Yahudi luk bang bawang Yahuda idi Yerusalim dengan ngadan Allah lun Israil.

² Kareb Serubabel Saltiel idi Yesua Yosadak neninger bala didueh idi ideh nengimun mudut Ruma' Allah luk déi' Yerusalim baruh. Idi dueh nabi ineh nengedengan nedeh.

³ Idi bang kareb ineh Pengulu Tatenai rat pa acep aco Abpa' Pirat, Setar Bosenai, idi amung lun rayeh luk ngedengan nedidueh iné' Yerusalim idi nengitun nelun Yahuda, kebaladeh, “Idéké nengecuk nemuyuh mudut Ruma' Allah muyuh ini dengan repapehneh?”

⁴ Idi ideh nengitun ngadan lun luk nemudut ruma' ineh.

⁵ Iamo' Allahdeh nematar amung lun rayeh lun Yahudi, idi na lun Parsi nemebpeng nedeh ineh, pad dalan ineh miak kali' Darius, pelé ieh ngua' suratdeh ineh.

⁶ Idi ini bala surat luk birédeh kuan raca:

⁷ “Tabi' idi awang kuan Raca' Darius.

⁸ Petulu iko kali' ratnan kai ini pangeh iné' tana' Yahuda idi nenier Ruma' Allah luk meluun rayeh. Idi Ruma' ineh piduten baruh ratnan batu rayeh. Idi amung aladneh binuun ku kayuh. Idi ideh mekél nganau' kekamen ineh dengan mesaget.

⁹ “Idi kai pangeh nengitun amung lun rayehdeh ineh, ‘Idé luk nengecuk nemuyuh mudut Ruma' ini idi repapehneh?’

¹⁰ Idi teh kai pangeh nengitun ngadan amung lun rayehdeh ineh pad kai miak maré kali' namu.

¹¹ “Idi ideh nengor bala kai kudeng ini: ‘Kai ini lun duken Allah langit idi tana', idi kai mudut Ruma' ini luk pangeh pinudut seburu raca' Israil luk rayeh bang kareb luk mon.

¹² Iamo' ngaceku tepun kai nengeruat useh Allah Surga ineh, idi Ieh nemaré nedeh bang palad Nebukadnesar raca' Babil idi Ruma' ini inusag idi pupu kai tiban iné' déi' Babil.

¹³ Iamo' kareb lak luk pun-pun bang imet Kores déi bawang Babil idi ieh nengecuk mudut Ruma' Allah ini.

¹⁴ Idi amung repapeh Ruma' Allah luk ratnan amas idi pirak luk ilap Nebukadnesar rat bang Ruma' Allah luk déi' Yerusalim, idi luk pangeh inuitneh iné' bang ruma' akang luk déi' Babil, amung ineh pangeh biré lemubed kuan seburur luk ngadanneh Sesbasar luk pangeh litepneh ku pengulu Yahuda.

¹⁵ Idi Raca' Kores nengecuk neneh nguit amung repapeh ineh amé' bang Ruma' Allah déi' Yerusalim, idi mudut Ruma' Allah ineh baruh su luk inanneh.

¹⁶ Idi Sesbasar iné' tungé', idi ieh nengimun mudut ineh. Idi rat aco sineh, ideh nemudut ineh macing nekini, iamo' natieh nepangeh.’

¹⁷ “Idi nekini kudeng petulu bang terawé raca', do' iko nakap bang su luk inan nganug Surat Raca' déi' Babil, kudeng matu inan bala Raca' Kores ratnan mudut Ruma' Allah luk déi' Yerusalim ineh. Idi do' iko maré kali' pianmu ratnan lawé ini kuan amung kai.”