ESRA 4 - BALA LUK DO'

Bunu' Lun Israil Ngesabeng Kekamen

¹ Amung bunu' lun Yahuda idi Beniamin neninger, idi lun luk pangeh tiban ineh nelemubed iné' mudut aceh Ruma' kuan Tuhan Allah lun Israil.

² Idi ideh iné' ni Serubabel idi amung lun rayeh inul, kebaladeh nedeh, “Do' kai ngakem pad-pad dengan muyuh ngaceku kai pana' sembayang inan Tuhan Allah muyuh. Idi teh kai pangeh nemaré baré kuanNeh rat kareb imet Esarhadon raca' Asur luk nemura' nekai amé' tungé'.”

³ Iamo' kebala Serubabel, Yesua, idi amung lun rayeh inul, “Na muyuh miak ngedengan nekai mudut aceh Ruma' kuan Tuhan Allah kai. Iamo' kai sebuleng mo' mudut ineh, maya' kudeng bala Kores raca' Parsi nekai.”

⁴ Idi lun bang bawang ineh nutun ngelaya' nelun Yahuda, pad ideh matot mudut.

⁵ Idi ideh nenuap tuda'-tuda' lun rayeh lun Parsi pad ideh ngesabeng nedeh. Ideh nenganau' kudeng ineh ruked imet Kores macing bang imet Raca' Darius.

Bunu' Lun Israil Ngesabeng Kekamen Mudut Bawang Yerusalim

⁶ Idi kareb pun imet Raca' Ahasuirus, ideh nengayud kuanneh aceh surat adu' ratnan amung lun bang bawang Yahuda idi Yerusalim.

⁷ Idi kareb imet Artasasta raca' Parsi pana', Bislam, Mitredat, Tabiel, idi amung lun rurumdeh nemaré aceh surat kuan raca'. Idi surat ineh inayud bang buri' Arami, idi balaneh uen ngelibal kareb uen maca'.

⁸ Idi Pengulu Rehum idi Simsai lun luk ngayud kuang bawang ineh nemaré surat ini ratnan Yerusalim kuan Raca' Artasasta:

⁹ “Rat Pengulu Rehum idi Simsai lun luk ngayud kuan bawang ini dengan amung lun rurumdeh, idi lun luk mutut ukum, idi lun rayeh luk baken, ieh ineh lun luk rat Erik, Babil, idi Susa luk bang bawang Elam,

¹⁰ idi amung pupu baken luk pangeh pinura' i Asurbanipal luk rayeh idi mebala idi luk icukneh tudo bang bawang Samaria, idi aput babpat tana' luk pa acep aco Abpa' Pirat.”

¹¹ Idi ini bala surat luk birédeh: “Tabi' kuan Raca' Artasasta, ratnan demulunneh, ieh ineh amung lun luk tudo pa acep aco Abpa' Pirat.

¹² “Idi kai pian maré kali' namu, ratnan lun Yahudi luk pangeh nacing tungé' Yerusalim rat bang bawangmu pad ideh mudut baruh bawang luk sikal metueh idi luk dat ineh. Idi ideh nengimun nganau' libung bawang idi na mio teh ideh mangeh kekamen ineh.

¹³ O raca', kudeng bawang ineh pangeh pinudut, idi amung libung pangeh inau' peh, kali' rungen ideh na maré pupuk, idi usin raca' na petap muci.

¹⁴ Ngaceku kai pa liang raca' na kai pian namu uen ngebeneh. Idi bang terawé kai,

¹⁵ do' iko ngelio bang Surat Kekamen tepunmu, pad iko miak kali' bala ratnan bawang ini luk sikal metueh, idi luk pangeh nengesusa' niat amung raca', idi lun luk ngimet pana' rat mon. Idi pupuneh megéi' dat uen ngimet. Ineh punneh bawang ini inusag.

¹⁶ Idi kai ngerawé kudeng bawang ini piduten baruh idi amung libungneh pana' pidutendeh , kali' rungen raca' na miak ngimet babpatmu luk pa acep aco Abpa' Pirat ineh.”

Or Raca'

¹⁷ Idi raca' nemaré surat ini: “Tabi kuan Pengulu Rehum, Simsai, lun luk ngayud kuan bawang, idi lun rurum muyuh luk tudo déi' Samaria idi bang babpat bawang luk pa acep Abpa' Pirat ineh.

¹⁸ “Idi surat luk pangeh biré muyuh ineh pangeh bica' pa kiungku dengan megala'.

¹⁹ Idi ui nengecuk nelun ngelio ratnan bala muyuh ineh. Idi ideh nekali' rat kareb luk mon bawang ineh sikal metueh ratnan amung raca'. Idi ideh nenganau' ria' idi na sikal pa liang.

²⁰ Idi teh raca'-raca' luk metueh nengimet Yerusalim atun idi aput babpat bawang luk pa acep aco Abpa' Pirat. Idi ideh nengalap pupuk idi acam tana' teh.

²¹ Idi nekini do' muyuh mebpeng nedeh ineh na ngukab bawang ineh, pad acing balaku nedeh.

²² Ngerawé do'-do' aleg muyu ngesidan ku ecukku ini, pad dat ineh na ngesusa' negku.”

²³ Kareb ideh pangeh nemaca' surat Raca' Artasasta kuan Rehum, Simsai, idi amung lun rurumdeh, idi dengan mesaget ideh ineh iné' Yerusalim idi nemebpeng nelun Yahudi na mudut bawang ineh.

Ideh Ngimun Baruh Mudut Ruma' Allah

²⁴ Kudeng ineh teh luk nangun atun kareb ideh igka' mudut Ruma' Allah macing lak luk kedueh bang imet Darius raca' Parsi ineh.