ESRA 3 - BALA LUK DO'

Lun Israil Sembayang Inan Allah Baruh Teh

¹ Kareb bulan luk ketudu', idi amung lun Israil lutep bang bawangdeh sebuleng. Idi ideh nepamung déi' Yerusalim.

² Idi Yesua Yosadak, dengan amung-amung imam luk baken, idi Serubabil Saltiel dengan amung pupuneh nemudut bubpun Allah lun Israil baruh, pad ideh mika maré baré luk sabpen maya' kudeng luk inayud bang Ukum Musa, nabi Allah ineh.

³ Idi ideh nemudut bubpun ineh su luk inanneh atun, sagan tu pana' ideh matot inan pupu baken luk bang bawang ineh. Idi ideh nengeseb luun bubpun ineh baré luk sabpen kuan Tuhan anid pekak idi anid alem.

⁴ Idi ideh nengimet Aco Rayeh Lepo maya' kudeng luk pangeh inayud, dengan baré luk sabpen anid-anid aco, maya' kudeng luk pekalai kuan aco sineh.

⁵ Pangeh ineh, idi ideh nengeseb baré luk sabpen luk pekalai ineh idi nemaré baré kareb Bulan Baruh, idi nenganau' anid irau luk litep kuan Tuhan, idi teh ideh nemaré kuan Tuhan luk sabpen dengan ran niatdeh.

⁶ Ideh nengimun maré baré luk sabpen kuan Tuhan bang aceh aco bulan tudu', sagan tu pana' ideh nateh nengimun mudut Ruma' Allah ineh.

Lun Israil Ngimun Mudut Ruma' Allah Baruh

⁷ Lun Israil nemaré usin kuan amung lun luk mileh ngakem batu idi tukang kayuh, idi teh ideh nemaré akan, luk rupen, idi umau saitun kuan bawang Sidon idi Sur ku libal kayuh tumuh rat Lebanon, luk iten maya' abpa' rayeh macing déi' Yopa, maya' bala Kores, raca' Parsi.

⁸ Kareb bulan dueh bang lak ineh muci ratnan acingdeh déi' su luk inan Ruma' Allah déi' Yerusalim, idi ideh nengimun ngakem. Serubabel, Yesua, idi lun Israil luk baken nengimun mudut Ruma' ineh dengan lun imam idi lun Liwi pana', ieh ineh amung lun luk tiban luk pangeh nelemubed iné' Yerusalim. Idi ideh nengeletep amung lun Liwi luk ulun dueh ngepulu' lak idi mela, pad ideh ineh miak ngatur kekamen mudut Ruma' Allah.

⁹ Idi Yesua, lun Liwi ineh dengan anak-anakneh idi pupuneh, Kadmil idi anak-anakneh ratnan inul Hodabia nepamung pad ngatur kekamen mudut Ruma' Allah. (Idi teh lun Liwi ratnan inul Henadad nengedengan nedeh.)

¹⁰ Kareb ideh nengimun nganau' tapin Ruma' Allah, idi amung imam luk nengayung ku kuyu' imam netuped su luk litep inandeh dengan serupitdeh, idi teh lun Liwi ratnan inul Asap idi déi' dengan karingdeh. Idi ideh nengubur Tuhan, maya' bala Daud raca' lun Israil.

¹¹ Idi ideh pesua-pesua menani, idi nemaré ubur inan Tuhan, kebaladeh, “Tuhan ineh pelaba do', ide éi'Neh lutep kuan lun Israil, macing ruked-ruked.” Idi lun mula' nengudub dengan rayeh tang, kareb ideh nengubur Tuhan, ngaceku tapin Ruma' Allah pangeh tinimun.

¹² Iamo' mula' imam idi lun Liwi idi lun rayeh inul luk mengered, idi luk pangeh nekali' Ruma' Allah luk su ineh atun, nenangi' idi netemido kareb ideh nenier tapin Ruma' ini piduten. Iamo' lun baken nengitang ngaceku ideh mawang niat,

¹³ pad seburur pana' nateh kali' ilung aroddeh, tangi', kian tang awang niat lek, ngaceku lun mula' ineh ngitang-ngitang dengan rayeh arod, pad pedingeren rat mado.