ESRA 1 - BALA LUK DO'

Raca' Kores Ngecuk Nelun Yahudi Muli'

¹ Bang lak luk pun-pun kareb imet Kores raca' Parsi, Tuhan nengegio niatneh pad ieh nengayud aceh surat uen lun maca' rayeh tang bang aput-aput imetneh, pelé ngacing bala Tuhan luk bida' Nabi Yeremia ineh.

² “Kudeng ini bala Kores raca' Parsi: Tuhan Allah Surga pangeh nemaré negku amung imet luk luun tana'. Idi pangeh Ieh nengecuk negku mudut aceh Ruma' kuanNeh déi' Yerusalim luk bang tana' Yahuda.

³ Do' Allah ngedengan nemuyuh luk mangun ku pupuNeh. Do' muyuh amé' Yerusalim luk déi' tana' Yahuda ineh. Idi do' muyuh mudut baruh Ruma' Tuhan Allah lun Israil, Ieh ineh Allah luk inan sembayang déi' Yerusalim.

⁴ Kudeng sebuang pupuNeh luk tiban ineh petulu uen ngedengan, pad ideh miak muli', do' amung lun bang bawang ineh ngedengan nedeh ku pirak, amas, binaweh, idi aya' luk miak mabeh, idi teh baré-baré luk baréndeh dengan ran niat bang Ruma' Allah déi' Yerusalim.”

⁵ Idi amung lun rayeh tetek ruma' ratnan pupu Yahuda idi Beniamin, dengan amung imam idi lun Liwi, idi idé'-idé' luk tigio Roh Tuhan netemina' amé' mudut baruh Ruma' Allah luk déi' Yerusalim.

⁶ Idi amung lun luk tudo pekelibut nedeh ineh nengedengan nedeh ku mula' binaweh, ieh ineh pirak, amas, binaweh luk baken-baken, aya' luk miak mabeh, idi tuda'-tuda' binaweh luk meraga, dengan baré'-baré' luk baren bang Ruma' Allah déi' Yerusalim.

⁷ Idi Raca' Kores nemaré kuandeh amung bigan idi sangkir luk pangeh inuit Raca' Nebukadnesar rat Yerusalim idi luk rirengneh bang ruma' akangneh.

⁸ Ieh nemaré amung ineh kuan Mitredat, lun rayeh luk ngimet usin raca'. Idi Mitredat nengayud kinula'deh kuan Sesbasar lun rayeh lun Yahuda.

^9-10 Ieh ineh: bigan amas luk ku baré 30 bigan pirak luk ku baré 1,000 bigan luk baken 29 bigan amas luk isuut 30 bigan pirak luk isuut 410 repapeh luk baken 1,000

¹¹ Kinula' amung repapeh dengan bigan amas idi pirak 5,400. Amung ineh inuit Sesbasar, kareb ieh iné' Yerusalim dengan amung lun baken luk tiban ineh rat Babil.