DANIEL 9 - BALA LUK DO'

Daniel Sembayang Mutuh Kuan Pupuneh

¹ Darius Ahasuirus, luk pupu Midi ngimet bawang Babil.

² Bang lak luk pun kareb ieh ngimet, ui ini Daniel sibada' ratnan Surat Tuhan idi nengerawé ratnan tabpa Yerusalim luk kinio tudu' ngepulu' lak, maya' kudeng luk bila Tuhan ni Nabi Yeremia.

³ Idi ui nesembayang inan Tuhan Allah, idi nemutuh rat Neneh, idi mawa' na kuman, idi nenacung, idi tudo luun abuh.

⁴ Ui nesembayang inan Tuhan Allahku idi nengamo amung sala' pupuku. Kesembayangku, “O Tuhan Allah, Iko luk rayeh idi luk buren kai. Iko luk lutep maya' jani'Mu, idi megéi ngegala awaMu luk lutep kuan lemulun luk mawa Namu idi luk maya' amung-amung ukumMu.

⁵ “Kai pangeh nenganau' sala'; kai nenganau' luk dat idi neraruh. Kai pangeh nengelaba ukumMu, idi nelemubed ratnan luk bida'Mu nekai.

⁶ Na kai neninger bala demulunMu luk nabi luk nepebala dengan ngadanMu kuan raca' kai, lun ngimet nekai, tepun kai, idi amung pupu kai.

⁷ O Tuhan, Iko luk matu, idi kai luk megéi' nganau' luk dat — ieh ineh kai luk tudo déi' Yahuda idi déi' Yerusalim, idi amung lun Israil luk pitadMu amé' bang bawang luk muneng idi luk mado, ngaceku ideh na lutep maya' Namu.

⁸ O Tuhan raca'-raca' kai, lun ngimet nekai, idi tepun kai pangeh nenganau' luk dat idi mesala' pa kiungMu.

⁹ Iko luk méi' idi maré do', iamo' kai sikal metueh rat Namu.

¹⁰ Kai na neninger balaMu, O Tuhan Allah, kareb Iko nengecuk nekai maya' amung ukum luk biréMu nekai dengan tang demulunMu luk nabi.

¹¹ Amung lun Israil nengelaba ukumMu idi ara' ninger balaMu. Kai nenganau' sala' pa kiungMu, idi Iko nengacing kediman luk inayud bang Surat Ukum demulunMu Musa kuan kai.

¹² Iko nengacing kuan kai idi kuan lun rayeh kai amung-amung luk bilaMu. Ukum luk icingMu kuan bawang Yerusalim meluun berat ratnan ukum amung bawang baken bang tana' ini.

¹³ Kai nengalap amung ukum luk ginala' bang Surat Ukum Musa. Idi macing nekini pana', O Tuhan Allah kai, kai na maya pianMu, idi kai na lumi ratnan sala' kai pad kai maya' luk matu.

¹⁴ O Tuhan Allah kai, Iko netemina' ngukum nekai. Idi Iko nenganau' kudeng ineh, ngaceku amung luk ruenMu matu, iamo' na kai neninger balaMu.

¹⁵ “O Tuhan Allah kai, Iko nengegala' laludMu kareb Iko nenguit pupuMu remuat rat bang bawang Masir, idi macing nekini kai ngerawé laludMu. Kai pangeh nenganau' sala'. Kai pangeh nenganau' luk dat.

¹⁶ Iko luk matu. Ngaceku ineh aleg Iko museh kuan bawang Yerusalim teh. Ieh ineh bawangMu sebuleng, idi pegkungMu luk meligan. Amung-amung pupu bang bawang luk libut-libut Yerusalim situnga neneh idi pupuMu, ngaceku amung sala' kai idi dat tepun kai.

¹⁷ O Allah, ninger sembayang idi putuhku. Ngedo' rama'Mu luk pangeh unusag. Ngedo' neneh pad amung-amung lemulun kali' idi Iko luk Allah.

¹⁸ Ninger sembayang kai, O Allah; nier nekai idi nier susa' kai idi susa' bawang luk titen bawangMu. Kai sembayang pa kiungMu ngaceku Iko luk méi', idi baken ngaceku kai pangeh nenganau' luk matu.

¹⁹ O Tuhan, ninger sembayang kai. O Tuhan, maré do' ku sala' kai. O Tuhan ninger nekai idi nganau' luk pianMu! Pad amung-amung lemulun kali' Iko luk Allah. Aleg mio! Bawang ini idi pupu ini Iko kuan.”

Gabriel Ngelio Bada' Luk Biré Allah

²⁰ Ui uned sembayang idi ngamo sala'ku idi sala' pupuku Israil, idi ui nemutuh Tuhan Allahku ngedo' ruma'Neh.

²¹ Idi kareb ui sembayang, idi lun luk titen Gabriel, luk nekali'ku bang luk sinierku pun-pun, netemulud nacing negku. Ieh ineh kareb luk petulu maré baré pa malem.

²² Kebalaneh, “O Daniel, ui iné ngedengan namu, pad iko kali' ilung bada' luk biré ineh.

²³ Kareb iko nengimun sembayang mutuh ratnan Allah, idi Ieh nengua' putuhmu. Ui luk maré orNeh namu, ngaceku Allah mawa namu. Ninger do'-do' kareb ui mada' ilung luk siniermu ineh.

²⁴ “Allah pangeh nengeletep tudu' kua' tudu' ngepulu' lak, pad pupumu idi bawangmu luk meligan miak mangeh amung-amung dat idi sala-deh. Pangeh ineh ideh miak ngalap do' ratnan sala'deh, idi luk matu luk meruked miak uen ngeletep, pad luk sinier ineh idi bada' luk biré ineh miak mangun, idi Ruma' Allah luk meligan miak uen ngeligan.

²⁵ Ngerawé do'-do': Rat kareb ukum ratnan mudut Yerusalim baruh barén, pad acing Raca' luk pinili' Allah, ieh ineh apat ngepulu' iwa' lak kinioneh. Yerusalim miak piduten baruh dengan tuda'-tuda' dalan idi libung luk meraben. Idi ieh miak tuped kinio 434 lak. Iamo' bang kareb ineh mula' susa'.

²⁶ Pangeh ineh, luk pinili' Allah ineh miak pitayen dengan na punneh. Bawang ineh idi Ruma' Allah miak sagen baweh luk bang imet aceh raca' luk rayeh. Kekipedneh miak macing mepad kudeng ereb. Idi macing kekipedneh ineh inan bunu' idi susa' luk icuk Allah.

²⁷ Idi lun rayeh baweh ineh miak nganau' aceh jani' luk lutep dengan mula' lemulun kinio tudu' lak. Idi ieh miak ngagka' amung baré kinio teluh lak setangal. Idi Akang luk Nguyo miak uen ngerareng luun su luk meluun dita' bang Ruma' Allah, pad macing kareb Allah ngukum lemulun luk ngerareng akang ineh su ineh.”