DANIEL 8 - BALA LUK DO'

Luk Sinier Daniel Ratnan Aceh Dumba Deléi Idi Amék

¹ Bang lak luk keteluh kareb imet Belsasar, ui ini Daniel nekali' aceh luk sinierku baruh teh.

² Idi bang luk sinierku ineh, denak-denak ui idi bang bawang Susa luk linibung ineh, luk déi' bang babpat Elam. Ui netuped tangeb Abpa' Ulai.

³ Idi ui nekali' aceh dumba deléi luk tuped tangeb abpa' ineh. Ieh inan dueh unga, idi luk netemubu' muci meluun rayeh ratnan luk pun-pun.

⁴ Ui nenier dumba deléi ineh nengegkul pa acep aco, pa tinueh busat aco, idi pa kabing busat aco. Idi na pung baken miak ngagka' neneh pad ieh mepuit ratnan laludneh. Ieh nenganau' luk pianneh, idi mangun medita' niat.

⁵ Kareb ui ngerawé luk sinierku ini, aceh amék upun rat pa acep aco idi ieh pelaba awer, pad kukudneh na mepisit i tana'. Ieh inan aceh unga luk rayeh arang matehneh.

⁶ Kareb ieh nepapu' dumba luk inan dueh unga ineh luk sinierku tuped tangeb abpa' ineh, ieh nedunak nengeranik neneh dengan abud tuehneh.

⁷ Ui nenier neneh ngelaya' dumba ineh. Ieh pelaba gateh pad ieh nengeranik neneh, idi nemutul dueh unganeh ineh. Idi dumba ineh na metueh peh, idi ieh kinarung luun tana' idi ridu'. Idi seburur pana' nateh luk miak ngulun neneh.

⁸ Amék ineh amé' meluun medita' niat, iamo' kareb laludneh meluun rayeh idi unganeh neputul. Idi apat unga luk rayeh netemubu' ngelibal neneh, luk petulu ku apat lidung tana'.

⁹ Idi teh aceh unga luk isuut netemubu' nan sebuleng ratnan unga luk apat ineh. Ieh nengegala' laludneh pa kabing busat aco, idi pa busat aco, idi lelé macing Tana' luk Pijani' ineh.

¹⁰ Ieh amé' metueh pad ieh metueh ratnan baweh langit, ieh ineh gituen. Idi ieh nenala' sebuang gituen luun tana'. Idi ieh nengeradu' nedeh.

¹¹ Ieh nesitunga nan Raca' baweh surga pana'. Idi ieh nengagka' baré luk pekalai, idi sembayang bang Ruma' Allah pana' igka'neh.

¹² Sala' nengelibal baré luk pekalai ineh, idi teh sembayang luk matu tila'neh. Amung luk ruen unga ineh miak mangun.

¹³ Idi ui neninger seburur melaikat ngitun nan melaikat baken, kebalaneh, “Tuda' ioké luk nekali' Daniel bang luk sinierneh ineh mangun — ieh ineh sala' luk pelaba dat ngelibal baré luk pekalai, idi baweh surga idi Ruma' Allah ridu'?”

¹⁴ Idi kebalaneh, “Pangeh 2,300 malem idi pekak, Ruma' Allah miak uen ngedo'.”

Gabriel Mada Ilung Luk Sinier Daniel

¹⁵ Ui ini Daniel nutun nakap ilung luk sinierku ineh. Denak-denak inan luk kudeng ayu lemulun tuped pa kiungku.

¹⁶ Idi ui neninger aceh tang lemulun luk nawar rat déi' dipar Abpa' Ulai, kebalaneh, “O Gabriel, mada' neneh ratnan ilung luk sinierneh ineh.”

¹⁷ Idi Gabriel iné' tuped iringku, idi ui pelaba tot, pad ui neluka'. Kebala Gabriel negku, “O lemulun, do' iko kali' ilungneh. Luk siniermu ineh ngegala' ratnan luk kekiped.”

¹⁸ Uned ieh pegayam negku, idi ui nelepu. Ieh nengimet negku idi ieh nengiding negku,

¹⁹ kebalaneh, “Ui ngegala' kuanmu ratnan luk mangun ngaceku useh Allah. Luk siniermu ineh ratnan kekipedneh.

²⁰ “Dumba luk siniermu luk inan dueh unga ineh pinginud imet Midi idi Parsi.

²¹ Amék ineh imet Grika, idi unga luk rayeh luk arang matehneh, ieh ineh raca' Grika luk pun-pun.

²² Apat unga luk netemubu' kareb unga luk pun-pun ineh neputul, pinginud apat imet luk miak mangun ratnan pupu ineh, iamo' na ideh metueh mepad kudeng imet luk pun-pun ineh.

²³ “Kareb kekiped imet ineh malé macing, idi ideh pelaba dat, pad ideh na miak na kumin, idi aceh raca' luk dat luk naluk idi luk metueh niat miak ngimet.

²⁴ Ieh miak amé' metueh, iamo' baken ngaceku laludneh sebuleng. Ieh miak megéi' ngusag, idi amung luk ruenneh mangun. Ieh miak ngelaya' lemulun luk melalud, idi pupu Allah pana'.

²⁵ Ngaceku ieh mileh idi naluk, amung luk ruenneh miak mangun. Idi ieh pelaba dita' niat, idi denak-denak ieh ngaté mula' lemulun. Ieh miak situnga nan Raca' luk meluun rayeh, iamo' ieh miak pitayen baken ratnan lalud lemulun.

²⁶ Luk siniermu ineh ratnan baré pa malem idi pa pekak luk pangeh linio namu kali' rungen matu. Do' ngalum ineh, ngaceku mio teh luk siniermu ineh mangun.”

²⁷ Ui ini Daniel meberat niat, idi ui mét tuda'-tuda' aco. Pangeh ineh idi ui netumui idi nelemubed ngakem kuan raca'. Ui inan mula' terawé ratnan luk sinierku ineh, iamo' ui na kali' ilungneh.