DANIEL 7 - BALA LUK DO'

Luk Sinier Daniel Ratnan Apat Pung

¹ Bang lak luk pun-pun kareb imet Belsasar, raca' Babil, idi ui ini Daniel nenginupi idi nenier aceh luk nekali'ku kareb medacem. Idi ui nengayud nupi ineh, idi ini bala

² luk ratnan luk sinierku bang dacem ineh: Inan bui rat iapeh-iapeh luk nenganau' ribut déi' abpa rayeh.

³ Idi apat pung luk rayeh nelupung rat bang abpa' rayeh ineh, idi amungdeh na mepad.

⁴ Sebuleng mepad kudeng balang ayuneh, luk inan ilad mepad kudeng kanui. Kareb ui nenutong neneh, denak-denak iladneh nebubput. Idi pung ineh kiniding, pad ieh netuped mepad kudeng lemulun. Idi terawé lemulun biré kuanneh.

⁵ Idi ui nenier pung luk kedueh ineh. Idi ayuneh mepad kudeng beruang luk tuped kudeng lemulun. Idi inan teluh tulang sigarang bang tangneh, idi inan aceh tang luk nepebala neneh, “Kuman uang pung pad iko mebor.”

⁶ Kareb ui nutong teh, idi teh ui nekali' aceh pung luk baken. Ayuneh mepad kudeng kuir. Idi luun ketedneh inan apat ilad, luk mepad kudeng ilad suit. Idi teh inan apat uluhneh! Idi ieh inan lalud ngimet.

⁷ Kareb ui nenutong, ui nekali' pung luk keapat ineh. Ieh luk inan matot. Idi ieh pelaba dat, idi melalud. Ieh inan lipen belawan luk pelaba rayeh, idi ieh megéi' kuman, idi ieh ngeradu' luk amung-amung. Idi ayuneh baken ratnan amung pung ineh. Ieh inan pulu' unga,

⁸ idi kareb ui nenutong unga ineh, ui nekali' aceh unga luk isuut luk temubu' arang unga luk baken. Idi unga luk isuut ineh nemubput teluh unga luk mekara ineh. Idi ieh inan mateh lemulun idi inan tang luk megéi' pebala dengan medita' niat.

Luk Sinier Daniel Ratnan Luk Mulun Meruked

⁹ Kareb ui nenier, inan tuda'-tuda' kerusi raca' luk rireng. Idi Seburur luk mulun ruked-ruked tudo luun sebuleng kerusi ineh. AyungNeh mebuda' mepad kudeng salju, idi abpukNeh mepad kudeng buluh dumba luk do'. KerusiNeh mebudung ku apui, kudeng ineh teh rodaneh;

¹⁰ idi apui neremuat ratnan kerusi ineh mepad kudeng abpa' luk manud. Idi ribu-ribu lemulun ngedengan Neneh, idi teh meluun ula' ratnan ineh netuped pa kiungNeh. Idi ideh nengukab amung surat idi ideh nengimun besara'.

¹¹ Kareb ui nenutong, ui neninger unga luk isuut ineh pebala dengan medita' niat, idi pung luk keapat ineh pinaté, idi butungneh tila' bang apui idi neseb.

¹² Idi lalud pung luk baken ineh ilap rat nedeh, iamo' ideh simén mulun macing kareb luk litep kuandeh.

¹³ Bang luk sinierku kareb medacem ineh, idi ui nenier luk kudeng ayu lemulun. Idi Ieh amé'-amé' muneng bang laput, idi Ieh iné' matun Neneh luk mulun ruked-ruked, idi Ieh kinuyut amé' pa kiungNeh.

¹⁴ Idi Ieh nengalap lalud, ubur, idi rayeh raca', pad lemulun ratnan anid-anid bawang, pupu, idi luk ratnan manid-manid buri' miak maya' Neneh. LaludNeh meruked, idi imetNeh na kekiped.

Luk Sinier Daniel Ineh Ginala'

¹⁵ Luk sinierku ineh nengagap negku, pad ui mengagau.

¹⁶ Ui iné' mutuh seburur lun luk tuped su ineh ngegala' ratnan ineh. Idi ieh nemada' ilungneh negku.

¹⁷ Kebalaneh, “Apat pung luk rayeh, ieh ineh apat imet luk miak mangun bang tana' ini.

¹⁸ Idi pupu Allah luk Meluun Rayeh miak ngalap lalud raca' macing ruked-ruked.”

¹⁹ Pangeh ineh ui pian kali' ratnan pung luk keapat ineh, luk na mepad kudeng luk baken, iamo' ieh lun inan matot, idi inan lipen belawan idi lisun tekaling. Ieh nengagat idi nekuman idi nengeradu' amung-amung luk kikemneh.

²⁰ Idi teh ui pian kali' ilung ratnan pulu' unga ineh luk luun ulukneh, idi teh ratnan unga luk isuut ineh luk netemubu' muci idi luk nemubput teluh unga ineh. Ieh inan mateh idi tang luk megéi' pebala dengan medita' niat. Idi ayuneh inan matot tu-tu, meluun ratnan unga luk baken.

²¹ Kareb ui nenier, idi unga ineh nepebunu' nelun pupu Allah idi nengelaya' nedeh.

²² Idi Luk mulun ruked-ruked iné' mutut ukum luk méi' nelun pupu Allah luk Meluun Rayeh. Tarekneh pangeh nacing kareb pupu Allah miak ngalap lalud raca'.

²³ Ini ilung luk bida' negku: “Pung luk keapat, ieh ineh imet luk keapat luk miak mangun bang tana' ini, idi luk baken ratnan amung-amung imet. Ieh miak ngareg amung tana' ini, idi ngeradu' neneh.

²⁴ Idi pulu' unga, ieh ineh pulu' raca' luk miak tumui bang imet ineh. Pangeh ineh aceh raca' luk baken miak tumui. Idi ieh baken ratnan raca'-raca' luk atun ineh. Idi ieh miak nala' teluh raca'.

²⁵ Ieh miak ngedat Allah luk Meluun Rayeh idi ngedereh pupu Allah. Ieh nutun ngisu' ukum sembayangdeh idi acodeh luk rayeh. Idi pupu Allah pa liang imetneh kinio teluh lak setangal.

²⁶ Idi besara' ineh miak ngimun, idi ngagka' laludneh idi ngaté neneh.

²⁷ Lalud idi rayeh ratnan amung-amung imet luk bang tana' ini miak barén kuan pupu Allah luk Meluun Rayeh. Laluddeh luk ratnan raca' na kekipedneh idi amung lun luk ngimet bang tana' ini miak ngakem kuandeh idi maya' baladeh.”

²⁸ Idi ini kekiped balaneh. Ui ini Daniel pelaba tot pad kiungku mebudi, iamo' ui nenganug bala ini bang niatku.