DANIEL 6 - BALA LUK DO'

Daniel Bang Lubang Balang

¹ Idi Darius nemili' 120 pengulu luk miak ngimet aput-aput imetneh.

² Idi ieh nemili' ni Daniel dengan dueh burur lun baken mangun ku lun ngimet pa luun pengulu ineh idi teh ngedengan raca'.

³ Idi megala' kekamen Daniel meluun do' ratnan kekamen lun ngimet idi pengulu luk baken ineh. Ngaceku ieh pelaba ileh idi do' niat, idi Raca' Darius pian ngeletep neneh mangun ku lun rayeh aput imet raca'.

⁴ Idi lun ngimet idi pengulu luk baken nakap sala' Daniel bang kekamenneh. Iamo' na ideh kali' anun-anun sala' Daniel, ngaceku ieh mesiri idi na nganau' luk dat idi luk tekilu'.

⁵ Kebaladeh, “Na tau miak ngadu' ni Daniel ratnan kekamenneh. Kian, ratnan sembayangneh lek miak tau ngadu' neneh.”

⁶ Idi ideh iné' matun raca', kebaladeh, “O Raca' Darius, do' iko mipu ulun!

⁷ Amung kai luk ngakem kuanmu, ieh ineh lun ngimet, pengulu, lun luk pa liang pengulu, idi lun mileh ngerawé, idi do' raca' maré aceh ukum luk meberat. Kinio teluh ngepulu' aco, do' mebpeng lemulun na miak mutuh anun-anun luk ratnan allah idi lemulun pana', iamo' miak mutuh ratnan raca' mo' sebuleng. Idé-idé luk ngelaba ukum ini miak talan bang lubang balang.

⁸ Do' raca' nén ukum ini, pad ieh miak bén idi na miak uen ngisu' mepad kudeng amung ukum lun Midi idi lun Parsi.”

⁹ Idi Raca' Darius nenén ukum ineh.

¹⁰ Kareb Daniel nekali' idi ukum ineh pangeh pinutut, idi ieh nuli'. Idi déi' bang parung ruma'neh inan teluh tabuk luk petutup bawang Yerusalim. Idi déi' bang parung ruma'neh inan teluh tabuk luk petutup bawang Yerusalim. Idi ieh netekeradung munung tabuk luk mukab ineh idi nesembayang pa kiung Allah teluh kua' seaco mepad kudeng luk pekalai.

¹¹ Kareb bunu' Daniel nekali' neneh nesembayang inan Allah,

¹² idi petacu ideh iné' matun raca' pian ngadu' ni Daniel. Kebaladeh, “O raca', iko nenén aceh ukum luk mebpeng na miak mutuh anun-anun ratnan allah idi lemulun pana', kinio teluh ngepulu' aco , iamo' miak mutuh ratnan raca' sebuleng mo'. Idi lemulun luk ngelaba ukum ineh miak talan bang lubang balang.” “Mo,” kebala raca', “Aceh ukum luk meberat mepad kudeng ukum lun Midi idi lun Parsi, luk na miak uen ngisu'.”

¹³ Idi kebaladeh ni raca', “Seburur lun luk tiban rat Yahuda, ieh ineh Daniel, na ngerayeh raca', idi ieh ngelaba ukummu. Ieh sembayang teluh kua' seaco.”

¹⁴ Kareb raca' nekali' bala ini, idi ieh mesusa' niat pad ieh nenakap dalan sikal muit ni Daniel. Idi ieh nemutuh ngerawé macing aco macep.

¹⁵ Idi lemulun ineh nacing sekua' teh idi kebaladeh ni raca', “O raca', iko kali', maya' ukum lun Midi idi lun Parsi, ukum raca' na miak uen ngisu'.”

¹⁶ Idi raca' nengecuk nala' ni Daniel bang lubang balang. Idi kebala raca' ni Daniel, “Do' Allah luk inanmu merapet tu-tu ngulun namu.”

¹⁷ Idi ideh nenguit aceh batu ku kakeb lubang ineh. Idi raca' nenganau' aceh etuneh idi etu lun rayehneh luun batu ineh, pad Daniel na miak puatin.

¹⁸ Idi raca' nuli'. Iamo' na ieh nekuman idi nemarot mepad kudeng luk pekalai. Idi dacem sineh na tupu ieh rudap.

¹⁹ Idi kareb aco masat, raca' netumui idi petacu iné' matun lubang balang ineh.

²⁰ Kareb ieh muneng, idi ieh nengitang ngaceku dat niatneh, “O Daniel, demulun Allah luk mulun! Miakké Allah luk inanmu merapet ngulun namu ratnan balang ineh?”

²¹ Idi kebala Daniel, “Do' raca' mipu ulun!

²² Allah nengecuk melaikatneh neniep tang balang ineh, pad ideh na ngaté negku. Ieh nenganau' kudeng ineh ngaceku Ieh kali' negku na mesala', idi ngaceku ui na mesala' pa kiungmu. O raca'.”

²³ Idi raca' pelaba awang niat, idi ieh nengecuk nelun dukenneh nenginat ni Daniel rat bang lubang balang ineh. Idi ideh nenginat neneh, idi ideh kali' neneh na nurat, ngaceku ieh merapet inan Allah.

²⁴ Idi raca' nengecuk nala' nelun luk nengadu ni Daniel bang lubang balang, perapu dengan awandeh idi anakdeh. Kareb nateh ideh nacing uned lubang ineh, idi balang ineh nengakem nedeh idi nemutul amung tulangdeh.

²⁵ Idi Raca' Darius nengayud aceh surat kuan amung-amung lemulun ratnan anid-anid bawang, pupu, idi luk ratnan manid-manid buri' bang tana' ini. Kebalaneh: “Tabi'!

²⁶ Ui ngecuk amung-amung lemulun luk bang aput imetku matot idi ngerayeh Allah Daniel. “Ieh ineh Allah luk mulun, idi luk ngimet macing ruked-ruked. ImetNeh na miak uen ngusag idi laludNeh na tu-tu miak uen ngagka'.

²⁷ Ieh ngulun idi muit; Ieh nganau' kekamen luk melalud, idi tanu' luk inan mawa, do' bang Surga idi bang tana' ini pana'. Ieh nengulun ni Daniel ratnan lalud balang.”

²⁸ Idi Daniel uen ngeperuan kareb imet Darius idi kareb imet Kores, lun Parsi pana'.