DANIEL 5 - BALA LUK DO'

Irau Belsasar

¹ Kareb imet Belsasar, idi ieh nenawar meribu lun rayeh amé' ku irauneh luk rayeh. Idi ideh nengirup abpa' anggur.

² Kareb ideh ngirup idi Belsasar nengecuk nelun dukenneh nguit sangkir idi bigan amas idi pirak luk tiban tamanneh Nebukadnesar rat bang Ruma' Allah déi' Yerusalim, pad raca', lun rayehneh, awanneh, idi apidneh miak ngirup makai sangkir idi bigan ineh.

³ Idi petacu ideh nenguit sangkir idi bigan amas ineh, idi amung-amungdeh nengirup.

⁴ Ideh nengirup abpa' anggur idi nengubur akang luk inau' ratnan amas, pirak, tekaling, belawan, kayuh, idi batu teh.

⁵ Idi denak-denak, aceh ticu' lemulun nesilagan, idi nengayud luun alad batu ruma' raca', su luk inan lapung luk merasat. Idi raca' ineh nenier ticu' ineh ngayud.

⁶ Idi kiungneh nisu' mebudi idi ieh megegker niat.

⁷ Idi ieh nengitang mutuh nelun nguit lun luk mangun, lun luk nawar ada', idi lun luk mileh kali' gituen. Idi kareb ideh nacing, kebala raca' nedeh, “Idé-idé luk mileh maca' ayud ini idi mada' ilungneh negku, idi ieh uen ngayung ku kuyu' boyor luk sia' merirem, idi ratai amas miak ruen ku banéneh, idi ieh miak ngalap ngadan luk keteluh bang imet bawang ini.”

⁸ Idi amung lun luk mileh luk ngedengan raca' nacing, iamo' seburur pana' nateh luk mileh maca' ayud ineh idi mada' ilungneh nan raca'.

⁹ Ngaceku ineh, Raca' Belsasar pelaba susa' niat idi kiungneh pelaba budi idi lun rayehneh pana' na kali' anun luk miak ruendeh.

¹⁰ Idi tinan raca' neninger ria' raca' idi lun rayehneh ineh, idi ieh iné' sikang. Kebalaneh, “Do' raca' mipu ulun! Ngudeh iko megagau idi mebudi kiung?

¹¹ Inan seburur lemulun bang imetmu luk inan Roh Allah luk Meligan. Kareb tamanmu raca', lemulun ini luk do' kali', idi ilehneh mepad kudeng ileh allah. Idi tamanmu Raca' Nebukadnesar nengeletep neneh ku lun rayeh lun luk mileh nier, lun luk mileh mangun, lun luk mileh nawar ada', idi lun luk mileh kali' gituen.

¹² Ieh luk pelaba ileh idi do' kali' ratnan ilung nupi, idi ngelio luk medalem idi luk inalum. Do' neteng ni Daniel (luk titen raca' Beltesasar) idi ngecuk neneh mada' ilung amung-amung ini.”

Daniel Mada' Ilung Luk Inayud Ineh

¹³ Idi petacu ideh nenguit ni Daniel amé' pa kiung raca'. Idi kebala raca' neneh, “Matuké iko ini Daniel, seburur lun Yahudi luk tiban tamanku luk raca' rat bawang Yahuda.

¹⁴ Ui neninger idi Roh Allah idi bang namu, pad iko mileh idi do' kali'.

¹⁵ Lun luk mileh idi lun luk mangun icuk maca' ayud ini idi mada' ilungneh negku, iamo' na ideh kali' ilungneh.

¹⁶ Idi ui neninger idi iko luk kali' luk medalem idi luk inalum. Kudeng iko mileh maca' ayud ini idi mada' ilungneh negku, idi iko uen ngayung ku kuyu' boyor luk sia' merirem, idi ratai amas miak ruen ku banému, idi iko miak ngalap ngadan luk keteluh bang imet bawang ini.”

¹⁷ Idi kebala Daniel, “Na ui pian ku barému ineh. Do' maré ineh kuan dulun. Iamo' ui miak maca' luk inayud ineh idi mada' ilungneh kuan raca'.

¹⁸ “Allah luk Meluun Rayeh nengeletep tamanmu Nebukadnesar mangun ku raca' luk rayeh. Idi Ieh nengedita' neneh idi nemaré ubur kuanneh.

¹⁹ Ieh pelaba rayeh pad lemulun ratnan anid-anid bawang, pupu, idi luk ratnan manid-manid buri' matot neneh idi megegker pa kiungneh. Idi kudeng ieh pian ngaté seburur lemulun, idi ieh nganau' luk kudeng ineh. Kudeng ieh pian ngulun seburur lemulun idi ieh nganau' luk kudeng ineh. Ieh nengubur idi nengigu' idé-idé luk pianneh.

²⁰ Iamo' ngaceku ieh iuk medita' niat, idi na méi' nelun, idi ieh tila' ratnan kerusi raca', pad ieh na miak buren.

²¹ Ieh inusu rat arang lemulun, idi terawéneh nisu' mepad kudeng terawé pung. Ieh tudo dengan keladai luk meliput, idi ieh nekuman uduh mepad kudeng sapi', idi ieh rudap déi' liang, idi ipup nebpeh luun bururneh. Kekipedneh ieh kali' idi Allah luk Meluun Rayeh luk kuan amung imet luk bang tana' ini, idi Ieh ngikit idé-idé luk pianNeh mangun ku raca'.

²² “Idi iko ini luk anakneh na nengebeneh bururmu, sagan pana' iko pangeh nekali' amung-amung ini.

²³ Iko sikal metueh ratnan Tuhan Surga pad iko nenguit sangkir idi bigan luk tiban rat bang Ruma' Allah. Iko, lun rayehmu, awanmu idi apidmu nengirup abpa' anggur luk bang sangkir idi bigan ineh. Idi muyuh nengubur akang luk inau' ratnan amas, pirak, tekaling, belawan, kayuh, idi batu, ieh ineh allah luk na miak nier, ninger, idi kali' anun-anun. Iamo' na muyuh nengubur Allah luk ngimet ulun muyuh idi amung-amung luk ruen muyuh.

²⁴ Ini punneh Allah nengecuk ticu' ineh ngayud bala ini.

²⁵ “Ini luk inayud; ‘Ngiap, ngiap, nimang, mabpat.’

²⁶ Idi ini ilungneh: ngiap, Allah pangeh nengiap amung-amung aco imetmu idi nengagka' namu;

²⁷ nimang, iko pangeh tinimang idi iko pelaba ran;

²⁸ mabpat, imetmu pangeh bibpat idi biré nelun Midi idi Parsi.”

²⁹ Idi petacu Belsasar nengecuk nelun dukenneh ngayung ni Daniel ku kuyu' boyor luk sia' merirem idi ratai amas inau' ku banéneh, idi Belsasar nemaré neneh ngadan luk keteluh bang imetneh.

³⁰ Idi dacem ineh Belsasar, raca' Babil ineh pinaté.

³¹ Idi Darius, lun Midi mangun ku raca'. (Idi ulun Darius kareb ineh anem ngepulu' dueh lak.)