DANIEL 4 - BALA LUK DO'

Nupi Nebukadnesar Luk Kedueh

¹ Raca' Nebukadnesar nemaré surat ini kuan lemulun bang anid-anid bawang, idi ratnan manid-manid pupu, idi buri' bang tana' ini: “Tabi'!

² Surat ini mada' nemuyuh ratnan kekamen luk melalud idi luk inan mawa luk linio Allah luk Meluun Rayeh kuanku.

³ “Kudeng apeh rayeh kekamen Allah luk inan mawa luk linio kuan tau! Pelaba lalud amung-amung tanu' luk inau'Neh! Allah ineh raca' luk ngimet macing ruked-ruked.

⁴ “Ui ini Nebukadnesar tudo dengan na anun-anun susa' bang ruma'ku, idi ui mawang niat ngaceku ui pelaba do'.

⁵ Iamo' ui inan aceh nupi luk ngatot negku, idi ui nekali' luk inan matot ineh kareb ui rudap.

⁶ Idi ui nengecuk nelun nguit amung-amung lun mileh luk déi' Babil, pad ideh miak mada' ilung nupi ineh negku.

⁷ Idi ideh nenguit amung lun luk mileh nier, lun luk mangun, lun luk nawar ada', idi lun luk mileh kali' gituen. Ui nemada' nupiku nedeh, iamo' na ideh mileh mada' ilungneh negku.

⁸ Pangeh ineh Daniel iné' negku (ieh ineh luk titen Beltesasar maya' ngadan allahku.) Idi Roh Allah luk Meligan idi bang neneh. Ngaceku ineh ui nemada' nupiku neneh.

⁹ Kebalaku neneh: O Beltesasar, luk lun rayeh amung lun luk mileh nier, ui kali' Roh Allah luk Meligan idi bang namu, idi iko kali' amung-amung luk inalum. Ini nupiku. Mada ilungneh negku.

¹⁰ “Kareb ui rudap idi ui nekali' aceh kayuh luk pelaba dita' uned tana' ini.

¹¹ Idi kayuh ineh iuk-iuk medita' pad ieh macing déi' langit idi miak siren lemulun aput-aput tana'.

¹² Idi donneh pelaba do' taga, idi bua'neh pelaba ula', pad miak kenen amung luk mulun bang tana' ini. Pung luk meliput tudo ngato erurdeh su lungung kayuh ineh. Suit-suit nenganau' arardeh nan angatneh. Idi amung luk mulun nekuman bua' ineh.

¹³ “Kareb ui uned ngerawé luk sinierku ineh, idi ui nekali' aceh melaikat luk megéi' matar netemurun rat surga.

¹⁴ Idi ieh nengitang, kebalaneh, ‘Do' nebpeng kayuh ineh, nutu' angatneh, idi nala' donneh idi bua'neh. Ngusu pung rat su ineh idi suit luk nan angatneh.

¹⁵ Iamo' necan tuedneh bang tana', idi ngelilid neneh ku belawan idi tekaling. Idi nima' neneh su ineh dengan uduh. “ ‘Nima' ipup mebpeh luun lemulun ini, idi nima' neneh tudo dengan pung idi tibu-tibu.

¹⁶ Idi bang tudu' lak kinioneh ieh miak ngerawé kudeng pung mo', baken kudeng terawé lemulun.

¹⁷ Ini luk pinutut melaikat-melaikat luk megéi' matar. Do' ngegala' kuan lemulun luk aput-aput tana' ratnan Allah luk Meluun Rayeh luk melalud ratnan amung-amung imet lemulun luk bang tana' ini. Ieh miak ngikit idé-idé luk pianNeh mangun ku raca' — sagan pana' ieh lemulun luk meluun isuut.’

¹⁸ “Ini nupiku,” kebala raca' Nebukadnesar, “Nekini, Beltesasar, do' mada' ilungneh negku. Lun mileh luk ngedengan negku na miak mada' ilungneh negku, iamo' iko luk miak mada' negku, ngaceku Roh Allah luk Meligan idi bang namu.”

Daniel Mada' Ilung Nupi Ineh

¹⁹ Idi Daniel (luk titen Beltesasar) pelaba susa' niat, pad na luk belénneh. Idi kebala raca' neneh, “O Beltesasar, aleg iko dat niat ngaceku ilung nupiku ini.” Kebala Beltesasar, “Meluun do', O raca', kudeng nupimu ineh uen ngacing kuan bunu'mu.

²⁰ Kayuh luk medita' idi metueh macing déi' langit idi miak siren amung lemulun aput-aput tana' ini.

²¹ Idi donneh pelaba do' taga, idi bua'neh pelaba ula' pad miak kenen amung luk mulun bang tana' ini. Pung luk meliput tudo su lungungneh, idi suit-suit nenganau' arardeh nan angatneh.

²² “O raca', iko ini luk kayuh ineh. Iko ini medita' idi metueh. Iko iuk amé' rayeh pad iko macing déi' langit, idi laludmu maput aput tana'.

²³ Idi kareb iko nenier, seburur melaikat netemurun rat surga, kebalaneh, ‘Nebpeng kayuh ineh idi nala' neneh, iamo' necan tuedneh ineh bang tana', idi ngelilid neneh ku belawan idi tekaling, idi necan neneh su ineh dengan uduh. Nima' ipup mebpeh luunneh, idi necan neneh su ineh dengan pung, kinio tudu' lak.’

²⁴ “O raca', ini ilung nupimu. Kebala Allah luk Meluun Rayeh: Ini luk miak mangun kuanmu.

²⁵ Iko miak uen ngusu rat arang lemulun, idi iko miak tudo dengan pung luk meliput. Idi iko miak kuman uduh mepad kudeng sapi', idi rudap déi' liang, idi ipup miak mebpeh luunmu kinio tudu' lak. Pangeh ineh iko miak kali' Allah luk Meluun rayeh luk kuan amung imet lemulun bang tana' ini, idi Ieh miak ngikit idé-idé luk pianNeh mangun ku raca'.

²⁶ Melaikat ineh nengecuk necan tued ineh bang tana'. Ilungneh iko miak mangun ku raca' baruh teh, kareb iko kali' idi Allah luk ngimet amung tana' ini.

²⁷ Ngaceku ineh, O raca', do' iko maya' bada'ku. Ugka' nganau' sala', idi nganau' luk matu; méi' kuan lun masi', pad iko uren ratnan amung-amung dat luk pangeh inau'mu, idi iko miak uen ngeperuan peh.”

²⁸ Amung-amung ini mangun kuan Raca' Nebukadnesar.

²⁹ Pangeh pulu' dueh bulan kareb ieh nalan bang kabun luk luun apo ruma' raca; déi' Babil,

³⁰ idi kebalaneh, “Siruh kudeng apeh rayeh bawang Babil! Ui nemudut ineh mangun ku bawangku luk rayeh, pad ui ngegala' lalud idi tuehku, rayeh idi uburku.”

³¹ Kareb uned ieh pebala, idi inan tang rat déi' langit, “O Raca' Nebukadnesar, ninger balaKu. Nekini imetmu pangeh ilap rat namu.

³² Iko miak uen ngusu rat arang lemulun, idi iko miak tudo dengan pung luk meliput. Iko miak kuman uduh mepad kudeng sapi' kinio tudu' lak. Idi pangeh ineh iko miak kali' idi Allah luk Meluun Rayeh luk kuan amung imet lemulun luk bang tana' ini. Idi Ieh miak ngikit idé-idé luk pianNeh mangun ku raca'.”

³³ Idi petacu bala ineh icing. Idi Nebukadnesar inusu rat arang lemulun, idi ieh nekuman uduh mepad kudeng sapi'. Ipup nebpeh luun bururneh. Idi abpukneh amé' mekadang mepad kudeng buluh kanui idi lisunneh pana' mekadang mepad kudeng lisun suit.

Nebukadnesar Ngubur Allah

³⁴ “Idi abud tudu' lak ineh, Ui ini Nebukadnesar netengook nier déi' langit, idi petacu terawéku nisu'. Idi ui nengubur Allah luk Meluun Rayeh idi nengubur Neneh idi nengerayeh Neneh luk mulun macing ruked-ruked. “Ieh miak ngimet macing ruked-ruked.

³⁵ Kudeng lemulun bang tana' ini uen maad dengan Allah, ideh na anun-anun. Amung melaikat luk déi' Surga idi lemulun bang tana' ini pa liang imetNeh. Seburur pana' na miak ngeluun luk pianNeh, idi ngitun Neneh ratnan luk ruenNeh.

³⁶ “Kareb terawéku do', idi amung ubur imetku, idi amung rayeh, idi laludku pangeh biré negku baruh teh. Amung lun mileh idi lun rayehku nengalap negku lemubed teh, idi ui pangeh litep bang kekamen raca' baruh teh, dengan ubur luk meluun rayeh ratnan luk atun.

³⁷ “Idi nekini, ui ini Nebukadnesar ngubur idi ngerayeh Raca' Surga. Amung-amung luk ruenNeh matu. Ieh megéi' nganau' luk mesiri, idi Ieh ngebeneh lemulun luk medita' niat.”