DANIEL 2 - BALA LUK DO'

Nupi Nebukadnesar

¹ Bang lak luk kedueh kareb imet Nebukadnesar idi ieh nenginupi. Idi ieh megagau ngerawé nupineh pad ieh na rudap.

² Idi ieh neneteng nelun luk mileh nier, lun luk mangun, lun luk melalud ratnan gimet, idi lun luk nawar ada', pad ideh ngelio nupi ineh kuanneh. Kareb ideh nacing idi tuped pa kiung raca',

³ idi kebalaneh nedeh, “Ui inan nupi luk ngagau negku. Ui pian kali' ratnan ineh.”

⁴ Idi ideh nengor bala raca' bang buri' Arami, kebaladeh, “Do' raca' mipu ulun! Mada' nupimu nekai, idi kai miak mada' ilungneh.”

⁵ Idi kebala raca' nelun luk nawar ada', “Kudeng muyuh na miak mada' nupiku idi ilungneh, na miak na ui ngecuk nelun natek nemuyuh idi ngusag ruma' muyuh.

⁶ Iamo' kudeng muyuh miak mada' nupiku idi ilungneh, ui miak maré kuan muyuh tuda'-tuda' baré idi ngadan luk rayeh. Ngaceku ineh do' mada' nupiku negku idi ilungneh.”

⁷ Idi kebaladeh inan raca', “Kudeng raca' mada' nupimu nekai, idi kai miak mada' ilungneh.”

⁸ Idi kebala raca' nedeh, “Mo, muyuh pian ngiuk balaku, ngaceku muyuh kali' luk pangeh pinututku na miak misu'.

⁹ Kudeng muyuh na mada' nupiku negku, idi amung-amung muyuh miak kumin. Muyuh pangeh nepegayam pian naluk negku, pad terawéku misu'. Mada' nupiku negku, pad ui kali' idi muyuh miak mada' ilungneh.”

¹⁰ Idi kebala lun luk nawar ada' ineh, “Seburur pana' bang aput-aput tana' ini nateh luk miak mada' luk initun raca'. Seburur raca' pana' luk meluun rayeh idi melalud nateh luk nengitun luk kudeng ineh inan lun luk mileh nier, lun luk melalud ratnan gimet, idi lun luk nawar ada'.

¹¹ Luk initun raca' ineh pelaba ikat, pad allah-allah mo' sebuleng miak kali' ilungneh, iamo' na ideh tudo arang lemulun.”

¹² Idi raca' ineh petacu megateh niat, pad ieh nengecuk ngaté amung-amung lun luk mileh luk ngedengan raca' déi' Babil.

¹³ Idi amung-amungdeh mekaneh ukum maté dengan Daniel idi lun rurumneh pana'.

Allah Ngelio Ilung Nupi Ineh Kuan Daniel

¹⁴ Idi Daniel iné' ni Ariuk dengan bala luk do' idi mileh. Idi Ariuk ineh lun rayeh lun luk nginita raca' luk pangeh icuk ngacing ukum ineh.

¹⁵ Idi kebala Daniel ni Ariuk, “Ngudehké raca' nemutut aceh ukum luk meberat kudeng ineh?” Idi Ariuk nemada' ni Daniel ratnan luk pangeh nangun ineh.

¹⁶ Idi Daniel petacu iné' mutuh raca' ngiuk ukum ineh, pad ieh miak mada' raca' ratnan ilung nupi ineh.

¹⁷ Idi Daniel nuli' idi nemada' nelun rurumneh, Hanania, Misail, idi Asaria ratnan luk pangeh nangun.

¹⁸ Ieh nengecuk nedeh sembayang mutuh Allah Surga méi' nedeh idi mada' nedeh ratnan luk inalum pad ideh na pitayen dengan lun baken luk mileh déi' Babil.

¹⁹ Idi malem ineh pana' luk inalum ineh linio kuan Daniel bang aceh luk sinierneh, idi ieh nengubur Allah Surga: Kebalaneh,

²⁰ “Do' ngubur ngadan Allah macing ruked-ruked, ngaceku Ieh luk mileh idi melalud.

²¹ Ieh luk ngimet amung kareb. Ieh luk mudut idi ngagka' raca'-raca'; Ieh maré ileh idi do' kali' kuan lemulun.

²² Ieh ngelio luk medalem idi luk inalum, idi Ieh kali' luk inapung bang dacem; idi acang luk pekelibut Neneh.

²³ Ui ngubur idi ngerayeh Namu. O Allah tepunku. Iko nemaré ileh idi tueh negku; Iko nengua' sembayangku idi nemada' nekai ratnan luk belén ni raca'.”

Daniel Mada' Nupi Idi Ilungneh Kuan Raca'

²⁴ Idi Daniel iné' ni Ariuk luk icuk raca' ngaté nelun mileh luk déi' Babil, kelabaneh, “Aleg ngaté nedeh. Do' nguit negku amé' matun raca', idi ui miak mada' neneh ratnan ilung nupineh ineh.”

²⁵ Idi Ariuk nenguit ni Daniel dengan mesaget amé matun raca' ineh. Idi kebalaneh ni raca', “Ui pangeh nekali' seburur lun luk tiban rat Yahuda luk miak mada' kuan raca' ratnan ilung nupimu ineh.”

²⁶ Idi kebala raca' ni Daniel (luk titen Beltesasar), “Miakké iko mada' nupiku idi ilungneh negku?”

²⁷ Idi kebala Daniel, “O raca', seburur lun luk nawar ada', seburur lun luk mangun, seburur lun luk mileh nier, idi seburur lun luk mileh kali' gituen nateh luk miak mada' luk kudeng ineh.

²⁸ Iamo' inan aceh Allah déi' Surga luk mileh ngelio luk inalum. Ieh pangeh nemada' namu, O Raca' Nebukadnesar, ratnan luk miak mangun muci. Idi ini nupi ineh idi luk siniermu karebmu rudap.

²⁹ “O raca', kareb iko rudap, iko nenginupi ratnan luk mangun muci, idi Allah luk ngelio luk inalum nemada' namu ratnan luk miak mangun ineh.

³⁰ Idi luk inalum ineh pangeh linio kuanku, baken ngaceku ui luk meluun ileh rat nelun baken, iamo' pad iko, O raca', miak kali' ilung nupimu, idi terawému pana' luk nacing namu.

³¹ “O raca', bang luk siniermu ineh, iko nenier aceh ayu lemulun luk rayeh luk netuped pa kiungmu, luk merasat idi luk mesilo, idi luk inan matot.

³² Uluhneh ineh ratnan amas luk do'. Ruuk idi langenneh inau' ratnan pirak; awa'neh idi teladingneh inau' ratnan tekaling.

³³ Kukudneh inau' ratnan belawan, idi daparneh inau' ratnan belawan idi tana' kuden.

³⁴ Kareb iko nenier neneh, idi aceh batu luk rayeh neturi' rat luun pegkung dengan na lemulun nengakem neneh, idi nekaneh dapar luk kudeng ayu lemulun ineh, luk ratnan belawan idi tana' kuden, pad dueh dapar ineh nekurar.

³⁵ Petacu belawan, tana' kuden, tekaling, pirak, idi amas ineh nisu' ku kipuh luk luun apin su luk inan rumik kareb merikan. Idi amung ineh nepalid ku bui pad na luk ketecan. Iamo' batu ineh netemubu' mangun ku aceh pegkung luk mapen aput tana'.

³⁶ “Ieh ineh nupimu. Nekini ui miak mada' ilungneh namu.

³⁷ O raca', iko luk meluun rayeh rat arang amung-amung raca'. Allah Surga pangeh nengeletep namu mangun ku raca', idi Ieh nemaré namu lalud, tueh, idi ubur pana'.

³⁸ Ieh nengeletep namu mangun ku raca' aput tana'. Idi iko raca' amung pung idi suit pana'. Iko ineh uluh luk ratnan amas.

³⁹ Muci rat namu inan aceh imet luk baken, iamo' na ieh mepad rayeh kudeng imetmu. Idi muci ratnan ineh inan aceh imet luk keteluh luk ratnan tekaling, luk miak ngimet aput tana'.

⁴⁰ Idi muci ratnan ineh inan aceh imet luk keapat, luk mepad tueh kudeng belawan. Mepad kudeng belawan luk mila' idi ngareg luk amung-amung, kudeng ineh teh imet ineh miak mila' idi ngareg amung-amung imet luk atun rat neneh.

⁴¹ Iko nekali' dapar idi bua' kukud ineh puar-puar tana' kuden idi belawan. Ilungneh imet ineh miak mangun ku dueh babpat. Imet ineh inan sesuut tueh ratnan belawan ineh, ngaceku inan belawan puar-puar dengan tana' kuden ineh.

⁴² Ilungneh bua' kukud luk ratnan belawan puar-puar dengan tana' kuden, ieh ineh imet ineh kali' rungen metueh, iamo' malé mekurar.

⁴³ Idi teh iko nekali' belawan ineh puar-puar dengan tana' kuden. Idi raca'-raca' imet ineh miak nutun nutum tetek ruma'deh ratnan aweh seburur dengan seburur, iamo' na miak, mepad kudeng belawan luk na miak puar dengan tana' kuden.

⁴⁴ Idi kareb raca'-raca' ineh ngimet, Raca' Surga miak ngeletep aceh imet luk na kekipedneh. Imet ineh na miak uen ngelaya', iamo' ieh miak ngusag amung-amung imet luk baken. Idi ieh miak meraben macing ruked-ruked.

⁴⁵ Iko nekali' aceh batu luk neturi' ratnan pegkung dengan na luk nengakem neneh. Idi batu ineh nekaneh luun luk kudeng ayu lemulun ineh luk ratnan belawan, tekaling, tana' kuden, pirak, idi amas. O raca', Allah luk rayeh mada' namu ratnan luk miak mangun muci. Ui pangeh nemada' namu ratnan nupimu idi ilungneh luk matu.”

Raca' Nemaré Tabpar Pingua' Do' Daniel

⁴⁶ Idi Raca' Nebukadnesar netekeradung pa kiung Daniel, idi ieh nengecuk nelun ngeret pung idi maré baré kuanneh.

⁴⁷ Idi kebala raca', “Allahmu ineh meluun rayeh ratnan amung-amung allah, idi Ieh luk Tuhan amung-amung raca', idi luk ngelio luk inalum, ngaceku iko luk miak ngelio luk inalum ineh.”

⁴⁸ Idi ieh nemaré kuan Daniel aceh kekamen luk rayeh. Idi teh ieh nemaré neneh tuda'-tuda' baré luk pelaba do'. Idi ieh nengecuk ni Daniel ngimet bawang Babil, idi ieh nenganau' neneh mangun ku lun rayeh amung-amung lun mileh luk déi' Babil ineh.

⁴⁹ Idi maya' putuh Daniel, Raca' Nebukadnesar nengeletep Sadrak, Misak, idi Abednego ngimet amung kekamen déi' bawang Babil. Idi Daniel sinima' tudo déi' ruma' raca'.