DANIEL 12 - BALA LUK DO'

Kareb Luk Kekiped

¹ “Kareb ineh, Mikail, melaikat luk rayeh ineh luk matar pupumu miak silagan. Idi kareb ineh inan mula' susa', luk meluun dat ratnan luk nekali' pupu ineh rat pun-pun. Kareb ineh amung pupumu, luk kuan ngadan inayud bang Surat Allah miak uen ngulun.

² Mula' lemulun luk pangeh naré miak tumui baruh. Sebuangdeh miak mulun ruked-ruked, idi sebuangdeh miak ngalap igu' luk meruked.

³ Lun luk mileh miak merasat mepad kudeng acang langit. Idi lun nemada' nelun baken nganau' luk matu, miak merasat mepad kudeng gituen macing ruked-ruked.

⁴ “Idi nekini, O Daniel, do' ngakeb surat ineh idi nganau' aceh etu luunneh, pad macing kareb luk kekiped. Idi kareb nateh kekipedneh mula' lemulun pian ngelio ratnan ilung luk mangun ineh.”

⁵ Idi ui ini Daniel nekali' dueh burur lun baken luk tuped petutup abpa' ineh.

⁶ Idi seburur nepebala nan lemulun luk ngayung ku kibung luk do', luk tuped pa dayeh sesuut, “Tuda' ioké pad macing kekiped amung luk inan mawa ini?”

⁷ Idi lemulun luk ngayung ku kibung luk do' ineh nengiding dueh ticu'neh pa langit, idi nepebulung dengan ngadan Allah luk Meruked. Idi ui neninger balaneh, “Pangeh teluh lak setangal, kareb dereh pupu Allah ugka', amung luk inan mawa ini pangeh nangun.”

⁸ Ui neninger balaneh ineh, iamo' na kali' ilungneh. Idi ui nengitun, kebalaku, “O tuan, kudeng apehké kekipedneh?”

⁹ Idi kebalaneh, “Amé iko Daniel, ngaceku amung bala ini uen ngalum macing kareb luk kekiped.

¹⁰ Mula' lemulun miak uen ngeligan. Lemulun luk dat na miak kali' ilungneh, iamo' ideh miak nganau' luk dat mo'. Lemulun luk mileh miak kali' ilungneh.

¹¹ “Rat kareb ideh nugka' maré baré luk pekalai, ieh ineh rat kareb Akang luk Nguyo, inan 1,290 aco.

¹² Samal kuan lemulun luk lutep pad macing 1,335 aco ineh mabud.

¹³ “O Daniel, do' iko lutep macing kareb luk kekiped. Idi iko miak maté, iamo' iko miak tumui idi ngalap tabparmu kareb aco luk kekiped ineh.”