DANIEL 11 - BALA LUK DO'

¹ “Mikail ineh luk ngedengan negku idi luk matar negku.

² Idi nekini Ui pian mada' namu ratnan luk matu.” Kebala Melaikat ineh, “Teluh raca' teh miak ngimet Parsi, idi pangeh ineh luk keapat, ieh ineh raca' luk meluun ula' binaweh ratnan raca' luk baken ineh. Idi kareb ieh pelaba tueh dengan pelaba ula' binaweh, idi ieh pian metueh ratnan imet Grika.

Imet Masir Idi Siria

³ “Idi seburur raca' luk mesangit miak macing. Ieh mangun ku raca' aceh imet luk pelaba rayeh, idi ieh nganau' anun-anun luk pianneh.

⁴ Iamo' kareb ieh pelaba tueh, imetneh miak uen mabpat apat. Idi inulneh na miak ngimet. Luk baken miak ngelibal neneh, iamo' tuehdeh na mepad.

⁵ “Idi raca' Masir ineh metueh. Iamo' seburur lun rayeh bawehneh miak meluun tueh pad ieh mangun ku raca' aceh imet luk meluun rayeh.

⁶ Pangeh tuda'-tuda' lak, raca' Masir miak maré anakneh luk decur kuan raca' Siria ku awanneh, pad nganau' aceh rurum arang didueh. Iamo' rurum ineh na mio, idi decur ineh, demulunneh, anakneh, idi awanneh miak pitayen.

⁷ Pangeh ineh seburur pupu decur ineh miak munu' baweh raca' Siria, idi semuet bang libung luk meraben idi ngelaya' nedeh.

⁸ Ieh miak naban amung akangdeh perapu dengan binaweh amas idi pirakdeh. Idi amung ineh miak itendeh amé' Masir. Pangeh tuda'-tuda' lak kareb na inan susa'

⁹ idi raca' Siria miak amé' munu' bawang Masir, iamo' ieh uendeh ngusu.

¹⁰ “Anak-anak raca' Siria miak temina' amé' pebunu' dengan aceh baweh luk rayeh. Idi seburur rat arangdeh miak metueh mepad kudeng ereb, pad ieh amé' ngerieng aceh libung bunu'.

¹¹ Dengan gatehneh raca' Masir miak amé' munu' raca' Siria pad ieh ngalap bawehneh luk pelaba rayeh.

¹² Ieh miak medita' niat ngaceku tuehneh idi ngaceku ula' lemulun luk pinaténeh. Iamo' tuehneh ineh na mio.

¹³ “Raca' Siria miak lemubed idi ngamung aceh baweh luk meluun rayeh ratnan luk atun di. Bang kareb luk petulu ieh miak lemubed dengan aceh baweh luk rayeh idi luk netemina' do'-do'.

¹⁴ Idi mula' lemulun sikal metueh ratnan raca' Masir. Idi tuda'-tuda' burur lemulun luk mesangit ratnan pupu Daniel sebuleng sikal metueh ngaceku aceh luk sinierdeh, iamo' ideh miak uen ngelaya'.

¹⁵ Idi raca' Siria miak ngerieng aceh bawang luk linibung pad ieh ngalap neneh. Idi baweh rat Masir na pian pebunu' peh, ngaceku lemulun luk metueh pana' nateh petap tueh.

¹⁶ Bunu' ineh miak nganau' luk pianneh dengan na sabeng. Ieh miak tuped luun Tana' luk Pijani' ineh idi ngalap lalud pa luunneh.

¹⁷ “Idi raca' Siria pian nguit amung bawehneh amé' pebunu' teh. Ieh miak pejani' maré seburur anak raca' ngaweh, pad ieh ngedereh bunu'neh. Iamo' na ulekneh.

¹⁸ Pangeh ineh ieh miak ngerieng tuda'-tuda' bawang luk tangep abpa' rayeh, idi ieh miak naban mula' lemulun. Iamo' seburur lun rayeh rat bawang baken miak ngelaya' neneh, idi ngagka' dita' niatneh.

¹⁹ Raca' ineh miak lemubed amé' bang libungneh luk meraben déi' bawangneh sebuleng. Iamo' ieh miak uen ngelaya'. Idi ini kekiped kekamen lemulun ineh.

²⁰ “Seburur raca' luk baken miak ngelibal neneh, idi ieh miak ngecuk lemulun ngamung pupuk pad ieh ngula' binaweh imetneh. Iamo' na mio teh raca' ineh pana' miak pitayen, iamo' baken bang bunu'.

Raca' Luk Dat

²¹ “Idi raca' luk nengelibal raca' Siria ineh seburur lemulun luk dat luk na petulu mangun ku raca'. Iamo' denak-denak ieh ngalap lalud dengan naluk.

²² Amung baweh luk sikal metueh rat neneh, idi Imam Allah luk Rayeh pana' miak uen ngelaya' idi uen ngusu.

²³ Ieh nutun perurum dengan bawang baken dengan naluk, pad ieh amé' metueh sagan tu pana' imetneh sebuleng isuut.

²⁴ Ieh miak ngelaya' aceh bawang luk inan mula binaweh luk na inan susa'. Idi ieh miak nganau' tuda'-tuda' kekamen luk na tu-tu inau' tepunneh. Idi ieh miak mabpat kuan anak itinneh binaweh luk tibanneh bang bunu' ineh. Ieh pian ngerieng libung-libung luk meraben, iamo' na mio.

²⁵ “Dengan mekuu' ieh pian ngamung aceh baweh luk rayeh, pad ieh miak munu' raca' Masir luk temina' munu' neneh dengan aceh baweh luk rayeh idi melalud. Iamo' raca' Masir na miak metueh ngaceku uen naluk.

²⁶ Lun rurumneh luk muneng miak ngelaya' neneh. Mula' lun pebunu'neh miak pitayen, idi bawehneh uen ngusag.

²⁷ Idi dueh raca' ineh miak kuman nan sebuleng téng, iamo' terawé didueh dat, idi didueh pad-pad mebalih. Didueh na miak ngalap luk pian didueh, ngaceku nateh karebneh nacing.

²⁸ Raca' Siria gugkang muli' dengan amung binaweh luk tibanneh. Ieh metueh niat pian ngusag anu pupu Allah. Ieh metueh niat pian ngusag anu pupu Allah. Ieh miak nganau' luk pianneh, idi lemubed amé' nan bawangneh sebuleng.

²⁹ “Muci ieh miak amé' munu' bawang Masir sekua' teh, iamo na ieh mangun kudeng luk atun.

³⁰ Lun Rum macing maya' kapal pian metueh rat neneh, pad ieh matot. “Idi ieh miak lemubed dengan megateh niat idi nutun ngusag anu pupu Allah. Ieh miak maya' bala lemulun luk pangeh nenecan sembayang ineh.

³¹ Tuda'-tuda' babpat bawehneh miak ngelutak Ruma' Allah idi libungneh. Ideh ngagka' baré luk pekalai anid-anid aco, idi naped Akang luk Nguyo ineh.

³² Dengan saluk, raca' miak ngubuk lemulun luk pangeh nenecan sembayang ineh, iamo' lemulun luk maya' Allah miak metueh.

³³ Lun luk mileh miak mada' mula' lun baken. Iamo' na mio sebuang miak pitayen bang bunu' idi apui. Idi binaweh sebuang miak pinawen lun luk mano, idi ideh pana' tebanen.

³⁴ Kareb ideh uen ngedereh, pawa' lemulun luk ngedengan nedeh. Iamo' sebuang lemulun luk ngedengan nedeh ngerawé bururdeh sebuleng mo'.

³⁵ Sebuang luk mileh miak pitayen, pad ngeligan pupu ineh — pad macing kekipedneh, ieh ineh kareb luk pangeh litep Allah.

³⁶ “Raca' Siria miak nganau' anun-anun luk pianneh. Ieh miak pebala dengan medita' niat, kebalaneh, ieh meluun melalud ratnan amung-amung akang idi meluun rayeh ratnan Allah luk Meluun Rayeh. Ieh nganau' kudeng ineh pad ieh kumin Allah. Allah miak nganau' amung-amung luk pianNeh.

³⁷ Raca' ineh na ngerawé allah tepunneh, idi lalud luk inan decur mawa. Setuneh, ieh na tu-tu ngerawé allah ngaceku ieh ngerawé bururneh sebuleng meluun rayeh rat nedeh.

³⁸ Iamo' ieh miak ngerayeh lalud luk matar libung luk meraben. Ieh miak maré amas, pirak, batu luk meraga, idi baré baken luk do' kuan aceh lalud luk na tu-tu tirawé tepunneh.

³⁹ Ieh miak ngecuk lemulun luk sembayang inan lalud pupu baken matar amung libungneh luk meraben. Ieh miak ngerayeh lemulun luk pian neneh ngimet nedeh, pad ieh maré kekamen luk medita' nedeh, idi tana' pana' barénneh ku samaldeh.

⁴⁰ “Kareb tarek raca' Siria malé macing, idi raca' Masir miak munu' neneh, idi raca' Siria pana' miak ngua' dengan abud tuehneh. Ieh miak nguit keréta kuda, idi mula' kapal, pad ieh miak ngerieng Masir mepad kudeng ereb.

⁴¹ Idi ieh miak munu' Tana' luk Pijani' ineh, idi ngaté ribu-ribu lemulun. Idi bawang Edom, Moab, idi luk neketecan ratnan bawang Amon miak mepuit.

⁴² Ieh miak ngelaya' mula' bawang. Idi Masir pana' na miak mepuit.

⁴³ Ieh miak naban binaweh amas idi pirak idi binaweh baken luk meraga luk inapung déi' Masir. Ieh miak ngelaya' bawang Libia idi Sudan.

⁴⁴ Pangeh ineh bala miak macing rat pa busat aco, idi rat pa tinueh busat aco luk ngatot neneh, pad ieh metueh pebunu' idi ngaté mula' lemulun.

⁴⁵ Idi ieh miak mudut lepo raca' luk rayeh arang abpa' rayeh dengan pegkung su luk inan Ruma' Allah. Iamo' ieh miak maté, idi seburur pana' nateh luk miak ngedengan neneh.