DANIEL 10 - BALA LUK DO'

Luk Sinier Daniel Tangeb Abpa' Tigris

¹ ‘Bang lak luk keteluh kareb imet Kores raca' Parsi, aceh bala nacing kuan Daniel luk titen Beltesasar. Idi bala ineh matu, iamo' mikat kali' ilungneh. Idi bala ineh linio kuanneh bang aceh luk sinierneh.)

² Kareb ineh, ui ini Daniel mesusa' niat kinio teluh minggu.

³ Na ui nekuman akan luk do' idi uang pung. Na ui nengirup abpa' anggur. Na ui nemabpa abpukku, pad macing teluh minggu.

⁴ Dueh ngepulu' apat aco bulan aceh bang lak ineh, ui netuped tangeb Abpa' Tigris luk rayeh ineh.

⁵ Ui netengook idi nekali' Seburur Lemulun luk ngayung ku kibung luk do', idi abet awa' luk ratnan amas.

⁶ BururNeh mesilo mepad kudeng batu luk meraga. KiungNeh merasat mepad kudeng kilep, idi matehNeh mebudung mepad kudeng apui. LangenNeh idi kukudNeh mesilo mepad kudeng tekaling, idi arodNeh mepad kudeng arod mula' lemulun.

⁷ Ui sebuleng luk nekali' luk sinier ineh. Lemulun luk idi denganku na nenier anun-anun, iamo' ideh matot, idi upun amé' sigapung.

⁸ Ui sebuleng mo' neketecan su ineh idi nenier luk inan mawa ineh. Idi ui melaya', idi kiungku nisu' pad seburur pana' nateh luk miak miti negku.

⁹ Kareb ui neninger balaNeh, idi ui neluka' tekulub luun tana' idi na kali' anun-anun.

¹⁰ Idi inan aceh ticu' nengakem negku luk nengiding negku, pad ui netekeradung. Idi ui megegker teh.

¹¹ Idi kebalaNeh negku, “O Daniel, Allah mawa namu. Do' tuped idi ninger do'-do' amung-amung luk belénKu. Ui luk icuk amé namu.” Kareb Ieh pangeh nepebala kudeng ini, idi ui netuped dengan megegker teh.

¹² Idi kebalaNeh, “O Daniel, aleg matot. Allah neninger sembayangmu bang aco luk pun-pun kareb iko nengebeneh bururmu, pad iko miak kali' ilungneh. Idi Ui luk iné' ngua' sembayangmu.

¹³ Iamo' melaikat luk dat luk matar imet Parsi sikal metueh rat Negku kinio dueh ngepulu' aceh aco. Pangeh ineh Mikail, seburur rat arang melaikat luk rayeh, iné' ngedengan Negku, ngaceku Ui tican buleng-buleng déi' bang imet Parsi.

¹⁴ Ui iné' mada' namu pad iko kali' ratnan luk miak mangun kuan pupumu muci. Ini aceh luk sirenmu ratnan luk mangun muci.”

¹⁵ Kareb Ieh nepebala, idi ui nenier i tana' idi na nepebala.

¹⁶ Idi denak-denak aceh luk kudeng ayu lemulun nengakem bibirku. Idi tangku nukab idi ui petacu nepebala. Kebalaku kuan luk tuped pa kiungku, “O Tuhan, luk sinierku ini ngelaya' negku, pad ui na ugka' megegker.

¹⁷ Ui mepad kudeng demulun luk tuped pa kiung tuanneh. Kudeng apehké ui pebala Namu? Na tuehku idi teh ui mabud niat.”

¹⁸ Sekua' teh Ieh nengimet negku, idi ui meluun tueh.

¹⁹ KebalaNeh, “Allah mawa namu, aleg megagau idi matot. Do' iko mekuu'.” Kareb Ieh pangeh nepebala, idi ui metueh, idi kebalaku, “O Tuhan, anunké luk belénMu. Ngaceku ui do' inau'Mu.”

^20-21 Idi kebalaNeh, “Kali'mu, amé' ngudeh Ui namu? Ui pian mada' namu ratnan luk inayud bang Surat luk Matu. Nekini Ui lemubed amé' munu' melaikat luk dat luk matar imet Parsi. Pangeh ineh melaikat luk dat luk matar imet Grika miak macing. Idi seburur pana' nateh luk ngedengan Negku, iamo' Mikail mo' sebuleng, ieh ineh melaikat luk matar bawang Israil.