DANIEL 1 - BALA LUK DO'

Bada' Ratnan Daniel Idi lun Rurumneh ( Dan 1.1—6.28 ) Anak Adi' Pupu Israil Déi' Ruma' Raca' Nebukadnesar

¹ Bang lak luk keteluh kareb imet Yoyakim raca' Yahuda, idi Nebukadnesar raca' Babil nengerieng Yerusalim idi nengelibut bawang ineh.

² Tuhan nenima' Nebukadnesar nengakem Raca' Yoyakim idi ngalap sebuang binaweh rat bang Ruma' Allah. Ieh nenguit nelun luk tiban amé' ruma' akangneh déi' Babil, idi ieh nenganug binaweh ineh bang su luk inan nganug luk meraga.

³ Idi raca' ineh nengecuk ni Aspenas, lun rayeh lun luk dukenneh mili' rat arang lun Israil luk tiban ineh, tuda'-tuda' anak adi' deléi luk inul raca' idi luk inul lun do',

⁴ ieh ineh tuda'-tuda' luk metaga idi luk na anun-anun luk dat luun bururdeh, luk mileh, idi luk petap sekola', luk saget mileh, pad ideh miak ngakem bang ruma' raca'. Idi Aspenas miak mada' nedeh maca' idi ngayud buri lun Babil.

⁵ Idi raca' nengecuk maré nedeh akan idi abpa' anggur ratnan téng raca' anid-anid aco. Pangeh ideh sibada' bang teluh lak ideh miak tuped pa kiung raca'.

⁶ Arang lemulun luk pinili' ineh, Daniel, Hanania, Misail, idi Asaria, amungdeh inul Yahuda.

⁷ Lun rayeh lun duken raca' nemaré nedeh ngadan baruh, ieh ineh Beltesasar, Sadrak, Misak, idi Abednego.

⁸ Iamo' Daniel na pian uen ngelutak ku akan idi abpa' anggur rat bang ruma' raca'. Ieh nemutuh Aspenas, lun rayeh lun luk duken ineh, ngedengan neneh.

⁹ Idi Allah nenganau' Aspenas méi' kuan Daniel.

¹⁰ Iamo' kebala Aspenas ni Daniel, “Ui matot inan raca'. Ieh nemaré ukum ratnan luk kenen idi luk rupen muyuh. Kudeng muyuh na do' ulun mepad kudeng anak-anak adi' luk baken ineh, ui pitayenneh lek.”

¹¹ Idi Daniel iné' matun lun matar luk litep Aspenas matar neneh idi teluh burur lun baken ineh.

¹² “Nutun nekai kinio pulu' aco,” kebala Daniel. “Maré nekai kikid irin idi abpa' talang.

¹³ Maad nekai dengan anak adi' luk kuman ratnan téng raca' idi nganau' anun-anun luk petulu dengan ayu kai.”

¹⁴ Idi ieh nenima' nedeh nutun akan ineh kinio pulu' aco.

¹⁵ Pangeh ineh idi ideh do' ulun idi meluun tueh rat nelun baken luk nekuman ratnan téng raca'.

¹⁶ Ngaceku ineh lun matar ineh na nemaré akan raca' teh iamo' kikid irin mo' sebuleng.

¹⁷ Allah nemaré inan apat anak adi' ineh ileh ratnan amung-amung surat idi teh terawé luk medalem. Idi Ieh nemaré ni Daniel ileh ngelio luk sinier idi nupi pana'.

¹⁸ Idi abud teluh lak luk litep raca', idi Aspenas nenguit amung anak adi' ineh amé' matun Nebukadnesar.

¹⁹ Idi raca' nepebala nedeh, idi ieh nekali' Daniel, Hanania, Misail, idi Asaria meluun do' ratnan anak adi' luk baken. Idi ideh mangun ku lun duken raca'.

²⁰ Kareb raca' nengitun nedeh ratnan anun-anun luk medalem idi luk mikat uen mutut, ieh kali' nedeh pulu' kua' ileh ratnan lun luk mileh mangun idi luk mileh nier bang aput imetneh.

²¹ Idi Daniel nengakem su ineh pad macing Kores mangun ku raca' Babil.