BALE' 9 - BALA LUK DO'

Ileh Idi Bacé

¹ Ileh pangeh nemudut ruma'neh luun tudu' diri.

² Ieh nengeret pung pian nganau' irau, idi nenganau' luk do' buen bang abpa' anggur, idi teh ieh nenganau' téng.

³ Ieh nengecuk demulunneh luk decur nawar rat su luk medita' bang bawang ineh:

⁴ “O lun luk mebacé, do' umak!” Idi kebalaneh kuan lemulun luk mebacé ineh,

⁵ “Amé' kuman nuba'ku idi ngirup abpa' anggur luk tinina'ku.

⁶ Necan amung lun luk mebacé pad muyuh mulun. Maya' dalan ileh.”

⁷ Kudeng iko mada' lemulun luk medita' niat, iko miak uenneh ngedat. Kudeng iko mada' lemulun luk dat, iko miak uenneh ngedereh.

⁸ Aleg mada' lemulun luk medita' niat, ngaceku ieh megateh niat namu. Iamo' kudeng iko mada' lemulun luk mileh ieh miak ngerayeh namu.

⁹ Anun-anun luk belénmu kuan lemulun luk mileh, nganau' neneh meluun ileh. Idi teh anun-anun luk belénmu kuan lemulun luk matu, ineh teh luk ngeluun ilehneh.

¹⁰ Kudeng iko pian ngalap ileh, do' iko matot inan Tuhan atun. Kudeng iko ngiti Luk Meligan ineh, iko do' kali'.

¹¹ Ileh ineh ngekadang ulunmu.

¹² Iko luk uen ngeperuan kudeng iko mileh. Iamo' kudeng iko ngarung ileh, iko luk medereh.

¹³ Bacé ineh mepad kudeng decur luk meria' idi na migu'. Idi teh ieh na kali' anun-anun.

¹⁴ Ieh tudo munung tanga' ruma'neh, idi su luk medita' bang bawangneh,

¹⁵ idi nawar lemulun luk lemaba ngerawé kekamendeh sebuleng, kebalaneh,

¹⁶ “O lemulun luk mebacé, umak.

¹⁷ Abpa' luk pino meluun paci'. Ruti luk pino meluun én.”

¹⁸ Iamo' ideh na kali' lemulun luk amé' déi' maté, idi lemulun luk pangeh numak pangeh iné' su luk inan até.