BALE' 8 - BALA LUK DO'

Ileh Inubur

¹ Do' ninger! Ileh nawar, idi Do' Kali' pedingeren.

² Ieh tuped iring dalan idi déi' lisangen dalan.

³ Ieh nawar rat munung tanga' bawang.

⁴ “Ui nawar amung-amung lemulun luk luun tana' ini.

⁵ Do' lemulun luk na mileh mangun mileh, idi lun luk mebacé sibada'.

⁶ Ninger balaku luk meluun do', amung luk belénku ineh matu.

⁷ Ui mala luk matu idi ui megateh inan balih.

⁸ Amung-amung luk belénku ineh matu, idi na luk mebalih idi luk ngeraruh.

⁹ Kuan lemulun luk do' kali' amung ineh megala'; idi kuan lun luk nesibada' amung ineh melio.

¹⁰ Mili' bada'ku ku libal pirak, idi do' kali' ku libal amas luk pelaba do'.

¹¹ “Ui ini ileh, ui meluun do' ratnan batu luk meraga; idi na luk miak uen maad denganku.

¹² Ui ini ileh, idi ui do' kali'. Ui luk kali' idi muned terawé.

¹³ Lemulun luk matot inan Tuhan megateh inan luk dat. Ui megateh inan dita' niat idi sido' niat, dalan luk dat idi bala luk mebalih.

¹⁴ Ui ngacing luk tirawéku. Ui kali' luk medalem, idi teh ui metueh.

¹⁵ Ui ngedengan raca'-raca' luk ngimet bawang, idi lun nguyut luk nganau' ukum luk do'.

¹⁶ Amung lun luk nguyut bang tana' ini denganinku, idi teh pengulu idi lun rayeh pana'.

¹⁷ Ui mawa inan lemulun luk mawa negku; idé-idé luk nakap negku miak ngalap negku.

¹⁸ Ui miak maré binaweh luk do' idi ubur pana', idi teh peruan idi luk matu.

¹⁹ Luk lapenmu rat negku meluun ratnan amas, idi teh ratnan pirak luk meluun do'.

²⁰ Ui maya' dalan luk matu, idi teh dalan luk mesiri.

²¹ Ui maré binaweh kuan lemulun luk mawa negku, idi manu' ruma'deh ku binaweh luk meraga.

²² “Tuhan nemudut negku pun-pun, atun ratnan kekamenNeh luk mon.

²³ Ui luk pun-pun pinudut kareb nateh tana' idi.

²⁴ Ui tinganak kareb nateh abpa' idi, idi teh kareb nateh bued abpa'.

²⁵ Ui tinganak atun ratnan pegkung-pegkung idi surud-surud,

²⁶ kareb nateh Allah nemudut tana' dengan rakedneh. idi sesuut abuh pana'.

²⁷ Ui idi kareb Allah nemalad langit, idi nenganau' iringneh libut-libut abpa' rayeh.

²⁸ Kareb Ieh nenganau' laput bang langit, idi teh kareb Ieh nengukab bued abpa' rayeh,

²⁹ idi kareb Ieh nemebpeng abpa' rayeh na lemaba lakan luk litepNeh. Ui idi kareb Ieh nenganau' tapin tana'.

³⁰ Ui idi iringNeh mepad kudeng lun luk mileh mudut, ui luk inanNeh mawang niat anid-anid aco, ui megéi' mawang niat pa kiungNeh.

³¹ Ui mawang niat ku tana' ini idi ku lemulun pana'.

³² “O amung anak adi', ninger balaku. Nganau' luk pianku pad iko mawang niat.

³³ Ninger luk badén kuanmu. Do' iko mileh. Aleg patad ratnan bada' ineh.

³⁴ Lemulun luk ninger balaku mawang niat, ieh ineh lemulun luk tudo munung tanga'ku anid-anid aco.

³⁵ Lemulun luk ngalap negku ngalap ulun, idi Tuhan mawang niat neneh.

³⁶ Lemulun luk na ngalap negku ngedereh bururneh sebuleng; idi lemulun luk megateh negku mawa ku até.”