BALE' 7 - BALA LUK DO'

¹ O anakku, do' ngerawé luk belénku namu, idi aleg mekelupan luk dukenku namu.

² Maya' luk belénku pad iko mulun. Do' matar idi maya' balaku, mepad kudeng iko matar matehmu.

³ Ngimet bada'ku kidi-kidi, idi ngayud ineh bang niatmu.

⁴ Nima' ileh mangun ku kinanakmu luk decur, idi do' kali' mangun ku rurummu luk muneng.

⁵ Idi ratnan ineh iko miak uen ngado ratnan decur dulun, idi ratnan decur luk ngeruid niatmu.

Decur Luk Mesawa'

⁶ Inan sekua' ui nenier rat munung tabuk ruma'ku, idi ui nekali' tuda'-tuda' burur anak adi' deléi

⁷ luk na pekalai ku kekamen tana' ini. Arangdeh inan seburur anak adi' deléi luk mebacé.

⁸ Ieh nemaya' dalan su lisangen dalan muneng ku ruma' aceh decur. Ieh nelemaba ruma'neh,

⁹ kareb madacem.

¹⁰ Idi decur ineh nepapu' neneh; ieh nengayung mepad kudeng decur luk mesawa', idi ieh temina' naluk.

¹¹ Ieh mekuu' idi na migu'. Ieh megéi' lawé-lawé.

¹² Ieh tuped nganét déi' lisangen dalan, merabpu' iring dalan, idi déi' kadai pana'.

¹³ Ieh nengapel dier anak adi' ineh, idi nengangep neneh. Dengan na migu' ieh nepebala neneh.

¹⁴ “Ui nemaré baréku aco sini, idi inan teh uang ratnan baré ineh.

¹⁵ Idi ui pian nakap idi papu' namu, idi nekini iko idi!

¹⁶ Idi ui nemalad kibung luk mebarit rat bawang Masir ku apin bitaranku.

¹⁷ Ui nenganau' neneh do' buen ku mur, garu, idi kayuh kadingau.

¹⁸ Tau! Do' kiteh pegapel kedangan-kedangan. Kudeng ineh teh kiteh mawang niat.

¹⁹ Awanku na idi. Ieh iné' ngarang.

²⁰ Ieh nenguit petap usin idi ieh muli' pangeh dueh minggu.”

²¹ Idi ieh nenutun neneh dengan bururneh, pad ieh melaya' ku ubukneh.

²² Ieh petacu nenalan maya' neneh, mepad kudeng sapi' luk kereten, idi mepad kudeng talau luk mekaneh abpung.

²³ Idi pusu'neh uen nebpek ku ileb. Ieh mepad kudeng suit luk mekaneh rabat, na kali' susa' macing neneh.

²⁴ O anak-anakku, do' ninger luk belénku.

²⁵ Aleg nima' decur luk kudeng ineh ngeruid niatmu, idi aleg maya' neneh.

²⁶ Ieh pangeh nengusag ulun tuda'-tuda' deléi. Idi ieh nengacing até kuan mula' lemulun.

²⁷ Kudeng iko umak ruma'neh, idi iko petacu amé' su luk inan até.