BALE' 6 - BALA LUK DO'

Bada'

¹ O anakku, pangehké iko pejani' ngua' baleh dulun?

² Pangehké iko ibpung ku bala idi jani'mu sebuleng?

³ O anakku, kudeng pieh kudeng ineh, iko bang palad lemulun ineh, idi kudeng ini dalan mepuit: miket amé' mutuh neneh muit namu.

⁴ Aleg iko rudap, idi aleg ucu' pad ngato erurmu.

⁵ Remuat rat bang abpung ineh mepad kudeng suit idi talau mepuit rat nelun luk nganup.

⁶ Lemulun luk mekupé petulu sibada' ratnan ulun dara'.

⁷ Na pengulu, raca', idi luk nguyut nedeh.

⁸ Iamo' ideh nganug akan kareb melau', pad ideh temina' kareb meteneb.

⁹ Tuda' ioké lemulun luk mekupé tudo mo'-mo'? Idanké ieh miak tumui?

¹⁰ Kebalaneh, “Ui pian rudap segageh, idi gapel ruuk pad ngato erurku.”

¹¹ Iamo' laba' ieh rudap, asi' ngerieng neneh mepad kudeng lun mano.

¹² Lemulun luk dat nalan-nalan dengan mebalih.

¹³ Ideh sikinit mateh idi nganau' anun-anun luk naluk namu.

¹⁴ Ideh megéi' ngerawé luk dat bang niatdeh luk tekilu', idi ngacing susa' iapeh-iapeh pana'.

¹⁵ Ngaceku ineh susa' miak macing nedeh denak-denak, pad ideh murat idi maté.

^16-19 Inan tudu' kekamen luk inan Tuhan megateh: ayu luk medita' niat, dila' luk mebalih, ticu' luk ngaté lemulun luk na mesala', niat luk ngerawé luk dat, lemulun luk upun nganau' luk dat, lun nekali' luk mebalih, lemulun luk ngacing kedaluh arang lun rurum.

Bada' Ratnan Na Pasét

²⁰ O anakku, do' iko nganau' luk duken i tamam, idi aleg mekelupan luk bida' i tinam.

²¹ Do' megéi' nganug bala didueh bang niatmu.

²² Bada' didueh miak nguyut namu kareb nalan, idi matar namu kareb medacem, idi mada' namu kareb macang.

²³ Ukum didueh mepad kudeng lapung luk merasat, idi bada' didueh mada' namu ratnan ulun.

²⁴ Bada' ineh matad namu ratnan decur luk dat, idi ratnan ubuk decur dulun.

²⁵ Aleg iko tetunin ku taga decur luk megéi' ngimateh.

²⁶ Seburur lemulun miak ngalap decur luk mesawa' ku raga sebatang ruti, iamo' raga pasét, ieh ineh amung-amung luk ieh kuan.

²⁷ Miakké iko ngimet apui muneng ku ruukmu idi na ngeseb kuyu'mu?

²⁸ Miakké iko nalan luun bareh apui idi kukudmu na melau'?

²⁹ Mepad susa' pamung rudap dengan decur dulun. Lemulun luk nganau' kudeng ineh medereh.

³⁰ Lemulun na megateh inan lun mano kudeng ieh ngalap akan dulun karebneh melau;

³¹ iamo' kudeng ieh uen ngakem, na miak na ieh ngua' tudu' kua' kinula' luk ilapneh, ieh ineh amung-amung luk ieh kuan.

³² Iamo' lemulun luk pasét na mileh. Ieh ngusag ulunneh sebuleng.

³³ Ieh miak uen ngigu' idi bebalen idi igu'neh meruked.

³⁴ Awan luk deléi meluun gateh kareb ieh temaruh. Ieh ngua' dengan na méi'.

³⁵ Ieh na pian ngalap ukum didueh. Baré luk pelaba ula' na miak ngagka' usehneh.