BALE' 5 - BALA LUK DO'

Bada' Ratnan Na Pasét

¹ O anakku, ngerawé ratnan ileh idi do' kali'ku,

² pad iko nganau' luk do', pelé balamu ngegala' ilehmu.

³ Sagan tu pana' bibir decur dulun mepaci' kudeng duru' idi ngangep neneh mesalud kudeng umau saitun,

⁴ iamo' kekipedneh, iko tacinneh dengan susa' idi dereh.

⁵ Ieh nguit namu amé' su luk inan até; dalanneh macing inan até.

⁶ Na ieh lutep maya' dalan luk macing inan ulun; ieh umai, iamo' na kali'mu.

⁷ O anak-anakku, ninger balaku idi aleg mekelupan ineh.

⁸ Buro ratnan decur luk kudeng ineh! Aleg amé' munung tanga'neh,

⁹ pad iko na maré ulunmu kuan lun baken, idi iko na maté karebmu mangud bang palad lemulun luk na mileh méi',

¹⁰ pelé lun baken na ngalap amung binawehmu, idi uli' amung luk ilapmu,

¹¹ pad iko na maté dengan ngarod, ngaceku uangmu idi uratmu melu,

¹² idi iko pebala, “Ngudehké ui na nesibada'? Anunké punneh ui na neninger bada'?

¹³ Ui na neninger bada' guruku.

¹⁴ Idi denak-denak ui inigu' pa kiung lun mula'.”

¹⁵ Do' iko lutep inan decurmu sebuleng, idi mawa neneh sebuleng mo'.

¹⁶ Anak batek na ulek kuanmu.

¹⁷ Petulu anak-anakmu ngedengan namu baken dulun.

¹⁸ Do' iko mawang niat inan decurmu luk inawehmu.

¹⁹ Do' ieh kuanmu, mepad kudeng talau luk do' taga, idi do' iko mawang niat ku bururneh idi awaneh.

²⁰ O anakku, na petulu iko mawa inan decur baken! Idi teh na petulu iko pian ku burur decur dulun.

²¹ Tuhan nier amung-amung luk ruenmu. Su apeh ulekmu Ieh nier namu.

²² Sala' lemulun luk dat mangun ku abpung. Ieh mekaneh abpung sala'neh sebuleng.

²³ Ieh maté ngaceku ieh na mileh ngimet bururneh. Bacéneh nguit neneh macing inan lengutan.