BALE' 4 - BALA LUK DO'

Peruan Ratnan Ileh

¹ O anak-anakku, ninger bada' taman muyuh. Ninger do'-do' pad muyuh kali'.

² Luk badénku nemuyuh ineh do'. Do' ngerawé amung ineh.

³ Kareb ui anak isuut, ieh ineh anak buleng taman-tinanku,

⁴ idi tamanku nemada' negku. Kelabaneh, “Do' ngerawé luk belénku, idi aleg mekelupan ineh. Nganau' luk dukenku namu, pad iko mulun.

⁵ Ngalap ileh idi do' kali'! Aleg iko mekelupan pad iko teketed ratnan balaku.

⁶ Aleg patad ratnan ileh, ngaceku ieh luk matar namu. Mawa neneh, idi ieh miak ngimet namu.

⁷ Luk meluun do', do' ngalap ileh idi do' kali'.

⁸ Mawa inan ileh, pad ieh ngerayeh namu. Ngimet neneh, idi ieh miak ngedita' namu.

⁹ Ieh miak mangun ku pata rayehmu.”

¹⁰ O Anakku, ninger balaku. Ngerawé do'-do' luk belénku namu, pad iko mekadang ulun.

¹¹ Ui nemada' namu ratnan ileh idi dalan ulun.

¹² Na luk ngesabeng namu, kudeng iko nalan dengan ileh, idi kareb iko upun na iko metebaceng.

¹³ Do' iko ngerawé luk inanmu nesibada'. Bada' ineh ulunmu. Matar neneh do'-do'.

¹⁴ Aleg maya' dalan lemulun luk dat.

¹⁵ Aleg nganau' luk kudeng ineh. Patad ratnan luk dat! Ngarung neneh, idi petacu nalan.

¹⁶ Lemulun luk dat na rudap kudeng ideh na nganau' sala'; idi ideh na medacep mateh kudeng ideh na ngurat nelun.

¹⁷ Ngaté lemulun idi kekamen luk dat mepad kudeng luk kenen idi luk rupen kuandeh.

¹⁸ Dalan lemulun luk matu mepad kudeng asat aco, luk iuk-iuk merasat macing acang aco.

¹⁹ Iamo' dalan lemulun luk dat medacem, mepad kudeng malem. Ideh mebpeh, iamo' na kali' luk inandeh metebaceng.

²⁰ O anakku, ninger balaku.

²¹ Aleg patad ratnan bala ineh. Ngerawé idi mawa neneh.

²² Balaku ineh maré ulun idi mangun ku ubat kuan lemulun luk kali' ilungneh.

²³ Matar terawému do'-do'. Ratnan terawému, ulunmu misu'.

²⁴ Aleg pebala luk mebalih. Aleg perurum dengan balih idi bala luk naluk.

²⁵ Do' nier pa atunmu dengan kuu' luk matu, idi aleg migu'.

²⁶ Ngerawé do'-do' ratnan luk ruenmu, pad amung luk ruenmu inan peruan.

²⁷ Buro ratnan luk dat idi petacu nalan. Idi aleg umai ratnan dalan luk matu.