BALE' 31 - BALA LUK DO'

Bada' Kuan Raca'

¹ Ini bala tinan Raca' Lemuil kuanneh:

² “Iko anakku luk inanku mawa, luk biré Tuhan maya' putuhku. Anunké luk belénku namu?

³ Aleg iko merur nakap decur luk mesawa', idi aleg ngabud usinmu kuandeh. Decur ineh ngebpeh raca'-raca'.

⁴ O Lemuil, ninger. Na petulu raca' ngirup abpa' anggur idi melili ku luk rupen luk megalih.

⁵ Kudeng ideh ngirup ideh mekelupan ukum luk matu idi na méi' nelun masi'.

⁶ Luk rupen ineh mangun ku ubat kuan lun luk medereh idi luk malé maté,

⁷ pad ideh mekelupan susa' idi derehdeh.

⁸ “Ngedengan lemulun luk na miak muit bururdeh sebuleng. Matar lemulun luk melaya'.

⁹ Ngamo nedeh idi mutut ukum luk matu. Matar lemulun luk masi' idi medereh.”

Awan Decur Luk Pelaba Do'

¹⁰ Pelaba ikat nakap awan decur luk pelaba do'. Ieh meluun raga ratnan bau luk pelaba raga!

¹¹ Deléineh merapet neneh, pad ieh na masi'.

¹² Ruked ulunneh decur ineh mangun ku peruan kuanneh, idi na ngesusa' neneh.

¹³ Ieh mekél ngebaruh kibung ratnan buluh dumba idi pu.

¹⁴ Ieh nguit akan rat mado mepad kudeng kapal déi' abpa' rayeh.

¹⁵ Ieh tumui kareb nateh aco masat idi ngelak kuan tetek ruma'neh, idi mada' amung demulunneh luk decur.

¹⁶ Ieh nakap tana' ku kabun anggur idi melih ineh ku usin luk ilapneh sebuleng.

¹⁷ Ieh mekél idi metueh ngakem.

¹⁸ Ieh kali' raga amung luk ruenneh, idi teh ieh ngakem kareb medacem.

¹⁹ Ieh nguper idi ngebaruh.

²⁰ Ieh mekatu nelun masi'.

²¹ Na ieh mesusa' kareb meteneb, ngaceku uang tetek ruma'neh inan ayung luk mekapal.

²² Ieh nganau' tarub, idi ieh ngayung ku kibung pu luk sia' merirem.

²³ Deléineh mebala, idi ieh seburur lun rayeh bawang.

²⁴ Ieh nganau' ayung idi abet awa' luk pisuenneh kuan lun luk pepua'.

²⁵ Ieh metueh idi buren, idi na matot muci aco.

²⁶ Ieh pebala dengan ileh idi mulai niat.

²⁷ Ieh megéi', idi ieh ngasa' uang tetek ruma'neh.

²⁸ Anak-anakneh ngegala' awadeh, idi awanneh ngubur neneh.

²⁹ Kebalaneh, “Mula' decur mangun ku awan luk do', iamo' iko luk meluun do'.”

³⁰ Do' ayu miak naluk, idi do' taga miak buro, iamo' decur luk matot inan Tuhan petulu buren.

³¹ Ngubur neneh ngaceku amung-amung luk ruenneh. Idi petulu ieh uen lun ngedita'.