BALE' 30 - BALA LUK DO'

Bala Agur

¹ Ini bala Agur Yaki: “Allah na idi denganku, Allah na idi denganku, idi ui melaya'!

² Ui mepad kudeng pung, baken lemulun; ui na inan ileh kudeng lemulun.

³ Ui na tu-tu nesibada' ku ileh, idi ui na kali' anun-anun ratnan Allah.

⁴ Idéké iné' surga, idi nuli' rat déi'? Idéké pangeh nengakem bui ku ticu'neh? Idéké nenanga abpa' bang kibung? Idéké nengeletep iring tana'? Kudeng iko kali', idéké ieh? Idéké anakneh?

⁵ “Allah maya' amung-amung jani'Neh. Ieh mepad kudeng utap kuan amung-amung lemulun luk pian uenNeh matar.

⁶ Kudeng iko ngeluun bala Tuhan pad iko mada' luk na tu-tu bilaNeh, Ieh miak ngukum namu, pad megala' iko mebalih.”

Tuda'-Tuda' Balé' Teh

⁷ O Allah, ui mutuh dueh peruan rat Namu kareb nateh ui maté:

⁸ aleg nima' negku mebalih, idi aleg nima' negku mangun ku lun do' idi ku lun dat. Maré petap akan mo' kuanku.

⁹ Kudeng ui pelaba ula' akan, kian ui meraruh rat Namu lek. Iamo' kudeng ui masi', ui mano lek, pad ui ngigu' Allahku.

¹⁰ Aleg ngedat demulun pa kiung tuanneh, pad iko na uen ngediman idi uen ngedereh.

¹¹ Inan lemulun luk ngediman tamandeh idi na méi' kuan tinandeh.

¹² Inan lemulun luk ngerawé bururdeh meligan, iamo' setuneh ideh pelaba lutak.

¹³ Inan lemulun luk ngerawé bururdeh do'. Matu, pelaba do' sen!

¹⁴ Inan lemulun luk muyok nelun masi', kudeng ineh lawédeh ngalap akandeh.

¹⁵ Lematak inan dueh anak decur. Ngadan didueh, “Maré negku! Maré negku!” Inan apat luk na inan musam:

¹⁶ su luk inan até, decur luk na anak, tana' luk na inan abpa', idi apui luk na mekilep.

¹⁷ Lemulun luk situnga nan tamanneh idi ngedat tinanneh kareb ieh mengered, petulu kenen kanui, idi petulu matehneh tekulen bungkak luk meliput.

¹⁸ Inan apat luk pelaba dalem kuanku:

¹⁹ kanui luk temulud arang gawa', menipeh luk suloi luun batu, kapal luk nakap dalan luun abpa' rayeh, idi deléi idi decur luk pawa.

²⁰ Ini lawé decur luk na lutep nan awanneh: ieh pasét, amé' diu' idi pebala, “Na sala'ku!”

²¹ Inan apat luk inan tana' megateh:

²² demulun luk mangun ku raca', lun mebacé luk mula' akan,

²³ decur luk dat luk ngaweh, demulun decur luk ngelibal awan tuanneh.

²⁴ Inan apat pung bang tana' ini luk pelaba isuut, iamo' ideh pelaba ileh:

²⁵ Dara': sagan pana' ideh melaya' ideh nganug akandeh kareb melau'.

²⁶ Arnab: ideh pana' na metueh, iamo' ideh tudo arang batu.

²⁷ Kato: na raca'deh, iamo' ideh nalan pekarur.

²⁸ Latek: iko miak ngeragem neneh bang paladmu, iamo' ideh tudo bang ruma' raca'.

²⁹ Inan apat luk do' siren kareb ideh nalan:

³⁰ balang, luk meluun tueh ratnan amung pung, idi na matot;

³¹ amék, lal kok luk medita' niat, idi raca'-raca' pa atun bawehdeh.

³² Kudeng iko pangeh nenganau' luk mebacé ngaceku medita' niat, do' iko ugka' idi ngerawé.

³³ Kudeng iko nguel rata sapi' iko ngalap mentéga. Kudeng iko mepag icung lemulun ieh medara'. Ngegio useh idi iko ngacing ria'.