BALE' 3 - BALA LUK DO'

Bada' Kuan Anak Adi' Deléi

¹ O anakku, aleg iko mekelupan luk badénku namu. Megéi' ngerawé luk dukenku namu.

² Ratnan bada'ku iko ngalap peruan idi ulun luk mekadang.

³ Aleg iko patad ratnan éi' idi do' iko lutep maya' jani'. Ngabet ineh i diermu, idi ngayud ineh bang niatmu.

⁴ Kudeng iko nganau' ineh, Allah idi lemulun pana' mawang niat namu.

⁵ Merapet inan Tuhan dengan amung niatmu. Idi aleg merapet inan terawému sebuleng.

⁶ Ngerawé Tuhan bang amung-amung luk ruenmu, idi Ieh miak mada' namu dalan luk matu.

⁷ Aleg ngedita' ilehmu sebuleng; iamo' do' matot inan Tuhan, idi na nganau' sala'.

⁸ Idi ineh mangun ku ubat luk do' luk ngedo' urat idi étmu.

⁹ Ngerayeh Tuhan idi mare baré Neneh ratnan uli' tana'mu luk meluun do',

¹⁰ pad lepomu panu' ku padé, idi su luk inanmu nganug abpa' anggur na petap.

¹¹ O anakku, kareb Tuhan mada' namu, ninger do'-do' pad iko badén.

¹² Tuhan mada' lemulun luk inanNeh mawa, mepad kudeng aceh taman mada' anakneh luk inanneh mawang niat.

¹³ Samal kuan lemulun luk ngalap ileh, pad ieh do' kali'.

¹⁴ Meluun rayeh samal ineh ratnan ngalap pirak; ileh ineh meluun raga ratnan amas.

¹⁵ Ileh meluun raga ratnan batu luk meraga, idi amung-amung luk pianmu na miak uen maad ku ineh.

¹⁶ Ileh maré namu ulun luk mekadang, mula' binaweh, idi ubur.

¹⁷ Ileh maré namu do' udeng idi nguyut namu dengan do', ruked ulunmu.

¹⁸ Lemulun luk ngalap ileh mawang niat; ileh maré ulun kuandeh.

¹⁹ Tuhan nemudut tana' ku ilehNeh. Ieh nemalad langit ku ilehNeh teh.

²⁰ IlehNeh nganau' abpa' manud, idi laput maré udan kuan tana'.

²¹ O anakku, ngimet ileh idi do' kali'mu. Aleg patad ratnan ineh.

²² Ratnan ineh iko ngalap ulun idi do' udeng,

²³ pad iko nalan dengan do' idi na metebaceng.

²⁴ Idi iko rudap kedangan-kedangan dengan na matot.

²⁵ Na iko megagau ku susa' luk macing denak-denak, mepad kudeng barui, kuan lemulun luk dat.

²⁶ Tuhan ngimet namu, pad iko na mekaneh abpung.

²⁷ Nganau' luk do' kuan lemulun luk mesusa', kudeng miak.

²⁸ Aleg ngecuk neneh nganét macing nebpa, kudeng iko miak ngedengan neneh nekini.

²⁹ Aleg ngesusa' nelun denganmu. Ieh tudo iringmu, idi merapet namu.

³⁰ Aleg pesaad dengan lun baken dengan na anun punneh, kudeng ieh na nganau' luk inanmu museh.

³¹ Aleg iko ngimaruh nan lemulun luk ngedereh nelun, idi aleg iko maya' lawédeh,

³² ngaceku Tuhan megateh inan lemulun luk nganau' luk dat, iamo' Ieh perurum nan lemulun luk matu.

³³ Tuhan ngediman ruma' lemulun luk dat, iamo' Ieh ngeperuan ruma' lemulun luk matu.

³⁴ Ieh na pian ku lemulun luk medita' niat, iamo' Ieh méi' kuan lemulun luk mebeneh niat.

³⁵ Lemulun luk mileh miak buren, iamo' lemulun luk mebacé iuk-iuk uen ngigu'.