BALE' 29 - BALA LUK DO'

¹ Kudeng iko amé'-amé' metueh niat kareb iko badén, muci iko miak medereh, pad iko na miak tumui.

² Kudeng lemulun luk matu ngimet, anak itinneh mawang niat. Iamo' kudeng lemulun luk dat ngimet, anak itinneh mesusa' niat.

³ Kudeng iko pian ku ileh, tamanmu mawang niat namu. Lemulun luk ngabud usin ku mayar decur luk mesawa', mebacé.

⁴ Kudeng raca' pian ku luk mesiri, kali' rungen pupuneh metueh, iamo' kudeng ieh pian ku usin mo' ieh miak ngusag bawangneh.

⁵ Kudeng iko ngubur lun rurummu mo'-mo', iko tumen abpung kuan bururmu sebuleng.

⁶ Lemulun luk dat mekaneh abpung sala'deh sebuleng, iamo' lemulun luk matu inan puit idi awang.

⁷ Lemulun luk matu kali' ratnan ulun lun luk masi', iamo' lemulun luk dat na mileh ngerawé luk kudeng ineh.

⁸ Lun luk situnga ngagau tuda'-tuda' bawang rayeh, iamo' lemulun luk mileh ngagka' useh.

⁹ Kareb lemulun luk mileh nguit lemulun luk mebacé amé' besara', lemulun luk mebacé ineh meriruh idi meria'.

¹⁰ Lemulun luk ngaté megateh inan lemulun luk mesiri, iamo' lemulun luk matu matar ulun lun luk mesiri ineh.

¹¹ Lemulun luk mebacé ngeruat usehneh, iamo' lemulun luk mileh, mulai niat pad ieh ngimet usehneh.

¹² Kudeng lun luk ngimet ninger luk mebalih, amung lun luk pa liangneh mangun ku lun mebalih.

¹³ Mateh lun luk masi' idi lun luk ngedereh neneh ratnan Tuhan.

¹⁴ Kudeng raca' ngedengan nelun masi', ieh miak ngimet mio.

¹⁵ Bada' idi bebal do' kuan anak. Kudeng ieh maya' pian bururneh sebuleng, ieh ngacing igu' kuan tinanneh.

¹⁶ Kareb lemulun luk dat ngimet, kekamen luk dat iuk-iuk rayeh. Iamo' lemulun luk matu miak nier ebpeh lemulun luk kudeng ineh.

¹⁷ Do' mada' anakmu, pad ieh ngacing awang niat namu pelé ieh na maré igu' kuanmu.

¹⁸ Kudeng aceh pupu na kiuten Allah, kali' rungen anak itin mula' ria'. Samal kuan lemulun luk maya' ukum Allah!

¹⁹ Demulunmu na miak badén ku bala mo'. Ieh kali' ilung balamu, iamo' na ieh maya'.

²⁰ Meluun rayeh rapet kuan lemulun luk mebacé ratnan lemulun luk pebala dengan na ngerawé.

²¹ Kudeng iko maré kuan demulunmu anun-anun luk pianneh, rat kareb ieh isuut, muci ieh miak ngalap amung binawehmu.

²² Lemulun luk malé museh megéi' ngacing ria' idi kedaluh.

²³ Dita' niat ngacing ebpeh lemulun, iamo' lemulun luk mebeneh niat miak buren.

²⁴ Rurum lun mano mangun ku bunu'neh sebuleng. Ieh miak kumin kudeng ieh mada' luk matu bang besara', idi Allah ngediman neneh kudeng ieh mebalih.

²⁵ Mesusa' kuanmu kudeng iko matot inan lemulun. Iamo' samal kuan lemulun luk merapet inan Tuhan.

²⁶ Amung lemulun pian inan raca' méi'. Iamo' Tuhan mo' mutut luk mesiri.

²⁷ Lemulun luk matu megateh inan lemulun luk dat, idi lemulun luk dat megateh inan lemulun luk matu.