BALE' 28 - BALA LUK DO'

¹ Lemulun luk dat upun buro, sagan pana' na lemulun ngerada' nedeh, iamo' lemulun luk matu mekuu' mepad kudeng balang.

² Aceh pupu kali' rungen metueh idi lutep, kudeng lun rayeh-rayeh mileh. Iamo' kareb aceh pupu nganau' sala', lun luk ngimet megéi' pesua.

³ Lun rayeh luk ngedereh nelun masi' mepad kudeng udan luk pelaba ula' luk ngeluka' padé.

⁴ Kudeng iko na ngerawé ukum, iko perurum nelun luk dat, iamo' kudeng iko maya' ukum, iko metueh rat nelun luk dat.

⁵ Lemulun luk dat na kali' ilung luk mesiri, iamo' lemulun luk tekeradung pa kiung Tuhan kali' luk amung-amung.

⁶ Lemulun luk masi' idi mesiri meluun do' ratnan lun do' luk na mesiri.

⁷ Anak adi' luk maya' ukum ineh mileh. Iamo' anak adi' luk perurum nan lemulun luk dat ngigu' tamanneh.

⁸ Kudeng iko mangun ku lun do' ngaceku muyok nelun, binawehmu miak barén nelun luk méi' nelun masi'.

⁹ Kudeng iko na maya' ukum, Allah megateh inan sembayangmu.

¹⁰ Kudeng iko naluk lemulun luk mesiri pad ieh nganau' luk dat, iko mekaneh abpungmu sebuleng. Lemulun luk na mesala' ngalap tabpar luk rayeh.

¹¹ Lun do' megéi' ngerawé bururdeh mileh, iamo' lun masi' luk mileh kali' niatdeh.

¹² Kareb lemulun luk do' ngimet, lun mula' mawang niat, iamo' kareb lemulun luk dat ngimet, lun mula' sigapung.

¹³ Na iko uen ngeperuan kudeng iko ngalum sala'mu. Do' ngamo idi uren, pad Allah méi' namu.

¹⁴ Do' iko matot inan Tuhan idi iko miak mawang niat. Kudeng iko metueh niat iko mekaneh dereh.

¹⁵ Anak itin luk masi' melaya' pa kiung raca' luk dat. Raca' ineh mepad kudeng balang luk ngeku idi beruang luk nakap akan.

¹⁶ Raca' luk na mileh, kali' rungen dat kuel, iamo' raca' luk megateh ku luk tekilu' mio ngimet.

¹⁷ Lemulun luk ngaté lemulun ngukat tanemneh sebuleng. Aleg ngesabeng neneh.

¹⁸ Kudeng iko maya' dalan luk mesiri, iko uen ngulun. Iamo' kudeng iko maya' dalan luk tekilu', iko miak mebpeh.

¹⁹ Lun luk mekél amé' lati' petap akan. Lemulun luk marot kali' rungen masi'.

²⁰ Lemulun luk mesiri mawang niat idi uen ngeperuan. Iamo' kudeng iko pian mangun ku lun do' dengan mesaget, kali' rungen iko kumin.

²¹ Na petulu mili' lemulun bang besara'. Iamo' inan lemulun luk sala' mutut ukum, pad ngalap suap luk isuut mo'.

²² Lemulun luk ucet ngamung usin pian mangun ku lun do', iamo' na ieh kali' asi' denak-denak macing neneh.

²³ Setuneh lemulun meluun pian badén ratnan buren mo'-mo'.

²⁴ Lemulun luk ngerawé na sala' kudeng mano ratnan taman-tinanneh, ieh ineh rurum lemulum luk dat.

²⁵ Kudeng iko ngerawé bururmu sebuleng iko ngacing ria'. Meluun do' iko merapet inan Tuhan.

²⁶ Lemulun luk merapet inan terawéneh sebuleng, ieh ineh lemulun luk mebacé. Do' iko maya' bada' lemulun luk mileh, pad iko na mekaneh susa'.

²⁷ Maré kuan lun masi' pad iko sebuleng inan petap. Lemulun luk teketed rat nelun luk masi' miak uen lun ngediman.

²⁸ Lun mula' sigapung kareb lemulun luk dat ngimet. Iamo' kareb lun luk ngimet ineh mebpeh, lemulun luk matu miak ngimet sekua' teh.