BALE' 27 - BALA LUK DO'

¹ Aleg iko medita' niat ratnan luk ruenmu nebpa. Iko na kali' luk miak mangun aco sini.

² Nima' nelun baken ngubur namu idi lun pupu baken pana'. Iamo' aleg iko ngubur bururmu sebuleng.

³ Batu idi bada pelaba berat. Iamo' susa' luk macing ngaceku bacé meluun berat teh.

⁴ Useh ineh dat kuel idi ngusag, iamo' temaruh luk pelaba dat.

⁵ Meluun do' mada' lemulun dengan megala', ratnan ngalum éi'mu neneh.

⁶ Lun rurummu ngurat namu, pad ngacing peruan. Iamo' bunu'mu ngapel namu, pad ngacing susa'.

⁷ Lemulun luk mebor ara' kuman duru'. Iamo' kareb ieh melau, akan luk mepét pana' do' én kenenneh.

⁸ Lemulun luk mado ratnan ruma'neh mepad kudeng suit luk mado ratnan ararneh.

⁹ Umau luk do' buen ngawang niatmu, idi bada' lun rurummu pelaba do' pedingerenmu.

¹⁰ Aleg mekelupan rurummu idi rurum tamanmu. Kudeng iko inan susa', aleg mutuh pedengan ratnan kinanakmu. Lun rurum luk muneng namu meluun do' ratnan kinanakmu luk mado.

¹¹ O Asi, mawang niatku kudeng iko mileh, pad ui miak ngor bala lemulun luk ngedat negku.

¹² Lemulun luk mileh kali' acing susa' pad ieh buro, iamo' lemulun luk na mileh ngerawé, petacu amé' matun susa', idi muci ieh nginuud.

¹³ Lemulun luk pejani' mayar baleh lemulun luk inanneh na pekalai, mebacé, idi petulu binaweh lemulun luk pejani' ineh lapen ku dudukneh.

¹⁴ Lemulun luk ngalat rurumneh pekak uka-uka dengan rayeh arod, mepad kudeng lemulun luk ngediman rurumneh.

¹⁵ Decur luk dat buri' mepad kudeng dat aco, kareb mudan kidi-kidi.

¹⁶ Kudeng apehké iko ngagka' neneh. Miakké iko ngagka' bui? Miakké iko ngeragem umau?

¹⁷ Lemulun sibada' ratnan lemulun, mepad kudeng belawan uen ngir ku belawan.

¹⁸ Ngasa' gita', pad iko kuman bua'neh. Demulun luk ngasa' tuanneh uen ngedita'.

¹⁹ Iko nier kiungmu mepad kudeng aca' bang abpa', kudeng ineh teh iko nier bururmu sebuleng bang niatmu.

²⁰ Luk pian lemulun idi su luk inan até mepad mo'. Ideh megéi' nakap luk piandeh.

²¹ Amas idi pirak tetunin ku apui, kudeng ineh teh ulun lemulun tetunin.

²² Kudeng iko mebal lemulun luk mebacé pad ieh lélé maté, idi ieh mebacé teh.

²³ Matar dumba idi sapi'mu do'-do',

²⁴ ngaceku iko na miak ngimet binawehmu meruked. Imet raca' pana' na lutep kuan inulneh.

²⁵ Iko ngeranih uduh luk tinibu kuan aya'mu, idi teh ngalap uduh luk mulun mo'-mo' luun surud laba' nganét uduh luk tinibu muci.

²⁶ Idi ayungmu ruen ratnan buluh dumba, idi iko melih tana' ku usin luk lapenmu, kareb iko masui amék.

²⁷ Amék luk ketecan maré rata kuan tetek ruma'mu, idi kuan demulunmu luk decur pana'.