BALE' 26 - BALA LUK DO'

¹ Na petulu ngubur lemulun luk mebacé; ieh ineh mepad kudeng salju kareb melau', idi udan kareb ngeranih.

² Kediman na ngurat lemulun luk na petulu uen ngediman; ieh ineh mepad kudeng suit luk temulud dengan na ucep.

³ Kuda uen mabpet, keladai uen ngimet, idi lemulun luk mebacé bebalen.

⁴ Kudeng iko ngor bala luk mebacé, iko mepad bacé kudeng lemulun luk ngitun ineh.

⁵ Ngor bala lemulun luk mebacé maya' bacéneh, pad ieh na ngerawé bururneh mileh.

⁶ Lemulun luk nima' lun luk mebacé nated bala, mepad kudeng lemulun luk nangal kukudneh ngaceku ieh nakap susa'.

⁷ Lun mebacé dat ileh makai balé', mepad kudeng lemulun luk mekio' dat ileh nalan.

⁸ Kudeng ngubur lemulun luk mebacé, ieh ineh mepad kudeng ngelatik ku batu luk pelaba rayeh.

⁹ Lemulun luk mebacé luk nutun ngalap bala ileh, mepad kudeng lun mabuk luk nutun nguat tabpa' rat bang paladneh.

¹⁰ Lemulun luk nabpar lemulun luk mebacé ngesusa' nelun baken.

¹¹ Lemulun luk mebacé luk lemubed nganau' luk mebacé teh, mepad kudeng uko' luk lemubed kuman uta'neh.

¹² Lemulun luk mebacé meluun samal ratnan lemulun luk ngerawé bururneh mileh.

¹³ Ngudehké lemulun luk mekupé na mepai? Anunké luk inanneh matot? Balangké?

¹⁴ Lemulun luk mekupé demier luun bitaranneh. Ieh mepad kudeng tanga' luk tekito luun abetneh.

¹⁵ Inan lemulun luk pelaba kupé, pad ideh ara' nganau' nuba' bang tangdeh sebuleng.

¹⁶ Lemulun luk mekupé ngerawé bururneh meluun ileh ratnan tudu' burur lemulun luk miak maré or luk petulu.

¹⁷ Lemulun luk semuet bang kedaluh lun baken, mepad kudeng lemulun luk ngakem lalid uko' karebneh nalan.

^18-19 Lemulun luk naluk lun denganneh idi pebala, “Ui marot mo',” mepad kudeng lemulun luk meruden luk marot ku sinapang.

²⁰ Kudeng na kayuh, apui maté; kudeng na ngatum buri', kedaluh uen ngedo'.

²¹ Dereng idi kayuh ngulun apui, idi lun luk ngatum buri' ngekadang kedaluh.

²² Ngatum buri' pelaba do' én, pad tau do' pian nelen idi.

²³ Lemulun luk mapot bala mepad kudeng berinis luun kuden.

²⁴ Lemulun luk siayu ngalum gatehneh ku bala luk do' pedingeren,

²⁵ iamo' aleg manu ku balaneh, ngaceku niatneh mepanu' ku gateh.

²⁶ Sagan tu pana' ieh ngalum gatehneh, iamo' amung-amung lemulun miak nier kekamenneh luk dat.

²⁷ Lemulun luk tumen abpung kuan lun baken mekaneh abpung ineh teh. Lemulun luk ngukat lubang mebpeh bang ineh.

²⁸ Lemulun luk megateh inan lun baken sikal ngurat neneh ku balih. Bala luk mapot ngacing usag.