BALE' 25 - BALA LUK DO'

Balé' Selimun Teh

¹ Ini teh balé' Selimun luk inayud lemulun bang ruma' Hesekia, raca' Yahuda.

² Kai ngubur Allah ngaceku luk uenNeh ngalum. Kai ngubur raca'-raca' ngaceku luk uendeh ngegala'.

³ Mikat kali' terawé raca'. Terawéneh meluun dita' ratnan langit idi meluun dalem ratnan abpa' rayeh, pad na miak kali' kai.

⁴ Kudeng pirak uen ngeligan, lun luk mileh miak nganau' sidangur luk pelaba do'.

⁵ Aleg nima' lemulun luk dat mada' raca', pad imetneh miak buren ngaceku mesiri.

⁶ Kareb iko tuped pa kiung raca', aleg siayu idi ngedita' bururmu.

⁷ Meluun do' iko uenneh ngedita' ratnan iko uenneh ngebeneh pad lun baken ngalap su luk inanmu.

⁸ Aleg iko miket amé' besara' ratnan luk nekali'mu. Kudeng lun nekali' luk baken kali' balamu sala', anunké luk miak ruenmu?

⁹ Kudeng iko idi lun denganmu pekedaluh, do' medueh sebuleng pedo'. Iamo' aleg ngegala' luk inalum lun baken,

¹⁰ pad iko na uen lun luk ninger ngesala', idi iko na migu'.

¹¹ Bala luk petulu mepad kudeng bua' amas luk inau' bang pirak.

¹² Bada' lemulun luk inan ileh kuan lemulun luk pian ninger meluun raga ratnan susing amas, idi bané amas luk pelaba do'.

¹³ Lun duken luk inan merapet ngawang niat lemulun luk ngecuk neneh, mepad kudeng abpa' luk meteneb kareb ngeranih.

¹⁴ Lemulun luk na maré luk pijani'deh, mepad kudeng laput idi bui luk na nguit udan.

¹⁵ Ubuk dengan ulai niat miak ngelaya' lemulun luk metueh niat, pad lun rayeh pana' miak buken.

¹⁶ Aleg pelaba akan duru' tebikan, pad iko na kuta'.

¹⁷ Aleg iko megéi' umak ruma' lun denganmu, pad ieh na melibo nier namu, idi megateh namu.

¹⁸ Lemulun luk mebalih ratnan lun luk denganneh megalih mepad kudeng pelapet, ileb, idi tuno.

¹⁹ Kudeng merapet inan lemulun luk na lutep kareb inan susa', ieh ineh mepad kudeng kuman ku lipen luk megué idi nalan dengan mekio'.

²⁰ Kudeng menani kuan lemulun luk meberat niat, ieh ineh mepad kudeng nganau' tucu' bang uratneh, idi mepad kudeng lungu kareb meteneb.

²¹ Kudeng bunu'mu melau, do' maman neneh; kudeng ieh meparing, maré luk rupenneh,

²² pad ieh migu'. Idi Tuhan miak ngua' kuanmu.

²³ Ngatum buri' ngacing gateh, mepad kudeng bui rat pa tinueh busat aco ngacing udan.

²⁴ Meluun do' tudo déi' parung ratnan pamung ruma' dengan decur luk dat buri'.

²⁵ Bala luk do' rat bawang luk mado mepad kudeng abpa' luk meteneb kareb iko meparing.

²⁶ Lemulun luk do' luk melaya' pa kiung lemulun luk dat mepad kudeng bued abpa' luk melutut, idi subuk luk inan luk megalih.

²⁷ Pelaba ula' duru' tebikan dat bang batekmu. Kudeng ineh teh lemulun luk megéi' pian buren.

²⁸ Kudeng iko na miak ngimet usehmu, iko melaya' mepad kudeng aceh bawang luk malé uen ngaro ngaceku na libung.