BALE' 24 - BALA LUK DO'

–19–

¹ Aleg melili ku kekamen lemulun luk dat, idi aleg perurum nedeh.

² Ideh megéi' ngerawé nganau' ria'. Kareb ideh pebala ideh ngurat niat lemulun.

–20–

³ Ruma'-ruma' piduten luun alen ileh idi do' kali'.

⁴ Kudeng inan ileh, amung takep uen ngayung ku luk meraga idi luk do' taga.

–21–

⁵ Ileh meluun do' ratnan tueh, idi do' kali' meluun rayeh ratnan lalud.

⁶ Ngaceku tueh bang bunu' macing ratnan terawé luk mileh, idi kudeng iko badén lun mileh iko miak metueh.

–22–

⁷ Lemulun luk mebacé na kali' ilung bala lemulun luk mileh. Na luk belénneh kareb inan gayam luk tu-tu.

–23–

⁸ Kudeng iko megéi' ngerawé nganau' luk dat, iko miak tetanen lemulun luk ngacing ria'.

⁹ Luk teruayen lemulun luk mebacé mesala' mo'. Lun mula' megateh inan lemulun luk megéi' situnga nelun baken.

–24–

¹⁰ Kudeng iko melaya' kareb inan susa', kali' rungen iko melaya' tu-tu.

–25–

¹¹ Aleg merapang muit lemulun luk kamen pad ieh pitayen.

¹² Kian, iko ngerawé baken ineh kekamenmu lek. Iamo' Allah kali' idi mutut ukum maya' terawé niatmu. Ieh nier namu, Ieh kali', idi Ieh ngua' lemulun maya' kekamendeh.

–26–

¹³ O Asi, do' kuman duru', ngaceku ieh do'. Ngaceku mepad kudeng duru' ratnan tapih do' én luun dila'mu,

¹⁴ kudeng ineh teh ileh idi do' kali' pelaba do' kuan ulunmu. Ngalap ineh pad iko uen ngeperuan.

–27–

¹⁵ Aleg iko ngerawé ratnan mano luk bang ruma' lemulun luk do', idi aleg ngusag ruma'neh. Kekamen ineh dat.

¹⁶ Kudeng lemulun luk do' metebaceng ku susa', ieh megéi' tumui. Iamo' lemulun luk dat na tumui ratnan susa'neh.

–28–

¹⁷ Kareb bunu'mu mekaneh susa', aleg iko mawang niat.

¹⁸ Ngaceku Tuhan miak kali' terawému ineh. Idi na Ieh mawang niat. Kian na Ieh ngukum bunu'mu ineh lek.

–29–

¹⁹ Aleg iko mesabeng ku lemulun luk dat; idi aleg melili ku kekamendeh.

²⁰ Lemulun luk dat na luk inanneh merapet muci.

–30–

²¹ O Asi, do' matot inan Tuhan, idi matot inan raca' pana'. Idi aleg perurum nan lemulun luk inan terawé luk baken.

²² Ngaceku susa' miak macing denak-denak kuan bururdeh. Naké iko kali', Allah idi raca' miak ngacing ukum luk pelaba rayeh?

Tuda'-Tuda' Bala Ileh Teh

²³ Lemulun luk mileh pangeh nepebala kudeng ini teh: Kudeng lun luk mutut besara' mili' lemulun, ieh mesala'.

²⁴ Kudeng ieh mala lun mesala' na mesala', ieh miak uen ngediman idi inan amung lemulun megateh.

²⁵ Lun luk mutut besara' luk ngukum nelun mesala' miak uen ngeperuan idi ngalap ngadan luk do'.

²⁶ Or luk matu, ieh ineh tanu' rurum luk matu.

²⁷ Do' nganau' lati'mu atun, pad inan petap akan. Pangeh ineh idi iko mudut ruma'.

²⁸ Aleg ngadu' nelun denganmu dengan na punneh, idi aleg ngedat neneh mo'-mo'.

²⁹ Aleg pebala, “Ui pian ngua' luk inau' neh kuanku! Kali' rungen ui ngua' neneh!”

³⁰ Ui nenalan lemaba lati' idi kabun anggur lemulun luk mekupé idi mebacé.

³¹ Idi inan mula' tabpa' idi uduh. Ar batu pana' pangeh neluka'.

³² Ui nenier idi nengerawé ratnan ineh pad ui nesibada'.

³³ Rudap segageh, medacep mateh. Telubid ngato erurmu,

³⁴ iamo' laba' iko rudap asi' miak munu' namu mepad kudeng lun mano luk temina' ku pelapet.