BALE' 23 - BALA LUK DO'

–6–

¹ Kareb iko pamung kuman dengan lemulun luk mebala, do' matar do'-do'.

² Kudeng iko melau, ngimet bururmu.

³ Aleg iko manga ku akanneh luk do'. Kian, ieh pana' nutun namu lek.

–7–

⁴ Aleg iko ngabud tuehmu nakap binaweh.

⁵ Usinmu saget mabud, idi temulud mepad kudeng kanui.

–8–

⁶ Aleg iko kuman iring téng lemulun luk meramen, idi aleg iko manga ku akanneh luk do'.

⁷ Kebalaneh, “Kuman do'-do',” iamo' na ieh pian maré. Setuneh niat lemulun ineh mepad kudeng luk teruayenneh.

⁸ Luk kinanmu ineh uenmu nguta', idi na ulek ileh tangmu.

–9–

⁹ Aleg pebala inan lemulun luk mebacé, ngaceku na ieh kali' ilung balamu luk mileh.

–10–

¹⁰ Aleg ngiuk lakan tana' luk mon, idi aleg ngalap tana' anak maté.

¹¹ Tuhan luk melalud ngedengan nedeh bang besara' pad iko na metueh.

–11–

¹² Ninger bala gurumu, idi ngalap amung bada'neh.

–12–

¹³ Aleg matot mada' anak. Kudeng ieh bebalen na ieh maté.

¹⁴ Setuneh ieh miak uen ngulun ku luk kudeng ineh.

–13–

¹⁵ O Asi, kudeng iko mileh, pelaba awang niatku.

¹⁶ Idi teh ui pelaba awang niat kareb ui ninger namu pebala dengan ileh.

–14–

¹⁷ Aleg melili ku kekamen lemulun luk mesala'. Do' ulunmu lutep bang Tuhan anid-anid aco.

¹⁸ Kudeng pieh kudeng ineh, iko uen ngeperuan muci.

–15–

¹⁹ O Asi, do' iko ninger pad iko mileh, idi ngerawé do'-do' ratnan ulunmu.

²⁰ Aleg perurum inan lemulun luk ucet ngirup idi luk manga.

²¹ Lun luk mabuk idi lun luk manga kali' rungen ideh amé' masi'. Kudeng iko kuman idi rudap mo', iko miak lubpa.

–16–

²² Do' ninger bala tamanmu. Baken ratnan tamanmu na iko mulun. Kareb tinanmu mengered do' méi' neneh.

²³ Luk matu, ileh, bada', idi do' kali' petulu belien, iamo' aleg masui ineh.

²⁴ Taman lemulun luk matu kali' rungen mawang niat. Idi petulu tau mawang niat ku anak luk mileh.

²⁵ Do' iko ngawang niat taman-tinanmu.

–17–

²⁶ O Asi, do' iko ninger balaku, idi lutep maya' bada'ku.

²⁷ Decur luk mesawa' idi decur luk pasét mangun ku abpung kuanmu.

²⁸ Ideh ngabang namu mepad kudeng lun mano idi ngeraruh mula' deléi.

–18–

^29-30 Lemulun luk ucet ngirup idi nutun tuda'-tuda' luk rupen megéi' mesusa' idi meberat niat. Ieh megéi' medureng idi ngacing ria'. Matehneh mesia' idi bururneh merirem mo'-mo'.

³¹ Aleg iko meraruh ku abpa' anggur luk do' sia', pad iko miak nier kiungmu bang sangkir ineh, idi pelaba do' ayuneh sirenmu.

³² Kekipedneh iko mét mepad kudeng luk kitep menipeh luk megalih.

³³ Idi mula' luk baken-baken sirenmu, idi iko na miak ngerawé idi pebala dengan melio.

³⁴ Iko mepad kudeng lemulun luk mabuk maya' kapal luun abpa' rayeh, idi luk mepatud ratnan paped dirineh luk déi' dita'.

³⁵ Kebalamu, “Ui pangeh dicat idi bibal. Iamo' na ui kali' ineh. Ngudehké ui na kulat? Ui pian ngirup teh.”