BALE' 22 - BALA LUK DO'

¹ Meluun do' iko buren ngaceku kekamenmu luk do', ratnan iko mebala ngaceku mula' binaweh.

² Lun do' idi lun masi' mepad mo', ngaceku Tuhan nemudut nedeh.

³ Lemulun luk mileh, kali' acing susa', pad ieh buro, iamo' lemulun luk na mileh ngerawé petacu matun susa', idi muci ieh nginuud.

⁴ Kudeng iko matot inan Tuhan idi mebeneh niat, iko mangun ku lun do', idi ngalap ubur idi ulun luk mekadang.

⁵ Kudeng iko pian matar bururmu, do' iko ngado bururmu ratnan abpung luk tinen kuan lemulun luk dat.

⁶ Kudeng iko mada' anak ratnan ulun luk petulu, ieh miak ngerawé ineh ruked ulunneh.

⁷ Lun masi' mangun ku demulun lun do'. Kudeng iko ngabit usin, iko mangun ku demulun léi luk kuan usin ineh.

⁸ Idé-idé luk nibu luk dat, kali' rungen ieh ngeranih dereh, ieh ineh aceh ukum luk ngusag neneh.

⁹ Do' iko mekatu, idi maré aceh babpat akanmu kuan lun masi', idi iko miak uen ngeperuan.

¹⁰ Masut lemulun luk medita' niat, pad ngagka' pesaad, pekedaluh, idi ngedat.

¹¹ Raca' miak mangun ku rurummu ngaceku mileh tang. Iamo' Tuhan mawa nan lemulun luk matu.

¹² Tuhan matar bala luk matu, iamo' Ieh ngagka' bala lemulun luk mebalih.

¹³ Lemulun luk mekupé tudo déi' ruma'. Kebalaneh, ieh miak kenen balang kudeng ieh mepai.

¹⁴ Pasét, ieh ineh aceh abpung luk ngakem lemulun luk inan Tuhan megateh.

¹⁵ Anak pekalai nganau' luk mebacé, iamo' kudeng ieh bebalen ieh sibada' nganau' luk do'.

¹⁶ Kudeng iko maré baré kuan lun do' idi ngedereh nelun masi' pad iko mangun ku lun do', kali' rungen iko mangun ku lun masi'.

Teluh Ngepulu' Bala Ileh

¹⁷ Do' ninger, idi ui miak mada' namu ratnan luk bila lun luk mileh. Sibada' ku bada'deh,

¹⁸ pad iko mawang niat ngerawé baladeh idi mileh ngapal ineh.

¹⁹ Pianku pad iko merapet inan Tuhan. Ini punneh ui pian mada' bala ineh namu nekini.

²⁰ Ui pangeh nengayud teluh ngepulu' bala kuanmu luk inan ileh idi bada', pad iko sibada' ilung bala luk matu.

²¹ Idi iko miak mare or luk petulu kuan lemulun luk ngitun namu ratnan luk matu.

–1–

²² Aleg ngaro binaweh lun masi' ngaceku ieh melaya', idi aleg ngedereh lemulun luk mesusa' bang besara'.

²³ Ngaceku Tuhan ngedengan nedeh, idi Ieh ngukum lemulun luk ngukum nedeh.

–2–

²⁴ Aleg perurum nan lemulun luk malé museh,

²⁵ pad iko na metebaya' ku lawédeh idi mekaneh abpung.

–3–

²⁶ Aleg iko pejani' mayar baleh dulun.

²⁷ Ngaceku kudeng iko na miak mayar, ideh miak ngalap tarubmu.

–4–

²⁸ Aleg iko ngiuk lakan tana' luk litep tepunmu.

–5–

²⁹ Lemulun luk mileh bang kekamenneh miak ngakem kuan raca' idi baken kuan lun dat.