BALE' 21 - BALA LUK DO'

¹ Tuhan ngimet terawé raca', mepad kudeng Ieh nenganau' dalan abpa'.

² Sagan tu pana' iko ngerawé kekamenmu matu, Tuhan luk nier terawé niatmu.

³ Kekamen lemulun luk matu idi mesiri, meluun do' pa kiung Tuhan ratnan maré baré.

⁴ Mesido' niat idi medita' niat mangun ku tanu' lemulun luk dat.

⁵ Lemulun luk mekél idi ngarawé atun, ngalap peruan, iamo' lemulun luk miket niat kali' rungen masi'.

⁶ Binaweh luk lapenmu dengan dalan luk tekilu' saget metutu' idi kekamen luk kudeng ineh nguit namu macing inan até.

⁷ Lemulun luk dat kamen ku datdeh sebuleng. Ideh ara' nganau' luk matu.

⁸ Lemulun luk inan sala' maya' dalan luk tekilu'. Iamo' lemulun luk na mesala' nganau' luk matu.

⁹ Meluun do' tudo' déi' parung ratnan pamung ruma' dengan decur luk dat buri'.

¹⁰ Lemulun luk dat melau ku kekamen luk dat, idi na ideh méi' nan lemulun.

¹¹ Kudeng lemulun luk medita' niat mekaneh ukum, lemulun luk dat ileh pana' sibada'. Lemulun luk mileh miak sibada' ratnan luk badén kuanneh.

¹² Lemulun luk matu kali' terawé lemulun luk dat, pad ieh miak ngukum nedeh.

¹³ Kudeng iko ara' ninger putuh lun masi', putuhmu pana' na miak pedingeren.

¹⁴ Kudeng seburur lemulun museh namu, aceh baré dengan lulem miak ngagka' usehneh.

¹⁵ Ukum luk matu ngawang niat lemulun luk do', iamo' ngesusa' niat lemulun luk dat.

¹⁶ Lemulun luk meraruh ratnan dalan ileh macing inan até.

¹⁷ Lemulun luk pian ngalap mula' binaweh, abpa' anggur, idi akan luk do' na mangun ku lun do'.

¹⁸ Lemulun luk dat pian ngacing dereh kuan lemulun luk do', iamo' setuneh ideh luk mekaneh dereh.

¹⁹ Meluun do' tudo déi' su luk ali-ali ratnan pamung ruma' nan decur luk medureng idi dat buri'.

²⁰ Bang ruma' lemulun luk mileh inan binaweh luk do' idi luk meraga. Iamo' lemulun luk mebacé makai usinneh mo'-mo'.

²¹ Kudeng iko do' idi méi' nelun baken, idi ulunmu mekadang; iko miak buren idi na saluken lun baken.

²² Lun rayeh pebunu' luk mileh miak ngaro bawang luk pinatar lemulun luk metueh idi miak ngusag libung luk inandeh merapet.

²³ Kudeng iko na pian mekaneh susa', matar do'-do' ratnan luk belénmu.

²⁴ Lemulun luk medita' niat kali' rungen mesido' niat, idi ngadanneh, ieh ineh “Situnga”, idi ieh nganau' luk amung-amung dengan dita' niatneh.

²⁵ Lemulun luk mekupé ngaté bururneh sebuleng, ngaceku ieh ara' ngakem.

²⁶ Ieh megéi' ngerawé ratnan luk pianneh mo'. Iamo' lemulun luk matu miak maré dengan mekatu.

²⁷ Tuhan megateh inan baré lemulun luk dat, meluun teh kudeng ieh maré dengan terawé luk na petulu.

²⁸ Lemulun na manu ku luk nekali' lun luk mebalih. Iamo' ideh merapet inan bala lemulun luk mileh ngerawé.

²⁹ Lemulun luk matu na merapang; iamo' lemulun luk dat kali' rungen siayu.

³⁰ Amung bada', bala, idi ileh lemulun na ulekneh pa kiung Tuhan.

³¹ Iko miak temina' ku kuda pad amé' pebunu', iamo' Tuhan luk maré namu metueh.