BALE' 20 - BALA LUK DO'

¹ Borak naluk idi arak ngacing kedaluh. Idé-idé luk rinaruh ku ineh mebacé.

² Do' matot inan raca' luk megateh niat, mepad kudeng iko matot ku balang luk ngeku. Kudeng iko nganau' neneh museh, iko ngacing até kuan bururmu sebuleng.

³ Lemulun luk mebacé miak pekedaluh; iamo' meluun do' na maya' lemulun luk pekedaluh ineh.

⁴ Lemulun luk mekupé pad ieh na ngeradu lati'neh bang kareb luk petulu, na luk perinien.

⁵ Terawé lemulun mepad kudeng abpa' bang subuk luk medalem, iamo' lemulun luk do' kali' miak ngook abpa' ineh.

⁶ Mula' lemulun mada' bururdeh lutep idi inan merapet, iamo' idéké luk kali' lemulun luk inan merapet.

⁷ Samal kuan anak luk inan taman luk mesiri idi luk nganau' luk matu.

⁸ Raca' luk mutut besara' miak ngiti luk dat.

⁹ Idéké miak pebala, “Niatku meligan; amung sala'ku pangeh tila' ”?

¹⁰ Tuhan megateh ku timang idi uad luk na matu.

¹¹ Kekamen anak ngegala' terawé idi ulunneh, pad iko miak kali' kudeng ieh mesiri idi matu.

¹² Tuhan pangeh nemaré mateh pad tau nier, idi lalid pad tau ninger.

¹³ Kudeng iko megéi' rudap, kali' rungen iko masi'. Do' iko mekél ngakem, pad iko inan akan.

¹⁴ “Pelaba ikat,” kebala lemulun luk melih. Iamo' kareb ieh nalan, ieh medita' niat ku luk bilihneh.

¹⁵ Bala luk mileh meluun raga ratnan amas idi batu luk meraga.

¹⁶ Lemulun luk pejani' mayar baleh lemulun luk inanneh na pekalai mebacé, idi petulu binaweh lemulun luk pejani' ineh lapen ku dudukneh.

¹⁷ Luk lapenmu dengan dalan luk tekilu' do' én kuanmu, iamo' muci ieh mepad kudeng bada bang tangmu.

¹⁸ Kudeng iko badén, luk ruenmu miak mangun. Aleg petacu amé' pebunu' dengan na atur.

¹⁹ Lun luk ngatum buri' na miak ngalum anun-anun. Buro ratnan lemulun luk pelaba ula' buri'.

²⁰ Kudeng iko ngediman taman-tinanmu, ulunmu miak mabud, mepad kudeng lapung luk milep kareb medacem.

²¹ Kudeng iko malé ngalap binaweh, kekipedneh na luk idi peruan kuanmu.

²² Aleg iko sebuleng ngua' dat dulun, iamo' do' merapet inan Tuhan, idi Ieh miak nganau' namu matu.

²³ Tuhan megateh inan lemulun luk makai timang idi uad luk na matu.

²⁴ Tuhan pangeh nengeletep dalan kuan tau; kudeng apehké seburur miak kali' ratnan ulunneh sebuleng?

²⁵ Ngerawé do'-do' kareb nateh iko maré aceh baré kuan Allah, pad iko na nginuud muci.

²⁶ Raca' luk mileh miak tunap lemulun, pad ieh kali' lemulun luk dat, idi ngukum neneh dengan na méi'.

²⁷ Roh lemulun, ieh ineh mepad kudeng lapung Tuhan luk ngelio teruayen niatneh.

²⁸ Imet raca' luk lutep, mesiri, idi matu, na miak uen ngagka'.

²⁹ Taga anak adi', ieh ineh tuehneh, idi ubur lun merar, ieh ineh abpukneh luk mebuda'.

³⁰ Rabpu'-rabpu' tau mekaneh susa', pad ulun tau misu'.