BALE' 2 - BALA LUK DO'

Tabpar Ileh

¹ O anakku, do' iko sibada' luk badénku namu, idi aleg iko mekelupan luk dukenku namu.

² Ninger amung bada' luk inan ileh, idi nakap ilungneh.

³ Do' iko mutuh ileh idi do' kali'.

⁴ Nakap ineh mepad kudeng nakap pirak idi binaweh luk meraga luk inapung.

⁵ Kudeng iko nganau' kudeng ineh, iko miak kali' ilung matot inan Tuhan, idi iko miak sibada' ratnan Allah.

⁶ Tuhan, ieh ineh luk maré ileh. Ileh idi do' kali' macing rat Neneh.

⁷ Ieh ngedengan idi matar lemulun luk matu idi luk mesiri.

⁸ Idi teh Ieh matar lemulun luk nganau' luk mesiri pa kiung lun baken, idi ngelibung lemulun luk mawa Neneh.

⁹ Kudeng iko ninger balaku, iko miak kali' luk matu, luk mesiri, idi luk muned. Iko miak kali' luk petulu ruenmu.

¹⁰ Idi iko mangun mileh idi mawang niat.

¹¹ Ilehmu idi terawému luk matu miak matar namu,

¹² idi ngimet namu, pad iko na nganau' sala'. Ileh idi terawému luk matu ineh miak matad namu ratnan lemulun luk nganau' kedaluh ratnan baladeh,

¹³ ieh ineh lemulun luk nenecan ulun luk matu, pad ideh tudo bang dacem sala'.

¹⁴ Lemulun ineh mawang niat nganau' sala' idi kekamen luk dat.

¹⁵ Lemulun luk tekilu' ineh na inan merapet.

¹⁶ Idi iko miak ngarung decur luk mesawa' luk nutun namu ku balaneh luk do'.

¹⁷ Ieh na lutep inan awanneh sebuleng, idi mekelupan jani'neh luk meligan.

¹⁸ Kudeng iko umak ruma'neh, iko maya' dalan macing inan até idi su luk inan até pana'.

¹⁹ Lemulun luk ngikak neneh na lemubed. Ieh na lemubed maya' dalan ulun.

²⁰ Do' iko maya' dalan lemulun luk do', idi nganau' luk matu.

²¹ Lemulun luk matu idi mesiri mo' miak tudo bang bawang tau ini.

²² Iamo' Allah miak nala' lemulun luk dat rat bang bawang ini, idi mubput lun mesala' mepad kudeng mubput tibu rat bang tana'.