BALE' 19 - BALA LUK DO'

¹ Lemulun luk masi' luk nganau' luk mesiri meluun samal ratnan lemulun luk mebacé luk mebalih.

² Geregan dengan na ileh na do'. Mesaget niat ngacing susa' kuanmu.

³ Inan lemulun luk ngedat ulundeh sebuleng ku kekamendeh luk mebacé, idi pangeh ineh ideh ngesala' Tuhan.

⁴ Lun do' megéi' ngalap rurum luk mebaruh, iamo' rurum lun masi' megéi' necan nedeh.

⁵ Kudeng iko mebalih bang besara', kali' rungen iko kumin.

⁶ Mula' lemulun pian denganin lemulun luk mekatu. Idi amung lemulun pian mangun ku rurum lemulun luk megéi' maré luk barén.

⁷ Kinanak lemulun luk masi' na pian ku ieh. Kali' rungen na rurumneh. Sagan tu pana' ieh nakap rurum, nateh luk idi.

⁸ Kudeng iko mawa ku bururmu sebuleng do' iko sibada', idi ngimet amung luk ilapmu pad iko uen ngeperuan.

⁹ Lemulun luk mebalih bang besara' miak kumin, idi lemulun luk mebalih miak maté.

¹⁰ Na petulu lemulun luk mebacé mulun dengan mula' binaweh, idi na petulu demulun ngimet lun do'.

¹¹ Lemulun luk inan ileh na malé museh. Kudeng lemulun mesala' namu, meluun do' na ngerawé ineh.

¹² Useh raca' mepad kudeng arod balang, iamo' éi'neh mepad kudeng udan bang kareb luk petulu.

¹³ Anak deléi luk mebacé miak ngabud amung binaweh tamanneh. Decur luk megéi' museh inan awanneh mepad kudeng uni abpa' luk mebpeh kidi-kidi.

¹⁴ Seburur deléi miak ngalap ruma' idi usin ratnan taman-tinanneh, iamo' Tuhan mo' sebuleng miak maré seburur decur luk mileh ku awanneh.

¹⁵ Kudeng iko mekupé idi rudap kidi-kidi, kali' rungen iko melau.

¹⁶ Maya' amung ukum Allah, pad ulunmu mekadang. Kudeng iko ngelaba ukum ineh iko miak maté.

¹⁷ Kareb iko maré kuan lun masi', ieh ineh mepad kudeng kebiten Tuhan, ngaceku Tuhan ngua' luk birému ineh.

¹⁸ Mada' anakmu kareb ideh isuut, pad ideh mileh. Kudeng na, iko ngacing dereh kuandeh.

¹⁹ Kudeng lemulun malé megateh niat, nima' neneh ngalap uli'neh. Kudeng iko ngedengan neneh, kali' rungen iko mesusa' muci.

²⁰ Ninger ubuk idi ngalap bada', idi muci iko mangun mileh.

²¹ Lemulun inan mula' terawé ratnan luk miak ruenneh, iamo' pian Tuhan mo' luk miak mangun.

²² Lemulun luk manga kali' rungen migu'. Lemulun luk masi' meluun samal ratnan lemulun luk mebalih.

²³ Matot inan Tuhan pad ulunmu mekadang, idi iko do' udeng idi na inan susa'.

²⁴ Inan lemulun luk pelaba kupé, pad ideh na pian nganau' nuba' bang tangdeh.

²⁵ Medita' niat petulu kumin, pad lemulun luk dat ileh miak sibada'. Lemulun luk mileh sibada' kareb ieh badén.

²⁶ Lemulun luk nganau' luk dat kuan tamanneh idi luk ngecuk tinanneh buro, pelaba dat, idi ngacing igu'.

²⁷ O Asi, kudeng iko ugka' sibada', kali' rungen iko mekelupan luk pangeh nekali'mu.

²⁸ Na luk idi ukum luk mesiri kudeng seburur lun nekali' pian ngedereh seburur lemulun. Luk dat pelaba én kuan lemulun luk dat.

²⁹ Lun mebacé luk medita' niat kali' rungen bebalen.