BALE' 18 - BALA LUK DO'

¹ Lemulun luk na do' rurum nelun baken ngerawé bururneh sebuleng mo'. Ieh na petulu dengan luk matu siren lun baken.

² Lemulun luk mebacé na pian ku ileh; iamo' ieh pian ngegala' terawéneh sebuleng.

³ Sala' idi igu' perurum, idi kudeng iko mebpeh iko uen ngebeneh.

⁴ Bala lemulun miak mangun ku aceh bued ileh, medalem mepad kudeng abpa' rayeh, idi do' lio mepad kudeng abpa' arur.

⁵ Bang besara' na petulu méi' nan lemulun luk sala', pad lemulun luk mesiri na ruen matu.

⁶ Kareb lemulun luk mebacé ngimun pesaad, ieh mutuh bebalen.

⁷ Kareb lemulun luk mebacé pebala, ieh ngacing susa' kuan bururneh sebuleng, ieh mekaneh abpung ku balaneh sebuleng.

⁸ Bala lemulun luk ngatum buri' mén kuan lun baken, pad ineh macing bang niatdeh.

⁹ Lemulun luk mekupé ngakem, mepad kudeng lemulun luk ngusag kekamen dulun.

¹⁰ Ngadan Tuhan mepad kudeng aceh pudut luk meraban, su luk inan lemulun luk matu miak sigapung.

¹¹ Lun do' ngerawé binawehdeh ngelibung nedeh, mepad kudeng libung batu luk ngelibut aceh bawang.

¹² Lemulun luk mebeneh niat mo' miak buren. Lemulun luk medita' niat ngacing susa' kuan bururneh sebuleng.

¹³ Ninger do'-do' kareb nateh iko ngor bala, pad iko na mebacé idi nguyo.

¹⁴ Kudeng lemulun luk mét pian mulun inan rapet kuanneh. Kudeng ieh na pian mulun, na rapetneh.

¹⁵ Lemulun luk mileh geregan sibada'.

¹⁶ Pianké iko papu' lemulun luk mebala? Do' nguit aceh baré kuanneh idi na susa'.

¹⁷ Ayu lemulun luk pun-pun pebala bang besara' matu, kareb nateh bunu'neh ngimun ngitun neneh.

¹⁸ Kareb dueh burur lemulun luk melalud besara', kedaluh didueh uen mutut makai udi.

¹⁹ Kudeng iko ngedengan kinanakmu, ieh miak matar namu mepad kudeng aceh libung batu luk ngelibut bawang. Iamo' kudeng iko ngedaluh neneh, ieh miak ngitek tanga'neh kuanmu.

²⁰ Bua' amung-amung balamu ruenmu mabeh.

²¹ Balamu miak ngulun idi ngaté. Iko luk kuman amung bua' balamu.

²² Lemulun luk ngalap decur ku awanneh, ngalap luk do'. Megala' Tuhan méi' kuanneh.

²³ Kareb lemulun luk masi' pebala, ieh mutuh mo', iamo' lun do' ngor balaneh dengan medita' niat.

²⁴ Inan lemulun luk siayu mangun ku rurum. Iamo' inan rurum luk meluun lutep ratnan kinanakmu sebuleng.