BALE' 17 - BALA LUK DO'

¹ Meluun do' kuman ruti luk dat dengan mawang niat ratnan amé' ku irau bang ruma' luk mepanu' ku kedaluh.

² Demulun luk mileh miak ngimet pa luun anak tuanneh luk na mayu, pad ieh ngalap aceh babpat binaweh tuanneh.

³ Amas idi pirak tetunin ku apui, idi niat lemulun tetunin Tuhan.

⁴ Lemulun luk dat ninger gayam luk dat, idi lemulun luk mebalih ninger bala luk mebalih.

⁵ Kudeng iko situnga nan lemulun luk masi', iko situnga nan Allah luk nemudut neneh. Lemulun luk mawang niat ku susa' dulun, kali' rungen miak kumin.

⁶ Tepun-tepun mawang niat ku mupundeh, idi anak-anak deléi mawang niat ku tamandeh.

⁷ Lemulun luk buren na mebalih, iamo' bala lemulun luk mebacé na ulekneh.

⁸ Lemulun luk merapet ku suap ngerawé ideh miak ngalap anun-anun ku libalneh.

⁹ Kudeng iko pian ku lemulun mawa namu, do' maré do' nedeh kareb ideh mesala' namu. Kudeng iko ngerawé sala'deh, iko ngusag rurum muyuh.

¹⁰ Sebuleng bada' kuan lemulun luk mileh meluun rayeh ulek ratnan meratu babal kuan lemulun luk mebacé.

¹¹ Até miak macing mepad kudeng lun duken luk mesangit kuan lemulun luk dat luk megéi' ngacing ria'.

¹² Meluun do' papu' beruang tineh luk museh ku anakneh luk na idi, ratnan papu' lemulun luk mebacé luk nganau' kekamenneh luk mebacé.

¹³ Kudeng iko ngua' do' ku dat, kali' rungen iko na mepuit ratnan luk dat bang tetek ruma'mu.

¹⁴ Pun kedaluh mepad kudeng leleng abpa' luk ngimun mepasu. Ngaang neneh pad ieh na amé' rayeh.

¹⁵ Tuhan megateh nan lemulun luk ngukum lemulun luk na mesala' idi luk muit lemulun luk mesala'.

¹⁶ Anunké ulekneh lemulun luk mebacé maré usin ku mayar sekola' kudeng ieh na mileh?

¹⁷ Lun rurum megéi' ngegala' awadeh. Idi kinanak lemulun ngedengan neneh kareb inan susa'.

¹⁸ Lemulun luk mebacé mo' pejani' mayar baleh lun denganneh.

¹⁹ Lemulun luk pian ku sala' pian ngacing kedaluh. Lemulun luk nengadan nakap susa'.

²⁰ Lemulun luk ngerawé idi pebala luk dat na ngalap luk do' — iamo' susa' mo'.

²¹ Anak luk nganau' luk mebacé ngacing susa' idi dereh kuan tamanneh.

²² Awang niat maré namu do' ulun, iamo' berat niat ngelaya' bururmu.

²³ Lun luk tekilu' luk mutut besara' ngalap suap dengan lulem, pad ideh mutut ukum luk na mesiri.

²⁴ Lemulun luk mepiteb kali' luk petulu ruenneh, iamo' lemulun luk na petap terawé na mileh mutut.

²⁵ Anak luk mebacé ngacing susa' kuan tamanneh, idi terawé luk dat kuan tinanneh.

²⁶ Na petulu ngecuk lemulun luk na mesala' mayar ukum. Kudeng lemulun luk matu bebalen, ini mangun ku ukum luk tekilu'.

²⁷ Lemulun luk lutep terawé na pelaba ula' buri'. Lemulun luk na megagau inan ileh.

²⁸ Idi lemulun luk mebacé pana' mileh siren lun baken kudeng ieh pirud idi na megagau.