BALE' 16 - BALA LUK DO'

¹ Lemulun ngegala' terawédeh, iamo' or luk matu ineh ratnan Allah.

² Iko ngerawé luk ruenmu matu, iamo' Tuhan nier pinian niatmu.

³ Maré amung kekamenmu kuan Tuhan, idi luk ruenmu miak mangun.

⁴ Amung-amung luk inau' Tuhan inan ulekneh; idi kekiped lemulun luk dat ineh até.

⁵ Tuhan megateh inan lemulun luk medita' niat, idi kali' rungen ieh na puatin ratnan ukum.

⁶ Do' iko méi' nelun idi lutep maya' jani', idi Allah maré do' ratnan sala' mu. Do' iko matot inan Tuhan, idi luk dat na miak macing namu.

⁷ Kareb iko maya' pian Tuhan, bunu'mu miak mangun ku rurummu.

⁸ Meluun do' sesuut binaweh luk ilap maya' dalan luk mesiri, ratnan mula' binaweh luk ilap maya' dalan luk tekilu'.

⁹ Iko mili' dalan luk bénmu, iamo' Allah ngeletep amung lawému.

¹⁰ Allah ngedengan bala raca'; pad ieh na sala' kareb ieh mutut ukum.

¹¹ Tuhan pian ku timang, idi uad luk matu, idi teh raga luk petulu.

¹² Raca'-raca' megateh inan luk dat, ngaceku luk mesiri ngeletep imetdeh.

¹³ Raca' pian ninger bala luk matu, idi ieh méi' inan lemulun luk na mebalih.

¹⁴ Lemulun luk mileh sikal ngawang niat raca'. Kudeng raca' megateh niat lemulun miak pitayen.

¹⁵ Ei' raca' ngacing ulun mepad kudeng laput luk ngacing udan kareb pun amé' lati'.

¹⁶ Meluun do' ngalap ileh idi do' kali' ratnan amas idi pirak.

¹⁷ Lemulun luk do' mili' dalan luk mado ratnan luk dat. Lemulun luk matar lawéneh nginita ulunneh.

¹⁸ Dita' niat ngacing até, idi lemulun luk mesido' niat mebpeh.

¹⁹ Lemulun luk masi' idi mebeneh niat meluun samal ratnan lemulun luk medita' niat luk ngalap babpat binaweh luk pino.

²⁰ Do' iko ninger amung-amung bada', pelé iko ngalap peruan. Merapet inan Tuhan, idi iko mawang niat.

²¹ Lemulun luk mileh idi mepiteb, mebala ngaceku terawéneh luk muned, idi balaneh luk do' ngubuk lemulun.

²² Ileh ineh aceh bued ulun kuan lemulun luk mepiteb, iamo' na ulekneh mada' lemulun luk mebacé.

²³ Lemulun luk mepiteb ngerawé kareb nateh ieh pebala, pad ubukneh pelaba do'.

²⁴ Bala luk do' mepad kudeng duru' luk mepaci', idi ieh ngacing do' ulun.

²⁵ Inan dalan luk teruayen lemulun do', iamo' kekipedneh macing inan até.

²⁶ Lun tebarin metueh ngakem, ngaceku ieh pian ngebor batekneh.

²⁷ Lemulun luk dat nakap dalan ngedereh nelun baken; idi balaneh mepad kudeng apui luk ngeseb.

²⁸ Lemulun luk dat ngatum buri'; ideh ngacing ria' idi ngusag rurum.

²⁹ Lemulun luk mesangit ku datneh naluk lun rurumneh pad ideh pelaba dereh.

³⁰ Matar bururmu ratnan riruh lemulun luk dat luk sikinit mateh ngaceku ngerawé luk dat.

³¹ Mekadang ulun, ieh ineh tabpar lemulun luk matu. Abpuk luk mebuda' mangun ku pata uburneh.

³² Meluun do' ulai niat ratnan ngadan rayeh. Meluun do' ngimet bururmu ratnan ngimet mula' bawang.

³³ Lemulun nala' udi, iamo' Allah ineh luk mutut.