BALE' 15 - BALA LUK DO'

¹ Or dengan mebeneh niat miak ngelaya' useh, iamo' or luk metueh ngegio useh.

² Kareb lemulun luk mileh pebala, ileh ineh ngeruid niat, iamo' bala lun luk mebacé na ulekneh.

³ Tuhan nier luk mangun iapeh-iapeh. Ieh nginita netau, kareb tau nganau' luk do' idi luk dat.

⁴ Bala luk do' ngacing ulun, iamo' bala luk dat ngurat roh lemulun.

⁵ Lemulun luk mebacé na ngerawé bada' tamanneh, iamo' lemulun luk mileh pian badénneh.

⁶ Lemulun luk matu inan binaweh, iamo' binaweh lemulun luk dat megéi' metutu' kareb inan susa'.

⁷ Lun mileh mo' luk ngacing ileh, iamo' baken lun luk mebacé.

⁸ Tuhan mawang niat kareb lemulun luk do' sembayang, iamo' Ieh megateh niat ku baré luk iten lemulun luk dat.

⁹ Tuhan megateh ku kekamen lemulun luk dat, iamo' Ieh mawa inan lemulun luk nganau' luk matu.

¹⁰ Kudeng iko nganau' sala', meberat ukummu; iko miak maté kudeng iko ara' badén.

¹¹ Su luk inan até pana' na miak ngelinged anun-anun ratnan Tuhan; kudeng apehké lemulun miak ngalum terawéneh ratnan Allah?

¹² Lemulun luk medita' niat ara' badén, idi na pian buken lun mileh.

¹³ Kareb lemulun mawang niat ieh merimud, iamo' kareb ieh mesusa' niat, meberat kiungneh.

¹⁴ Lemulun luk mileh pian sibada', iamo' lemulun luk mebacé mawang niat ku bala luk mebacé.

¹⁵ Lemulun luk meberat niat megéi' inan susa', iamo' lemulun luk mawang niat megéi' inan peruan.

¹⁶ Lun masi' luk matot inan Tuhan meluun samal ratnan lun do' luk inan susa'.

¹⁷ Meluun do' kuman kikid irin dengan lemulun luk inanmu mawa, ratnan kuman uang pung dengan lemulun luk inanmu megateh.

¹⁸ Lemulun luk malé gateh ngacing kedaluh, iamo' lemulun luk mulai niat ngacing pedo'.

¹⁹ Lemulun luk mekupé megéi' inan susa', iamo' lemulun luk matu na inan susa'.

²⁰ Anak deléi' luk mileh ngawang niat tamanneh, iamo' lun mebacé mo' ngedat tinanneh.

²¹ Kekamen luk mebacé ngawang niat lemulun luk na mileh; iamo' lemulun luk mileh nganau' luk matu.

²² Mutuh nelun mada' namu pad luk ruenmu miak mangun. Kudeng iko na badén, luk ruenmu na mangun.

²³ Lemulun luk maré or luk petulu inan awang!

²⁴ Lemulun luk mileh mudik maya' dalan ulun, na ieh remuru maya' dalan até.

²⁵ Tuhan ngusag ruma' lemulun luk medita' niat, iamo' Ieh matar tana' decur tinula'.

²⁶ Tuhan megateh ku terawé lemulun luk dat, iamo' Ieh mawang niat ku bala luk méi'.

²⁷ Lemulun luk nakap binaweh maya' dalan luk tekilu' miak ngacing susa' kuan tetek ruma'neh. Aleg ngalap suap, pad iko mekadang ulun.

²⁸ Lemulun luk do' ngerawé do'-do' kareb nateh ieh maré or, iamo' lemulun luk dat saget ngor bala pad ngacing ria'.

²⁹ Tuhan ninger sembayang lemulun luk do', iamo' na Ieh ninger putuh lemulun luk dat.

³⁰ Lemulun luk merimud ngawang niatmu, idi bala luk do' maré namu do' udeng.

³¹ Kudeng iko ninger kareb iko badén, iko ineh lemulun luk mileh.

³² Kudeng iko ara' badén, iko ngurat bururmu sebuleng. Kudeng iko pian badén, iko miak amé' mileh.

³³ Tot inan Tuhan mangun ku ileh kuanmu. Do' iko mebeneh niat, pad iko ngalap ubur.