BALE' 14 - BALA LUK DO'

¹ Decur luk mileh ngawang niat tetek ruma'neh, iamo' decur luk mebacé ngusag neneh.

² Kudeng iko matot inan Tuhan, iko maya' dalan luk mesiri, iamo' lemulun luk nganau' luk tekilu' na ngerawé Allah.

³ Lun luk mebacé medita' niat, idi ieh pelaba ula' buri'. Lemulun luk mileh uen matar ku balaneh.

⁴ Kudeng na sapi' ku ngeruid radu, iko miak nibu sesuut padé mo'. Iamo' kudeng iko inan sapi', iko miak nganau' lati' luk rayeh.

⁵ Lun nekali' luk inan merapet megéi' mala luk matu, iamo' lun nekali' luk na inan merapet mebalih mo'.

⁶ Lun luk medita' niat na tu amé' mileh, iamo' lemulun luk do' kali' saget mileh.

⁷ Aleg perurum nan lemulun luk mebacé. Ideh na miak mada' namu.

⁸ Rat iapehké ileh lemulun luk mileh? Ngaceku ieh kali' luk petulu ruenneh. Rat iapehké bacé lemulun luk mebacé? Ngaceku ieh sinaluk bang terawéneh.

⁹ Lemulun luk mebacé na mesusa' niat ku sala'deh. Iamo' lemulun luk matu pian mutuh do' ku sala'deh.

¹⁰ Kudeng iko mawang niat, iko kuan. Kudeng iko dat niat, iko kuan. Lun baken na miak perurum namu ratnan luk kudeng ineh.

¹¹ Kareb ruma' lemulun luk dat pangeh inusag, ruma' lemulun luk matu tuped meraben.

¹² Inan dalan luk teruayen lemulun matu, iamo' kekiped dalan ineh maté.

¹³ Riruh lemulun miak ngelinged dat niatneh. Kareb awang buro, idi susa' megéi' idi.

¹⁴ Lemulun luk dat miak kumin petulu dengan luk kikemneh. Lemulun luk matu uen ngua' maya' kekamenneh luk do'.

¹⁵ Lemulun luk mebacé manu ku amung-amung luk pedingerenneh. Lemulun luk mileh matar lawéneh.

¹⁶ Lemulun luk do' kali' buro ratnan luk dat, iamo' lemulun luk mebacé na ngerawé do'-do'.

¹⁷ Lemulun luk mesaget niat nganau' luk mebacé. Iamo' lun luk mileh mulai niat.

¹⁸ Lemulun luk mebacé ngalap ua' bacédeh, iamo' lun luk mileh uen ngua' dengan ileh.

¹⁹ Lemulun luk dat miak tekeradung pa kiung lun luk matu, idi mutuh do' nedeh.

²⁰ Lun masi' na inan rurum, iamo' lun do' mula' rurum.

²¹ Kudeng iko pian ngalap awang niat, do' iko méi' nelun masi'. Kudeng na méi' nelun, ieh ineh mesala'.

²² Iko miak inan merapet idi buren lun baken, kudeng iko ngakem ngacing luk do'. Kudeng iko ngakem ngacing luk dat iko mesala'.

²³ Ngakem pad iko ngalap petap. Iamo' gayam luk mo'-mo' nganau' namu masi'.

²⁴ Lemulun luk mileh uen ngua' ku binaweh, iamo' lemulun luk mebacé ngegala' bacéneh.

²⁵ Lun nekali' ngulun lemulun kareb ieh mala luk matu. Iamo' kareb ieh mebalih ieh masui lemulun.

²⁶ Sembayang luk matu ngacing rapet idi do' udeng kuan lemulun idi uang tetek ruma'neh.

²⁷ Pianké iko buro ratnan até? Sembayang luk matu ieh ineh lawa ulun.

²⁸ Raca' uen ngerayeh ngaceku kinula' anak itinneh. Kudeng na anak itinneh na ieh mangun ku raca'.

²⁹ Lemulun luk mekadang niat ineh mileh. Iamo' lemulun luk malé mét niat ngegala' bacéneh.

³⁰ Lemulun luk na megagau terawé ineh do' ulun, iamo' lemulun luk mét niat inan aceh ét luk pelaba bura'.

³¹ Kudeng iko ngedereh nelun masi', iko ineh ngedat Allah luk nemudut nedeh. Iamo' kudeng iko méi' nelun masi', iko ineh ngedita' Allah.

³² Lemulun luk dat mebpeh ngaceku kekamenneh luk dat, iamo' lemulun luk do' uen matar ngaceku do'neh.

³³ Inan ileh bang amung terawé lemulun luk mepiteb, iamo' lun luk mebacé na luk idi ileh.

³⁴ Luk matu ngerayeh aceh pupu, iamo' sala' ngigu' tuda'-tuda' pupu.

³⁵ Raca'-raca' mawang niat nan lun rayeh luk mileh, iamo' ideh ngukum lun rayeh luk ngigu' nedeh.