BALE' 13 - BALA LUK DO'

¹ Anak luk mileh maya' bada' tamanneh, iamo' lemulun luk medita' niat na ngamo sala'neh.

² Lemulun luk matu uen ngeperuan ngaceku baladeh, iamo' lemulun luk naluk nakap luk dat.

³ Matar do'-do' ratnan balamu, pad iko mulun. Lemulun luk mula' buri' ngusag bururneh sebuleng.

⁴ Na tu lemulun luk mekupé ngalap luk pianneh. Lemulun luk megéi', ngalap amung-amung luk pianneh.

⁵ Lemulun luk matu megateh inan balih, iamo' bala lemulun luk dat ngacing igu' mo'.

⁶ Luk matu matar lemulun luk na mesala'. Luk dat ngacing ebpeh lun mesala'.

⁷ Inan lemulun luk siayu mangun ku lun do', iamo' na binawehdeh. Inan teh lemulun siayu mangun ku lun masi', iamo' inan mula' binawehdeh.

⁸ Lun do' makai usin pad matar ulunneh, iamo' lun masi' na uen lun ngesusa'.

⁹ Lun luk matu mepad kudeng lapung luk merasat; iamo' lemulun luk dat mepad kudeng lapung luk malé mekilep.

¹⁰ Dita' niat ngacing susa' mo'. Meluun do' mutuh badén.

¹¹ Kudeng saget ngalap binaweh, binaweh ineh saget metutu'. Kudeng mikat ngalap usin, iko miak ngula' usinmu.

¹² Kudeng rapet uen ngarung, niat lemulun pelaba susa', iamo' kudeng pian niatmu uen ngacing iko mepanu' ku rapet.

¹³ Kudeng iko ara' badén, iko nakap susa'. Maya' bada' ineh, pad iko ngalap ulun.

¹⁴ Bada' lemulun luk mileh, ieh ineh lawa ulun. Ratnan ineh iko puatin ratnan abpung até.

¹⁵ Ileh do' kali' uen ngedita', iamo' lemulun luk na inan merapet maya' dalan até.

¹⁶ Lemulun luk mileh ngerawé kareb nateh nganau' anun-anun. Iamo' lun luk mebacé ngegala' bacéneh.

¹⁷ Lemulun luk nated bala, luk na inan merapet ngacing kedaluh, iamo' lun luk inan merapet nguit pedo'.

¹⁸ Lemulun luk na sibada' masi' idi migu'. Lemulun luk ninger bada' uen ngedita'.

¹⁹ Kudeng iko ngalap luk pian niatmu pelaba do'. Lun luk mebacé ara' teketed ratnan luk dat.

²⁰ Sibada' ratnan lemulun luk mileh, pad iko pana' mileh. Kudeng iko ngalap lun luk mebacé ku rurummu, idi ulunmu uen ngusag.

²¹ Susa' ngerada' nelun mesala', iamo' lemulun luk matu uen ngua' ku luk do'.

²² Lemulun luk matu inan binaweh luk uen mabpat kuan mupunneh, iamo' binaweh lun mesala' lapen lun luk matu.

²³ Tana' luk na inau' ku lati' miak ngeruat uli' kuan lun masi', iamo' lemulun luk dat mebpeng na nganau' tana' ineh ku lati'.

²⁴ Kudeng iko na ngukum anakmu, iko na mawa neneh. Kudeng iko mawa neneh, kali' rungen iko mada' neneh.

²⁵ Lemulun luk matu inan petap akan, iamo' lemulun luk dat megéi' melau.