BALE' 12 - BALA LUK DO'

¹ Lemulun luk mawa ku ileh pian badén kareb ieh inan sala'. Lemulun luk na pian badén mebacé.

² Tuhan mawang niat inan lemulun luk matu, iamo' Ieh ngukum lemulun luk nganau' luk dat.

³ Luk dat na ngacing do' udeng, iamo' lemulun luk matu tuped meraben.

⁴ Decur luk do' niat mangun ku pata awan deléineh. Iamo' kudeng ieh ngigu' neneh, ieh mepad kudeng ét susud bang tulangneh.

⁵ Lemulun luk matu nganau' luk mesiri; iamo' lemulun luk dat pian naluk namu.

⁶ Bala lemulun luk dat ngacing até, iamo' bala lemulun luk matu muit nelun luk medereh.

⁷ Lemulun luk dat maté dengan na inul. Iamo' tetek ruma' lemulun luk matu miak mulun.

⁸ Kudeng iko inan ileh, iko miak buren. Kudeng iko mebacé, lun baken ngebeneh namu.

⁹ Meluun rayeh samal kuan lun dat luk ngakem nakap akanneh ratnan lun luk ngerawé bururneh do', iamo' setuneh ieh melau.

¹⁰ Lemulun luk matu méi' kuan aya'neh, iamo' lemulun luk dat ngedereh nedeh.

¹¹ Lun megéi' luk inan lati' inan petap akan. Iamo' lemulun luk megéi' nganau' luk mo'-mo' na mileh.

¹² Lemulun luk dat pian nganau' luk dat mo'. Iamo' lemulun luk matu tuped meraben.

¹³ Lemulun luk dat uen ngabpung ku balaneh sebuleng, iamo' lemulun luk matu puatin ratnan susa'.

¹⁴ Lemulun ngalap tabpar maya' luk bilaneh idi luk kikemneh. Ieh ngalap luk petulu kuanneh.

¹⁵ Lemulun luk mebacé megéi' ngerawé bururneh matu. Lemulun luk mileh ninger bada'.

¹⁶ Kudeng lun mebacé dat niat, ieh ngegala' ineh. Lemulun luk mileh na dat niat ku bala dulun.

¹⁷ Bala luk matu ngacing luk mesiri, iamo' bala luk mebalih ngacing luk tekilu'.

¹⁸ Bala luk na tabpen ngurat mepad kudeng pelapet, iamo' bala lemulun luk matu ngedo' nelun.

¹⁹ Mebalih na mekadang ulun, iamo' luk matu mulun ruked-ruked.

²⁰ Lemulun luk ngerawé luk dat miak uen ngagap, iamo' lemulun luk pian ngacing luk do' ngalap mawang niat.

²¹ Luk dat na macing kuan lemulun luk matu, iamo' lemulun luk dat ngalap susa' mo' sebuleng.

²² Tuhan megateh inan lemulun luk mebalih, iamo' Ieh mawang niat inan lemulun luk maya' jani'deh.

²³ Lemulun luk mileh pirud ratnan ilehneh, iamo' lemulun luk mebacé ngegala' bacédeh.

²⁴ Lemulun luk megéi' mangun ku lun ngimet, iamo' lun luk mekupé mangun ku demulun mo'.

²⁵ Susa' bang niat lemulun matad neneh ratnan awang niat, iamo' bala luk méi' miak ngubuk neneh.

²⁶ Lemulun luk matu megéi' ngerawé kekamenneh, iamo' lemulun luk dat meraruh.

²⁷ Lun luk mekupé na ngalap luk pianneh, iamo' lun luk megéi' ngalap peruan.

²⁸ Luk matu ineh dalan ulun; bacé ineh dalan até.