BALE' 11 - BALA LUK DO'

¹ Tuhan megateh inan lemulun luk makai timang luk na petulu. Iamo' Ieh mawang niat ku timang luk matu.

² Lemulun luk medita' niat miak uen ngigu', iamo' lemulun luk mileh mebeneh niat.

³ Lemulun luk matu maya' luk mesiri. Lemulun luk na inan merapet uen ngusag ku lawédeh luk tekilu'.

⁴ Mula' binaweh na miak ngedengan namu kareb iko malé maté, iamo' dalan luk mesiri miak ngulun namu.

⁵ Kekamen luk mesiri ngeraked dalan lemulun luk matu. Iamo' lemulun luk dat ngacing ebpeh kuan bururneh sebuleng.

⁶ Lemulun luk mesiri uen ngulun ku dalanneh luk matu, iamo' lemulun luk na inan merapet uen ngabpung ku lilineh sebuleng.

⁷ Kareb lemulun luk dat maté, rapetneh pana' maté denganneh. Merapet ku binaweh na ulekneh.

⁸ Lemulun luk matu puatin ratnan susa'. Iamo' susa' macing kuan lemulun luk dat.

⁹ Lemulun luk na manu ngusag ulun lun baken ku baladeh. Iamo' lun luk matu ngulun nelun baken ku ilehdeh.

¹⁰ Kareb lemulun luk matu ngalap peruan, bawang su inandeh pana' do' ria'. Kareb lemulun luk dat maté, lemulun ngitang ku awang niatdeh.

¹¹ Bawang-bawang uen ngerayeh ku ulun lemulun luk matu, iamo' ideh uen ngusag ku bala lemulun luk dat.

¹² Lemulun luk situnga nelun baken na mileh. Lemulun luk do' kali' pirud mo'.

¹³ Aleg mada' luk inalum kuan lemulun luk ngatum buri', ngaceku ieh na inan merapet. Iamo' lemulun luk inan merapet miak ngalum bala ineh.

¹⁴ Aceh pupu miak uen ngelaya' kudeng na lun luk nguyut nedeh. Iamo' mula' lun luk mada' ngacing do' udeng.

¹⁵ Kudeng iko pejani' mayar baleh lun baken, na miak na iko mesusa'. Meluun do' iko na pejani' mayar baleh dulun.

¹⁶ Decur luk do' niat uen ngedita', iamo' decur luk dat lawé miak uen ngigu'. Lun luk mekupé na miak ngalap usin, iamo' lemulun luk megéi' mangun ku lun do'.

¹⁷ Lemulun luk méi' nelun baken ngalap peruan. Kudeng iko na méi', iko ngurat burumu sebuleng.

¹⁸ Lemulun luk dat na ngalap peruan, iamo' kudeng iko nganau' luk matu iko ngalap samal.

¹⁹ Lemulun luk lutep nganau' luk matu miak mulun, iamo' lemulun luk lutep nganau' luk dat miak maté.

²⁰ Tuhan megateh inan lemulun luk ngerawé luk dat, iamo' Ieh mawang niat inan lemulun luk nganau' luk matu.

²¹ Kali' rungen lemulun luk dat miak kumin, iamo' lemulun luk matu miak puatin.

²² Decur luk do' taga luk dat buri' mepad kudeng susing amas bang icung barek.

²³ Pian lemulun luk matu ngacing luk do'. Kudeng lemulun luk dat ngalap luk piandeh, lun baken museh.

²⁴ Sebuang lemulun mekatu maré usin kuan lun baken, idi ideh iuk-iuk mula' binaweh. Iamo' lun baken matot maré idi ideh iuk-iuk amé' masi'.

²⁵ Lemulun luk mekatu ngalap mula' peruan. Ngedengan nelun baken, idi ideh ngedengan namu.

²⁶ Lun mula' ngediman lemulun luk ngamung padéneh ngaceku nganét raga luk medita', iamo' ideh ngubur lemulun luk masui padéneh.

²⁷ Lemulun luk nakap luk do' miak uen ngedita', iamo' kudeng iko nakap luk dat, susa' miak macing namu.

²⁸ Lemulun luk merapet ku binawehdeh miak mebpeh mepad kudeng don kayuh luk merurug bang kareb luk meteneb. Iamo' lemulun luk matu ngalap peruan, mepad kudeng don kayuh bang kareb luk melau'.

²⁹ Lemulun luk ngacing susa' kuan tetek ruma'neh, na ngalap anun-anun. Lemulun luk mebacé megéi' mangun ku demulun lun luk mileh.

³⁰ Bua' lemulun luk matu mangun ku lawa ulun, iamo' lemulun luk dat maté kareb nateh tarekneh macing.

³¹ Lemulun luk matu ngalap peruan bang tana' ini. Kali' rungen lun luk dat idi lun mesala' miak kumin.