BALE' 10 - BALA LUK DO'

¹ Balé' ini inayud Selimun: Anak luk mileh ngawang niat tamanneh. Iamo' anak luk mebacé ngesusa' niat tinanneh.

² Luk lapenmu dengan naluk na ngeperuan namu, iamo' luk matu ngulun namu.

³ Tuhan na nima' lemulun luk matu melau, iamo' Ieh mebpeng lemulun luk dat na ngalap luk pianneh.

⁴ Lun luk mekupé kali' rungen masi', iamo' lun luk megéi' miak mangun ku lun do'.

⁵ Lun luk mileh ngeranih kareb padé melak, iamo' lemulun luk rudap kareb lun baken ngeranih miak ngalap igu'.

⁶ Lemulun luk matu ngalap peruan. Bala lemulun luk dat ngelinged niat luk dat.

⁷ Terawé ratnan lemulun luk matu ngacing peruan. Iamo' lemulun luk dat na miak uen ngerawé.

⁸ Lemulun luk mileh miak buken. Lemulun luk pebala luk mebacé miak ngalap dereh.

⁹ Lemulun luk mesiri do' udeng idi lutep, iamo' lemulun luk naluk miak kamen.

¹⁰ Lemulun luk ngalum luk matu ngacing kedaluh, iamo' lemulun luk ngegala' luk matu ngacing pedo'.

¹¹ Bala lemulun luk matu mangun ku bued ulun, iamo' bala lemulun luk dat ngelinged niat luk dat.

¹² Gateh niat nganau' kedaluh, iamo' awa na ngua' sala' dulun.

¹³ Lemulun luk do' kali' pebala dengan ileh, iamo' lun luk mebacé petulu kumin.

¹⁴ Lemulun luk do' kali' nakap mula' ileh. Iamo' bala lun mebacé ngacing susa'.

¹⁵ Binaweh lun do' matar neneh. Iamo' lun masi' medereh ku asi'deh.

¹⁶ Tabpar lemulun luk matu ineh ulun, iamo' sala' ngacing sala' teh.

¹⁷ Lemulun luk na ara' badén miak mulun, iamo' lemulun luk ara' buken ngalap dereh.

¹⁸ Lemulun luk mebalih, ieh ineh lemulun luk megateh inan lun baken. Lemulun luk ngatum buri' ineh mebacé.

¹⁹ Lemulun luk mula' bala malé nganau' sala'. Kudeng iko mileh, kali' rungen iko pirud.

²⁰ Bala lemulun luk matu mepad kudeng pirak luk do'. Terawé lemulun luk dat na tabpen.

²¹ Bala lemulun luk matu ngacing peruan kuan lemulun, iamo' bacé ngacing até namu.

²² Peruan Tuhan ngacing do' nelun. Kekamen luk meberat na ngula' binawehneh.

²³ Lemulun luk pian nganau' sala' mebacé, lun luk do' kali' mawang niat ku ileh.

²⁴ Lemulun luk matu ngalap luk pianneh, iamo' lemulun luk dat ngalap luk inanneh matot.

²⁵ Lemulun luk dat mepalid ku bui, iamo' lemulun luk mesiri tuped meraben.

²⁶ Aleg mutuh lemulun luk mekupé ngakem kuanmu. Ieh nganau' lipenmu melaya' mepad kudeng kuman luk malam, idi teh kudeng rabpun bang matehmu.

²⁷ Matot inan Tuhan, pad iko mekadang ulun. Lemulun luk dat maté kareb ideh mangud.

²⁸ Rapet lemulun luk matu ngacing awang, iamo' lemulun luk dat na inan merapet.

²⁹ Tuhan matar lemulun luk na mesala', iamo' Ieh ngaté lemulun luk nganau' sala'.

³⁰ Lemulun luk matu do' udeng idi lutep, iamo' lemulun luk dat na tuman bang tana' ini.

³¹ Lemulun luk matu pebala dengan ileh, iamo' dila' luk pebala luk dat uen ungeng.

³² Lemulun luk matu pebala dengan éi', iamo' lemulun luk dat megéi' pebala idi ngurat niat lun baken.