BALE' 1 - BALA LUK DO'

Ulekneh Balé'

¹ Balé' Selimun, anak Daud luk raca' Israil.

² Balé' ini miak mada' namu, pad iko kali' ileh idi bada', idi bala luk inan ilung luk medalem.

³ Balé' ini mada' namu ratnan mulun dengan ileh, idi ratnan na naluk, idi ratnan nganau' luk matu idi luk mesiri.

⁴ Ratnan balé' ini, lun luk mebacé mangun mileh, anak adi' pana' kali' dalan luk matu,

⁵ lun luk mileh, mangun meluun ileh, idi lun luk pangeh nesibada' miak kiuten,

⁶ pad ideh kali' ilung balé' luk inalum, idi itun lun mileh luk medalem.

Bada' Kuan Anak Adi' Deléi

⁷ Kudeng iko pian ngalap ileh, do' iko matot inan Tuhan atun. Lun luk mebacé na merapet ku ileh, idi na sikal sibada'.

⁸ O anakku, ninger amung bada' taman, idi ngerawé bala i tinam.

⁹ Bada' didueh miak ngedo' ulunmu, mepad kudeng sigar idi bané nganau' namu do' taga.

¹⁰ O anakku, kareb lun mesala' nutun namu, aleg iko melaya'.

¹¹ Kudeng ideh pebala, “Do' tau amé' ngaté lemulun! Do' tau marot idi ngakem lun luk na mesala'!

¹² Kudeng ideh mulun idi do' ulun kareb tau ngalap nedeh, kali' rungen ideh pangeh naté kareb tau necan nedeh!

¹³ Tau miak ngalap tuda'-tuda' binaweh pad ruma' tau panu'!

¹⁴ Do' tau pebaya', idi tau mabpat amung luk lapen tau.”

¹⁵ O anakku, aleg iko maya' lemulun luk kudeng ineh. Buro rat nedeh.

¹⁶ Ideh na tuman na nganau' luk dat. Ideh megéi' temina' ngaté lemulun.

¹⁷ Na ulekneh nganau' abpung su siren suit luk pianmu,

¹⁸ iamo' lemulun luk kudeng ineh nganau' abpung kuan bururdeh sebuleng, idi ideh miak maté ku ineh.

¹⁹ Lun luk mano idi ngaté lemulun na miak na maté.

Ileh Nawar

²⁰ Ninger! Ileh nawar déi' dalan idi déi' kadai pana'.

²¹ Ieh nawar déi' munung tanga' bawang, idi su apeh lemulun pamung.

²² O lun luk mebacé! Tuda' ioké muyuh mebacé? Tuda' ioké muyuh situnga nan ileh? Naké muyuh pian sibada'?

²³ Ninger, kareb ui mada' nemuyuh; ui miak maré bada' luk do' idi aceh babpat ilehku nemuyuh.

²⁴ Ui nenawar nemuyuh idi neneteng nemuyuh, iamo' na muyuh neninger.

²⁵ Muyuh na nemaya' bada'ku, idi muyuh na pian badén.

²⁶ Ngaceku ineh, kareb muyuh mesusa', ui meriruh. Idi ui situnga nemuyuh kareb inan luk katot —

²⁷ kareb tot ineh macing nemuyuh mepad kudeng barui, idi nguit bui susa', pad muyuh mét idi medereh.

²⁸ Kareb ineh muyuh nawar ileh, iamo' na ui sikal ngua' putuh muyuh. Kudeng muyuh nakap negku iapeh-iapeh pana', na muyuh kali' negku.

²⁹ Na muyuh pian ku ileh, idi muyuh ara' matot inan Tuhan.

³⁰ Muyuh na pian badénku idi na pian ninger bada'ku.

³¹ Ngaceku ineh, muyuh ngalap ukum luk petulu, idi muyuh melibo ku kekamen muyuh sebuleng.

³² Lemulun luk na pekalai maté ngaceku ideh ngarung ileh. Lun luk mebacé maté ngaceku na ngerawé ileh.

³³ Iamo' idé-idé luk ninger balaku, ieh do' udeng. Ieh mulun dengan na matot.